ជាតិ
រដ្ឋមន្ត្រីក្រសួងវប្បធម៌ ស្នើសាធារណជនឲ្យលើកតម្កើងម្ចាស់ស្នាដៃ និងឈប់គាំទ្រជនលួចចម្លង
× ភ្នំពេញ៖ មហាជន និងអ្នកសារព័ត៌មាន គឺជាភ្នែកច្រមុះរបស់ក្រសួង ក្នុងការទប់ស្កាត់បុគ្គលបំពានច្បាប់កម្មសិទ្ធិបញ្ញា និងសិទ្ធិប្រហាក់ប្រហែល រួមទាំងជនដែលនិពន្ធបទចម្រៀងប៉ះពាល់ដល់វប្បធម៌ជាតិ។ មហាជនមិនគួរលើកតម្កើងជនទាំងនោះ តែបែរមកឈប់គាំទ្រស្នាដៃរបស់ពួកគេ យូរទៅបុគ្គលទាំងនោះនឹងខ្មាសខ្លួនឯង។ នេះយោងតាមប្រសាសន៍របស់លោកស្រី ភឿង សកុណា ក្នុងសន្និសីទសារព័ត៌មាននៅរដ្ឋសភា ក្រោយកិច្ចប្រជុំគណៈកម្មការទី៧ ជាមួយមន្ត្រីក្រសួងវប្បធម៌និងវិចិត្រសិល្បៈ។
លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ លើកទឹកចិត្តដល់មហាជន និងអ្នកសារព័ត៌មាន ឱ្យរួមគ្នាជាមួយក្រសួងវប្បធម៌ក្នុងការលើកកម្ពស់ការគោរពច្បាប់កម្មសិទ្ធិបញ្ញានិងសិទ្ធិប្រហាក់ប្រហែល រួមទាំងលើកតម្កើងវប្បធម៌ជាតិ តាមរយៈស្នាដៃតែងនិពន្ធ។ ការណ៍នោះអាចធ្វើទៅបាន ដោយក្រសួងមានវិធានការទប់ស្កាត់មិនឱ្យចេញផ្សាយស្នាដៃដែលបំពានច្បាប់ និងមិនមានសីលធម៌ ហើយមហាជននិងសារព័ត៌មានមិនចែកផ្សាយបន្ត រួមទាំងមិនប្រើប្រាស់ជននោះ។
លោកស្រីបញ្ជាក់យ៉ាងម៉ឺងម៉ាត់ដូច្នេះ៖« មហាជនក៏ជាភ្នែកច្រមុះ អ្នកកាសែតក៏ជាភ្នែកច្រមុះដែរ ក្នុងការទ្រទ្រង់វប្បធម៌។ កុំលើកតម្លៃអ្នកដែលលួចស្នាដៃ និងអ្នកនិពន្ធដែលមិនបានផ្ដល់គុណតម្លៃដល់វប្បធម៌ជាតិ។ ត្រូវយកគំរូអ្នកដែលគោរពច្បាប់ គោរពក្រមសីលធម៌ ឱ្យក្លាយជាគំរូរបស់សង្គម។ ក្រសួងមានវិធានការទប់ស្កាត់មិនឱ្យចេញផ្សាយ ហើយអ្នកទាំងអស់គ្នាមិនចែកផ្សាយបន្ត មិនហៅអ្នកនោះមកធ្វើការ យូរទៅគេរាងឯង»។
កន្លងមកមានផលិតកម្ម និងបុគ្គលឯកជនមិនតិចឡើយ បានយកស្នាដៃកម្មសិទ្ធិបញ្ញា និងស្នាដៃជាសម្បត្តិរបស់ក្រសួងវប្បធម៌ ទៅប្រើប្រាស់ក្នុងន័យធ្វើអាជីវកម្ម ដែលបំពានច្បាប់ និងត្រូវក្រសួងហៅទៅអប់រំណែនាំ។ ថ្មីៗនេះ ក៏មានរឿងចម្រូងចម្រាស ឈានដល់ការចាត់វិធានការ ករណីបទចម្រៀងមរតកដើមរបស់លោក គង្គ ប៊ុនឈឿន ដែលត្រូវក្រុមហ៊ុនមួយ យកទៅកាឡៃ។ ទោះជាយ៉ាងណាច្បាប់កម្មសិទ្ធិបញ្ញា និងច្បាប់ប្រហាក់ប្រហែល មានតាំងពីឆ្នាំ២០០៣មកម្ល៉េះ តែបុគ្គលមួយចំនួននៅតែបំពាន។
ទាក់ទិននឹងស្នាដៃបទចម្រៀង រដ្ឋមន្ត្រីក្រសួងវប្បធម៌ និងវិចិត្រសិល្បៈ បានបញ្ជាក់យ៉ាងច្បាស់ថា កន្លងមកក្រសួងមិនតម្រូវឱ្យយកស្នាដៃទៅឆ្លងក្រសួងឡើយ ក្នុងហេតុផលផ្ដល់សិទ្ធិនិងសេរីភាពដល់អ្នកនិពន្ធ។ តែអ្នកនិពន្ធ ក៏ត្រូវផ្ដល់តម្លៃដល់ស្នាដៃរបស់ខ្លួន ឱ្យទៅជាគំរូល្អសម្រាប់មហាជនដែរ។ ក្នុងករណីចម្រៀងមិនមានក្រមសីលធម៌ និងធ្វើឱ្យប៉ះពាល់តម្លៃវប្បធម៌ជាតិ ក្រសួងក៏បានប្រើវិធានការអប់រំណែនាំច្រើនដែរ។
ដោយមើលឃើញថា ច្បាប់កាលពីឆ្នាំ២០០៣ នៅមានភាពខ្វះខាត ក្រសួងបានរៀបចំធ្វើពង្រាងវិសោធនកម្មច្បាប់ ស្ដីពីច្បាប់បេតិកភណ្ឌ ច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែល ដែលគ្រោងធ្វើនៅឆ្នាំ២០២០ ដល់២០២៣ ដោយមានក្រសួងស្ថាប័នពាក់ព័ន្ធនានារួមគ្នាពិភាក្សា៕
Tag:
ក្រសួងវប្បធម៌
សន្និសីទសារព័ត៌មាន
© រក្សាសិទ្ធិដោយ thmeythmey.com