ជាតិ
សៀវភៅនិយាយពីនាយករដ្ឋមន្ត្រី ហ៊ុន សែន កម្រាស់ជាង៧០០ទំព័រ ត្រូវបានផ្សព្វផ្សាយ
×![]()
ដោយ: ថ្មីៗ
សៀវភៅស្តីពីប្រវត្តិជីវិត ការតស៊ូ គ្រួសារ និងកិច្ចការនយោបាយប្រទេស របស់សម្តេច ហ៊ុន សែន និងព្រឹត្តិការណ៍ផ្សេងៗទៀត ដែលកើតមាននៅក្នុងប្រទេសជាង៤០ឆ្នាំមកនេះ ត្រូវបានចេញផ្សាយជាលើកទី៣ហើយ ដោយមានរហូតដល់ទៅជាង៧០០ទំព័រ។
សៀវភៅនេះមាននចំណងជើងថា``ហ៊ុន សែន - នយោបាយ និងអំណាចក្នុងប្រវត្តិសាស្ត្រខ្មែរជាង៤០ឆ្នាំ»បានចេញផ្សាយជាលើកទី៣ នៅថ្ងៃទី៤ មេសា ឆ្នាំ២០១៩ មានចំនួន៣ម៉ឺនច្បាប់។
លោក ឆាយ សុផល អ្នកចងក្រងសៀវភៅនេះបានរៀបរាប់ថា ដោយមានស្ថានភាពវិវត្តថ្មីៗជាច្រើន ទើបលោកសម្រេចធ្វើបច្ចុប្បន្នភាពសៀវភៅនេះចាប់ពីឆ្នាំ២០១៧មក។ លោកបានសម្រួលខ្លះនៅផ្នែកមុនៗ និងបន្ថែមខ្លឹមសារជាច្រើនដែលកើតមាននៅចន្លោះឆ្នាំ២០១៦ មកត្រឹមខែមីនា ឆ្នាំ២០១៩ រួមទាំងខ្លឹមសារដែលលោកបានសម្ភាសសម្តេចនាយករដ្ឋមន្ត្រីផង ពិសេសទាក់ទិននឹងចំណូលចិត្ត របស់ប្រមុខរដ្ឋាភិបាល។ នេះបើតាម លោក ឆាយ សុផលដែលបន្តបញ្ជាក់ទៀតថា សៀវភៅនេះ មិនផ្តោតតែពីប្រវត្តិសម្តេច ហ៊ុន សែននោះទេ តែក៏បានបង្ហាញពីនយោបាយជាតិ និងអន្តរជាតិប្រទាក់ក្រឡាគ្នានឹងកម្ពុជាដែរ ហើយវាពិតជា មានប្រយោជន៍ណាស់ ដើម្បីជាជំនួយស្មារតីក្នុងការស្វែងយល់ខ្លះៗពីប្រទេសកម្ពុជាចាប់ពីមុនឆ្នាំ១៩៧០ រហូតមកត្រឹមខែមីនា ឆ្នាំ២០១៩។
សៀវភៅនេះ បានចេញផ្សាយលើកទី១ មានជាង៣០០ទំព័រ បោះពុម្ពនៅចុងឆ្នាំ២០១១។ ចេញផ្សាយលើកទី២ មានជាង៤០០ទំព័រ បោះពុម្ពនៅដើមឆ្នាំ២០១៦ និងលើកទី៣នេះ មានដល់ទៅជាង៧០០ទំព័រ ចេញផ្សាយនៅដើមខែមេសាឆ្នាំ២០១៩។
សូមជម្រាបថា មកដល់ពេលនេះ លោក ឆាយ សុផល បានចងក្រងសៀវភៅចំនួន១០ចំណងជើងហើយ។ ថ្មីៗនេះ លោកក៏បានបើក«មជ្ឈមណ្ឌលរូបថតកម្ពុជា»ដោយដាក់តាំងរូបថត និងឃ្លីវីដេអូស្តីពីប្រវត្តិព្រឹត្តិការណ៍ខ្លះៗនៅក្នុងប្រទេសកម្ពុជា ចំនួន៦ជំនាន់ ពោលគឺគិតចាប់ពីមុនឆ្នាំ១៩៧០ មកដល់ប្ចុប្បន្ន។ មជ្ឈមណ្ឌលរូបថតកម្ពុជា ដែលចំណាយទឹកប្រាក់ប្រមាណជាង២៣ម៉ឺនដុល្លារ ត្រូវបានបើកឲ្យសាធារណជនចូលទស្សនាដោយឥតគិតថ្លៃ ដែលស្ថិតនៅក្នុងបុរីមហាសែនសុខ ខណ្ឌសែនសុខ៕
© រក្សាសិទ្ធិដោយ thmeythmey.com
