ប្រធានាធិបតីឡាវ ស្នើផ្តល់ការងារបន្ថែមដល់ពលរដ្ឋខ្លួនក្នុងគម្រោងផ្លូវដែកជាមួយចិន

អន្តរជាតិ

ប្រធានាធិបតីឡាវ ស្នើផ្តល់ការងារបន្ថែមដល់ពលរដ្ឋខ្លួនក្នុងគម្រោងផ្លូវដែកជាមួយចិន

08, Apr 2019 , 11:19 pm

រូបភាព

រូបថត៖ Vientiane Times

ដោយ:

ប្រធានាធិបតីឡាវ លោក Bounnhang Vorachit បានស្នើឲ្យផ្តល់ការងារបន្ថែមដល់ពលករឡាវ ក្នុងគម្រោងផ្លូវដែកជាមួយចិន។ ការអំពាវនាវនេះ ធ្វើឡើងអំឡុងពេលទស្សនកិច្ចរបស់លោកនៅការដ្ឋានផ្លូវដែកនេះក្នុងទីក្រុង វៀងចន្ទន៍ កាលពីទី៥ ខែមេសា។

គម្រោងផ្លូវដែកឡាវ-ចិនប្រវែង ៤១៤គីឡូម៉ែត្រនេះ លាតសន្ធឹងតាមបណ្តោយភាគខាងលិចប្រទេសឡាវ ចាប់ពីក្រុង Boten របស់ឡាវទៅកាន់ក្រុង Mohan របស់ចិន។ ផ្លូវដែកនេះ ឆ្លងកាត់ខេត្ត Oudomxay, លួង ព្រះបាង និងបញ្ចប់នៅរដ្ឋធានី វៀងចន្ទន៍។ យោងតាមរបាយការណ៍នៃគម្រោងនេះ បច្ចុប្បន្ននេះ មនុស្សប្រមាណ ១៦ ០០០នាក់ បំពេញការងារក្នុងគម្រោងសាងសង់ផ្លូវដែកនេះ ហើយ៤៥០០នាក់ ជាជនជាតិឡាវ។

យោងតាមការចុះផ្សាយរបស់សារព័ត៌មាន Vientiane Times លោកប្រធានាធិបតីឡាវ Bounnhang Vorachit គូសបញ្ជាក់ថា លោកចង់ឃើញពលរដ្ឋឡាវច្រើនបន្ថែមទៀតចូលមកធ្វើការក្នុងគម្រោងនេះ ខណៈគម្រោងនេះត្រូវការពលករជាច្រើននាក់ផ្សេងទៀត ខណៈពលរដ្ឋឡាវមានសមត្ថភាពចូលបម្រើការងារនេះបាន។

បើតាមប្រភពដដែល មេដឹកនាំរូបនេះ លើកឡើងទៀតថា កាលណាគម្រោងផ្លូវដែកនេះបញ្ចប់ការសាងសង់ហើយនោះ អ្នកដែលគ្រប់គ្រងនិងបើកប្រតិបត្តិការផ្លូវដែកនេះនាថ្ងៃអនាគត គឺជាពលករឡាវជំនាន់ក្រោយដែលធ្វើការក្នុងគម្រោងនេះ។

ផ្លូវដែក នឹងមិនត្រឹមតែផ្តល់ផលប្រយោជន៍ដល់ភាគីខាងរដ្ឋាភិបាលចិន និងឡាវប៉ុណ្ណោះទេ ប៉ុន្តែវាត្រូវធានាឲ្យបានថា ប្រជាជនឡាវនិងចិនអាចធ្វើការជាមួយគ្នាផងដែរ។ នេះបើតាមការបញ្ជាក់របស់លោក Bounnhang ដោយបន្ថែមទៀតថា គម្រោងផ្លូវដែកនេះ គឺជាចំណុចចាប់ផ្តើមមួយក្នុងសករាជថ្មីនៃកិច្ចសហប្រតិបត្តិការរវាងឡាវ និងចិន។

សូមបញ្ជាក់ថា គម្រោងផ្លូវដែកតម្លៃ ៥,៩៨៦ពាន់លានដុល្លារនេះ ស្ថិតក្នុងគម្រោងគំនិតផ្តួចផ្តើមផ្លូវ និងខ្សែក្រវាត់ (BRI) ដែលបានដាក់ចេញដោយប្រធានាធិបតីចិន ស៊ី ជិនភីង កាលពីឆ្នាំ២០១៣កន្លងទៅ។ ផ្លូវដែកនេះ គ្រោងបញ្ចប់ការសាងសង់ក្នុងឆ្នាំ២០២១ខាងមុខ។

គិតមកត្រឹមពេលនេះ លុយច្រើនជាង ១,៩៣ពាន់លានដុល្លារហើយ ត្រូវបានវិនិយោគក្នុងគម្រោងនេះ។ ការសាងសង់ផ្នែកផ្លូវថ្នល់ប្រមាណ៨៧ភាគរយ ត្រូវបានធ្វើរួចរាល់ ៥៤ភាគរយ ផ្នែកផ្លូវក្រោមដីត្រូវបានបញ្ចប់ការសាងសង់ និងប្រមាណ ៤៣ភាគរយនៃផ្នែកស្ពានត្រូវបានធ្វើរួចរាល់ផងដែរ។ ពីរដ្ឋធានីវៀងចន្ទន៍នៃប្រទេសឡាវ ផ្លូវដែកនេះនឹងរត់ឆ្លងកាត់ប្រទេសថៃ ម៉ាឡេស៊ី និងបញ្ចប់នៅឯប្រទេសសិង្ហបុរី៕