អន្តរជាតិ
ថៃ ត្រៀមចាយជាង៤លានដុល្លារទប់ស្កាត់ជំងឺប៉េស្តជ្រូកអាហ្វ្រិក រូប៖ AFP
× គណៈរដ្ឋមន្ត្រីថៃ បានអនុម័តកញ្ចប់ថវិកា១៤៨លានបាត(៤,៦៥លានដុល្លារ) សម្រាប់អនុវត្តវិធានការទប់ស្កាត់ការឆ្លងរាលដាលជំងឺប៉េស្តជ្រូកអាហ្វ្រិក។ នេះបើយោងតាមការបញ្ជាក់របស់រដ្ឋមន្ត្រីកសិកម្មថៃ នៅថ្ងៃទី៩ មេសា។
រដ្ឋមន្ត្រីក្រសួងកសិកម្មថៃ លោក Grisada Boonrach បានគូសបញ្ជាក់ថា គណៈរដ្ឋមន្ត្រីបានយល់ព្រមដាក់បញ្ចូលបញ្ហានេះទៅក្នុងរបៀបវារៈជាតិ និងអនុម័តកញ្ចប់ថវិកាសម្រាប់អនុវត្តវិធានការចាំបាច់ក្នុងគោលដៅទប់ស្កាត់នឹងការឆ្លងរាលដាលនៃជំងឺប៉េស្តជ្រូកអាហ្វ្រិក។
យោងតាមការចុះផ្សាយរបស់សារព័ត៌មាន Bangkok Post កញ្ចប់ថវិកានេះ នឹងត្រូវបែងចែកជាបីដំណាក់កាលក្នុងកញ្ចប់ថវិកាជាតិប្រចាំឆ្នាំ ចាប់ពីឆ្នាំ២០១៩ ដល់ ឆ្នាំ២០២១។ សម្រាប់ឆ្នាំ២០១៩ ចំណាយ៥៣,៦លានបាត (១,៦៨លានដុល្លារ)។ សម្រាប់ឆ្នាំ២០២០ ចំណាយ៥២,៤លានបាត (១,៦៤លានដុល្លារ)។ សម្រាប់ឆ្នាំ២០២១ ចំណាយ៤២,៥លានបាត (១,៣លានដុល្លារ)។
កញ្ចប់ថវិកាទាំងជាង៤លានដុល្លារនេះ នឹងត្រូវប្រើប្រាស់ដើម្បីអនុវត្តវិធានការសម្រាប់តាមដានជំងឺប៉េស្តជ្រូកអាហ្វ្រិក និងធ្វើឡដុតកម្ទេចជ្រូកដែលងាប់ដោយសារជំងឺនេះ។ ទាក់ទិននឹងគម្រោងធ្វើឡ លោករដ្ឋមន្ត្រីកសិកម្មថៃ Grisada បានពន្យល់ថា ជំងឺប៉េស្តជ្រូកអាហ្វ្រិកនៅតែអាចឆ្លងរាលដាលបាន ប្រសិនបើសត្វជ្រូកដែលឆ្លងជំងឺនេះត្រូវគេយកទៅកប់ក្នុងដីនោះ។ ដូច្នេះវានឹងមានសុវត្ថិភាពជាងមុន ប្រសិនបើដុតជ្រូកដែលងាប់ដោយសារជំងឺប្រភេទនេះនៅក្នុងឡពិសេសនោះ។
បើតាមប្រភពព័ត៌មានដដែល លោក Grisada លើកឡើងទៀតថា ក្រសួងកសិកម្ម បានសម្រេចចិត្តដាក់ស្នើវិធានការទាំងនេះ ក្រោយពីជំងឺនេះឆ្លងរាលដាលទៅដល់ប្រទេសចំនួន១៨ហើយ ចាប់តាំងពីឆ្នាំ២០១៨មក ក្នុងនោះរួមមាន ១០ប្រទេសក្នុងតំបន់អឺរ៉ុប ៤ប្រទេសនៅអាហ្វ្រិក និង៤ប្រទេសផ្សេងទៀតនៅអាស៊ី។
មកទល់នឹងពេលនេះ ជំងឺប៉េស្តជ្រូកអាហ្វ្រិក កើតឡើង១១៣ករណីក្នុងខេត្តចំនួន២៨នៅប្រទេសចិន ២២១ករណីក្នុងខេត្តចំនួន១៧នៅវៀតណាម និងមួយករណីនៅកម្ពុជា។ នេះបើតាមការបញ្ជាក់របស់លោក Grisada ដោយបន្ថែមថា ចាប់តាំងពីវីរុសប្រភេទនេះ ត្រូវបានរកឃើញនៅក្នុងបណ្តាប្រទេសជិតខាងថៃមក ក្រសួងកសិកម្មមានការព្រួយបារម្ភថា វីរុសនេះ នឹងឆ្លងរាលដល់ចូលទៅក្នុងប្រទេសថៃ ដែលជាមូលហេតុនាំឲ្យក្រសួងស្នើសុំថវិកាដើម្បីអនុវត្តវិធានការទប់ស្កាត់បែបនេះ។
យោងតាមក្រសួងកសិកម្មថៃ ប្រទេសថៃ មានកសិករចិញ្ចឹមជ្រូកជាង ២១ម៉ឺននាក់៕
Tag:
ថៃ
ជំងឺប៉េស្តជ្រូកអាហ្វ្រិក
© រក្សាសិទ្ធិដោយ thmeythmey.com