ជាតិ
សង្គមជាតិ
សរសេរខ្មែរខុស នឹងកែមកត្រូវវិញ ដោយប្រើកម្មវិធីពិនិត្យអក្ខរាវិរុទ្ធខ្មែរ ដែលទើបបង្កើត
×![]()
ភ្នំពេញ៖ សមាគមអ្នកនិពន្ធខ្មែរបានបង្កើតកម្មវិធីថ្មីសន្លាងមួយ ដើម្បីត្រួតពិនិត្យអក្ខរាវិរុទ្ធតាមប្រព័ន្ធឌីជីថល សម្រាប់ឲ្យពលរដ្ឋបានប្រើប្រាស់ និងផ្ទៀងផ្ទាត់អក្ខរាវិរុទ្ធខ្មែរឲ្យបានត្រឹមត្រូវ និងលើកស្ទួយអក្សរសាស្ត្រខ្មែរឲ្យមានភាពទូលំទូលាយ។ ប្រធានសមាគមអ្នកនិពន្ធខ្មែរ លោក ព្រឿង ប្រណិត ប្រាប់សារព័ត៌មានថ្មីៗថា កម្មវិធីនេះមានសារៈសំខាន់សម្រាប់ក្រុមអ្នកសារព័ត៌មាន និងពលរដ្ឋក្នុងការសរសេរអក្សរខ្មែរនៅតាមបណ្តាញផ្សព្វផ្សាយនៅក្នុងសង្គម។ 
កម្មវីធីនេះអាចអនុញ្ញាតឲ្យពលរដ្ឋប្រើជា Web app ដោយមិនបាច់ Download គ្រាន់តែត្រូវមានអ៊ីនធឺណិត ប្រើជាបច្ចេកវិជ្ជា Big Data ដំណើរការពឹងផ្អែកលើទិន្នន័យពាក្យខ្មែរ ដែលចាប់ពីគេហទំព័រនានា ដោយស្វ័យប្រវត្តិ។ បច្ចុប្បន្ន កម្មវីធីនេះ បានដាក់ដំណើរការហើយ ដោយការកែពាក្យនីមួយៗគឺសុទ្ធតែយោងទៅតាមវចនានុក្រមខ្មែររបស់សម្តេចព្រះសង្ឃរាជ ជួន ណាត។ ជាក់ស្តែងកម្មវិធីនេះគឺសម្រាប់កែតែពាក្យណាដែលខុសប៉ុណ្ណោះ ចំណែកខ្លឹមសារ និងការប្រើប្រាស់វេយ្យាករណ៍ពុំមានការកែសម្រួលឡើយ។ នេះបើតាមការបញ្ជាក់របស់លោក ព្រឿង ប្រណិត ប្រធានសមាគមអ្នកនិពន្ធខ្មែរ។
កិច្ចការងារបង្កើតកម្មវិធីនេះ ជាគំនិតផ្គួចផ្តើមដោយសមាគមអ្នកនិពន្ធខ្មែររួមជាមួយអ្នកជំនាញផ្នែកអក្ខរសាស្ត្រខ្មែរ និងអ្នកជំនាញផ្នែកបច្ចេកវិជ្ជាទំនើប។ លោក ព្រឿង ប្រណិត ប្រធានសមាគមអ្នកនិពន្ធខ្មែរ ជឿជាក់ថាកម្មវិធីនេះ នឹងអាចជួយសម្រួលដល់កិច្ចការការងាររបស់អ្នកសារព័ត៌មានឲ្យមានភាពងាយស្រួល និងជៀសវាងការប្រើប្រាស់ខុស។ សម្រាប់នៅថ្ងៃអនាគត ក្រុមការងាររបស់លោកក៏នឹងបង្កើតជា App ដែលអាចប្រើជា App offline ដែលមានមុខងារស្រដៀងនឹង App វចនានុក្រមខ្មែរផងដែរ។
លោក ដាញ់ ហុង អ្នកសរសេរកូដកម្មវិធីពិនិត្យអក្ខរាវិរុទ្ធខ្មែរតាមប្រព័ន្ធឌីជីថល បានកត់សម្គាល់ថា ពលរដ្ឋខ្មែរខ្លះ មិនទាន់ឯកភាពគ្នា ក្នុងការប្រើប្រាស់ភាសាខ្មែរនៅឡើយទេ។ លោកបានបញ្ជាក់ថា កម្មវិធីនេះ នឹងកែតម្រូវពាក្យដែលសរសេរខុសឲ្យមកជាត្រូវវិញ តាមរយៈការវាយអក្សរលើតារាងនៅក្នុងកម្មវិធី Khmerwriters.com។
ចំណែក ប៉ា ច័ន្ទរឿន ប្រធានមជ្ឈមណ្ឌលទស្សនវិជ្ជាអនុវត្តនិងសីលធម៌កម្ពុជា បាននិយាយថា ការប្រើប្រាស់ភាសាខ្មែរនៅតាមប្រព័ន្ធអ៊ីនធឺណិត ឬតាមអនឡាញមានការកើនឡើងខ្លាំង ប៉ុន្តែបើតាមប្រព័ន្ធទំនាក់ទំនងក្នុងបណ្តាញសង្គម ដូចជាហ្វេសប៊ុក ឬអ៊ីម៉ែល នៅមិនទាន់មានវិសាលភាពនោះទេ។
«ខ្ញុំសង្កេតឃើញថា មានក្រុមហ៊ុនឯកជននានាជ្រើសរើសបុគ្គលិក គឺសុទ្ធតែឲ្យប្រើឯកសារបំពេញការងារ និងសម្ភាសជាភាសាបរទេស ដូច្នេះជាហេតុដែលធ្វើឲ្យពួកគេពិបាកនឹងទទួលបានការងារនោះណាស់។ ម្ចាស់ក្រុមហ៊ុននោះខ្វះការយកចិត្តទុកដាក់លើការប្រើប្រាស់ភាសាខ្មែររបស់ខ្លួនឯង»»។ នេះជាការបញ្ជាក់របស់លោក ប៉ា ច័ន្ទរឿន។
ដើម្បីឲ្យភាសាខ្មែរមានវឌ្ឍនភាព លោក ជំរុញឲ្យពលរដ្ឋខ្មែរត្រឡប់មកប្រើប្រាស់ភាសាខ្មែរឲ្យបានច្រើន និងត្រួតពិនិត្យពាក្យពេចន៍ឲ្យបានត្រឹមត្រូវ៕
Tag:
សមាគមអ្នកនិពន្ធខ្មែរ
អក្ខរាវិរុទ្ធខ្មែរ
ប្រព័ន្ធឌីជីថល
© រក្សាសិទ្ធិដោយ thmeythmey.com
