ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
យើងទាំងអស់គ្នាសុទ្ធតែអាចប្រឈមមុខនឹងបញ្ហាស្ទះសរសៃឈាមដែលបង្កើនហានិភ័យនៃជំងឺផ្សេងៗគួរអោយព្រួយបារម្ភ រួមបញ្ចូលទាំងជំងឺស្ទះសរសៃឈាមបេះដូង និងជំងឺដាច់សរសៃឈាមខួរក្បាល។ បញ្ហាស្ទះសរសៃឈាមជាញឹកញយបណ្ដាលមកពីរបៀបនៃការរស់នៅមិនត្រឹមត្រូវ ដោយសារកង្វះសកម្មភាពរាងកាយ និងរបបអាហារគ្មានសុខភាពល្អ។ ជាតិខ្លាញ់ និងកូឡេស្តេរ៉ូលអាចកកើតឡើងនៅក្នុងសរសៃឈាមដែលបណ្ដាលឲ្យសរសៃឈាមរួមតូចកកស្ទះ។ បញ្ហានេះ គឺអាចបង្កជាជំងឺស្ទះសរសៃឈាមដែលនឹងកាត់បន្ថយលំហូរឈាមនៅក្នុងសរសៃឈាមអាកទែ។ ប៉ុន្តែកុំបារម្ភ ក៏ព្រោះអ្នកអាចសម្អាតសរសៃឈាមបានយ៉ាងមានប្រសិទ្ធិភាព ដោយគ្រាន់តែផ្លាស់ប្ដូររបៀបរបបនៃការរស់នៅ និងរបបអាហារប្រចាំថ្ងៃ។ 
ខាងក្រោមនេះយើង នឹងបង្ហាញឱ្យដឹងពីអាហារមួយចំនួនដែលអ្នកគួររួមបញ្ចូលក្នុងរបបអាហារប្រចាំថ្ងៃ ដើម្បីសម្អាតសរសៃឈាមទប់ស្កាត់ការស្ទះ ៖
១. ផ្លែទម្លាប់
សារធាតុ polyphenols និងសារធាតុប្រឆាំងអុកស៊ីតកម្មផ្សេងទៀតដែលមានក្នុងផ្លែទម្លាប់ជួយកាត់បន្ថយជាតិខ្លាញ់ទ្រីគ្លីសេរីដ និងកម្រិតនៃកូឡេស្តេរ៉ូលមិនល្អក្នុងរាងកាយទប់ស្កាត់បញ្ហាស្ទះសរសៃឈាម។ ផ្លែឈើនេះក៏មានផ្ទុកសម្បូរទៅដោយជាតិសរសៃផងដែរ។
២. ផ្លែបឺរ
ទោះបីជា ផ្លែបឺរ គឺមានផ្ទុកសម្បូរទៅដោយជាតិខ្លាញ់ ប៉ុន្តែជាប្រភេទនៃជាតិខ្លាញ់ល្អ ហើយអាចជួយធ្វើឲ្យកម្រិតជាតិកូឡេស្តេរ៉ូលល្អមានភាពប្រសើរឡើង ដោយកាត់បន្ថយកម្រិតនៃជាតិកូឡេស្តេរ៉ូលមិនល្អ។ កម្រិតកូឡេស្តេរ៉ូលត្រឹមត្រូវក្នុងឈាមអាចជួយបំបាត់ការស្ទះក្នុងសរសៃឈាម។ ផ្លែបឺរ ក៏ជាប្រភពនៃវីតាមីន E ដែលអាចបញ្ឈប់អុកស៊ីតកម្មនៃកូឡេស្តេរ៉ូលផងដែរ។ ដូច្នេះចូរព្យាយាមទទួលទានផ្លែបឺរម្ខាងរាល់ថ្ងៃជាប្រចាំ ដើម្បីជៀសផុតពីបញ្ហាស្ទះសរសៃឈាម។
៣. ផ្កាខាត់ណាខៀវ ឬប្រូខូលី
មានផ្ទុកសម្បូរទៅដោយវីតាមីន K ដែលទប់ស្កាត់ការកកស្ទះនៃសរសៃឈាម។ ផ្កាខាត់ណាខៀវ ក៏ជាប្រភពដ៏ល្អបំផុតមួយនៃជាតិសរសៃដែលជួយកម្ចាត់កូឡេស្តេរ៉ូលមិនល្អដែលបង្កហានិភ័យនៃបញ្ហាបេះដូងផ្សេងៗបានយ៉ាងប្រសើរផងដែរ។
៤. ប្រេងអូលីវ
មិនមែនខ្លាញ់គ្រប់ប្រភេទសុទ្ធតែអាក្រក់ចំពោះសុខភាពឡើយ! ហើយប្រេងអូលីវជាប្រភពដ៏ប្រសើរនៃជាតិខ្លាញ់ល្អ monounsaturated ដែលមានប្រសិទ្ធិភាពកាត់បន្ថយហានិភ័យនៃបញ្ហាស្ទះសរសៃឈាម។
៥. តែបៃតង
តែបៃង ជួយរារាំងការស្រូបយកជាតិកូឡេស្តេរ៉ូលនៅពេលវាត្រូវបានរំលាយ។ ការទទួលទានតែបៃតងយ៉ាងហោចណាស់ ២ ពែងជាប្រចាំ គឺសម្អាតសរសៃឈាមបានយ៉ាងឆាប់រហ័សក្នុងរយៈពេលត្រឹមតែប៉ុន្មានសប្តាហ៍ប៉ុណ្ណោះ។
៦. ខ្ទឹមស
ខ្ទឹមមានផ្ទុកសម្បូរទៅដោយសារធាតុប្រឆាំងអុកស៊ីតកម្មអាចជួយកម្ចាត់រ៉ាឌីកាល់សេរីដែលនាំឲ្យមានការស្ទះក្នុងសរសៃឈាម។ ដូច្នេះចូរព្យាយាមទទួលទានខ្ទឹមស ១ ឬ ២កំពឹស រៀងរាល់ព្រឹកនៅពេលពោះទទេ ឬរួមបញ្ចូលវាទៅក្នុងអាហារផ្សេងៗរបស់អ្នក៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
