ជាតិ
លោក ហ៊ុន ម៉ានី នឹកអង្គរសង្ក្រាន្ត តែសប្បាយចិត្តពេលសង្ក្រាន្តរីកសាយភាយពេញប្រទេស
រូបថតពីហ្វេសប៊ុក_ព្រឹត្តិការណ៍អង្គរសង្ក្រាន្ត
×![]()
ដោយ: ថ្មីៗ
មិនមាន«អង្គរសង្ក្រាន្ត»ទៀតទេ តែមានសង្ក្រាន្តតាមខេត្ត ជាពិសេសសង្ក្រាន្តតាមសាលារៀន។ លោក ហ៊ុន ម៉ានី សប្បាយចិត្ត នៅពេលដែលឃើញពិធីសង្ក្រាន្តត្រូវបានរៀបចំយ៉ាងទូលំទូលាយ ដើម្បីផ្តល់ភាពរីករាយដល់ពលរដ្ឋខ្មែរ។
ក្រោយពីដឹកនាំរៀបចំពិធីអង្គរសង្ក្រាន្ត៦ឆ្នាំជាប់គ្នា ពោលគឺចាប់ពីឆ្នាំ២០១៣មក ក្នុងរយៈពេលនៃពិធីចូលឆ្នាំប្រពៃណីខ្មែរឆ្នាំ២០១៩នេះ លោក ហ៊ុន ម៉ានី នឹងបំពេញតាមការសន្យាជាមួយគ្រួសារ ដោយនាំពួកគេទៅកម្សាន្តនៅបរទេសម្តង។ នេះបើតាមការបញ្ជាក់របស់លោក ហ៊ុន ម៉ានី ប្រាប់សារព័ត៌មានថ្មីៗ។
សហភាពសហព័ន្ធយុវជនកម្ពុជាបានចេញផ្សាយសេចក្តីប្រកាសព័ត៌មានមួយក្នុងពេលកន្លងមក ដើម្បីបញ្ជាក់ថា វានឹងពុំមានការរៀបចំព្រឹត្តិការណ៍អង្គរសង្ក្រាន្តថ្នាក់ជាតិក្នុងឆ្នាំ២០១៩នេះឡើយ ហើយបានលើកទឹកចិត្តឱ្យសាខាអង្គការនេះនៅតាមបណ្តាខេត្តរៀបចំព្រឹត្តិការណ៍នេះនៅតាមខេត្តវិញ។
លោក ហ៊ុន ម៉ានី ដែលជាប្រធានសហភាពសហព័ន្ធយុវជនកម្ពុជា និងជាអ្នកដឹកនាំពិធីអង្គរសង្ក្រាន្តមួយរូប បានផ្តល់ការជឿជាក់ទៅលើការរៀបចំ ពិធីសង្ក្រាន្តនៅតាមបណ្តាខេត្ត ដែលអាចផ្តល់ពេលវេលាសប្បាយរីករាយដល់ប្រជាជននៅទីនោះបាន។
«តាមចិត្ត គឺ [ខ្ញុំ]នឹកអង្គរសង្ក្រាន្តណាស់។ តែក្នុងពេលជាមួយគ្នា ក៏មានការសាទរចំពោះសង្ក្រាន្តតាមខេត្តដែលមានការលូតលាស់ជាប្រចាំ។ ខ្ញុំជឿជាក់លើសមត្ថភាព និងការលះបង់របស់អ្នករៀបចំ ដើម្បីស្នាមញញឹម និងភាពរីករាយរបស់ប្រជាជនយើងក្នុងពេលចូលឆ្នាំប្រពៃណីជាតិ»។
យោងតាមសេចក្តីប្រកាសព័ត៌មានរបស់សហភាពសហព័ន្ធយុវជនកម្ពុជា ការរៀបចំព្រឹត្តិការណ៍អង្គរសង្ក្រាន្តនឹងត្រឡប់មកវិញក្នុងឆ្នាំខាងមុខ។
គួររំឭកថា នៅក្នុងព្រឹត្តិការណ៍អង្គរសង្ក្រាន្ត កម្ពុជាបានរៀបចំការបំបែកឯតទគ្គកម្មពិភពលោកចំនួនពីរនៅក្នុងឆ្នាំ២០១៥ គឺការរាំចង្វាក់ម៉ាឌីហ្សូនទ្រង់ទ្រាយធំជាមួយនឹងចំនួនមនុស្ស២០១៥នាក់ និងការធ្វើនំអន្សមយក្សទំងន់ ៤,០៤តោន។ ក្រៅពីនោះ ក៏មានការផលិតវត្ថុអត្តសញ្ញាណខ្មែរទំហំយក្សជាច្រើនទៀត ដូចជា ចាប៉ីយក្ស អង្រុតយក្ស មួកស្លឹកត្នោតយក្ស សំបុកពងមាន់យក្សជាដើម។
ព្រឹត្តិការណ៍នេះក៏បានជួយជំរុញកំណើនទេសចរ និងការផ្សព្វផ្សាយវប្បធម៌ និងវត្ថុសិល្បៈខ្មែរបុរាណដល់យុវជនជំនាន់ក្រោយយ៉ាងផុសផុលផងដែរ៕
Tag:
សង្ក្រាន្ត
© រក្សាសិទ្ធិដោយ thmeythmey.com
