អន្តរជាតិ
បុរសវៀតណាម ផលិតបំពង់បឺតពីស្មៅតាមដងទន្លេមេគង្គ ជំនួសសម្ភារប្លាស្ទិក រូបភាព៖ VN express
× ខណៈពិភពលោក យល់ដឹងច្រើនពីផលប៉ះពាល់នៃសំរាមប្លាស្ទិក មនុស្សជាច្រើន ចាប់ផ្តើមនិយាយថា «ទេ» ចំពោះបំពង់ប្លាស្ទិក។ ដើម្បីដោះស្រាយបញ្ហានេះ មនុស្សនៅទូទាំងពិភពលោកបន្តច្នៃប្រឌិតសម្ភារមិនប៉ះពាល់បរិស្ថានជាពិសេសបំពង់បឺត។ សហគ្រិនវ័យក្មេងជនជាតិវៀតណាមម្នាក់ បានផលិតបំពង់បឺតដោយប្រើប្រាស់ស្មៅព្រៃ។
បុរសវៀតណាមឈ្មោះ Tran Minh Tien ជាម្ចាស់ក្រុមហ៊ុន Ống Hút Cỏ ដែលផលិតបំពង់បឺតចំនួនពីរប្រភេទ ដោយប្រើស្មៅម្យ៉ាងដែលមានដុះក្នុងព្រៃតាមបណ្តោយដងទន្លេមេគង្គ។ យោងតាមវីដេអូមួយ ដែលបង្ហោះលើទំព័រហ្វេសបុករបស់សារព័ត៌មាន Vietnam Express ទងស្មៅប្រភេទនេះមានប្រហោងនៅខាងក្នុង ដែលមានរាងដូចទៅនឹងបំពង់បឺត។
ក្នុងវីដេអូនេះដែរ លោក Tran Minh Tien ក៏បានពន្យល់ពីដំណើរការផលិតបំពង់បឺត ដោយប្រើប្រាស់ស្មៅប្រភេទនេះផងដែរ។ សម្រាប់ជំហានដំបូង ពួកគេប្រមែប្រមូលទងស្មៅនេះ និងសម្អាត ហើយកាត់ឲ្យស្មើនឹងប្រវែង ២០សង់ទីម៉ែត្រសម្រាប់បំពង់នីមួយៗ។
បន្ទាប់មកទៀត បំពង់បឺត ទាំងនេះត្រូវយកទៅសម្អាតជាថ្មីម្តងទៀត ហើយម្តងនេះ គឺសម្អាតនៅផ្នែកប្រហោងខាងក្នុងនៃបំពង់បឹត ដើម្បីធានាពីសុវត្ថិភាពអនាម័យ។ ក្រោយពីសម្អាតរួចរាល់ បំពង់បឺតទាំងនោះ ត្រូវចងជាបាច់ដោយប្រើប្រាស់ស្លឹកចេក។
អ្វីដែលពិសេសនោះ បំពង់បឺតនេះ មានពីរប្រភេទ៖ ស្រស់ និងស្ងួត។ បំពង់បឺងស្រស់ អាចរក្សាទុកក្នុងទូទឹកកក និងមានសុពលភាព២សប្តាហ៍។ ចំណែកបំពង់បឺតស្ងួតវិញ ត្រូវដាក់ហាលក្រោមកម្តៅព្រះអាទិត្យសម្រាប់រយៈពេល២ ទៅ ៣ថ្ងៃ ហើយដាក់ដុតក្នុងឡ។ សម្រាប់បំពង់បឺតប្រភេទនេះ វាអាចមានសុពលភាពយូរ ដែលអាចឈានដល់ ៦ខែឯណោះ ប្រសិនបើស្តុកក្នុងបន្ទប់មានសីតុណ្ហភាពត្រឹមត្រូវ។
សូមបញ្ជាក់ថា ចំពោះតម្លៃវិញ បំពង់បឺងប្រភេទស្ងួតមួយដើម មានតម្លៃ ៤,៣ សេន(ដុល្លារ) ឬស្មើនឹង ១៧០លុយរៀលខ្មែរ រីឯបំពង់បឺតប្រភេទស្រស់មួយដើម មានតម្លៃ ២,៦សេន(ដុល្លារ) ឬស្មើនឹង ១០៤លុយរៀលខ្មែរ៕
សូមទស្សនាវីដេអូខាងក្រោម ដែលត្រូវបានបង្ហោះលើទំព័រហ្វេសបុករបស់សារព័ត៌មាន Vietnam Express៖
Tag:
វៀតណាម
បរិស្ថាន
បា្លស្ទិក
© រក្សាសិទ្ធិដោយ thmeythmey.com