ជាតិ
ចិន នឹងបង្កើតរោងចក្រផលិតសម្ភារសិក្សា និងកីឡានៅកម្ពុជា លោកប៉ាន សូរស័ក្តិ រដ្ឋមន្រី្តក្រសួងពាណិជ្ជកម្ម រូមជាមួយ អ្នកវិនិយោគនៅក្នុងខេត្តសានស៊ី នៃប្រទេសចិន ( រូបបានពីក្រសួងពាណិជ្ជកម្ម)
× ភ្នំពេញ៖ អ្នកវិនិយោគមកពីប្រទេសចិន នឹងបង្កើតរោងចក្រផលិតសម្ភារសិក្សា និងកីឡានៅកម្ពុជា ដើម្បីផ្គត់ផ្គង់តម្រូវការទីផ្សារក្នុងស្រុក និងនាំចេញទៅកាន់ទីផ្សារអន្តរជាតិសំខាន់ៗ។
ក្នុងជំនួបពិភាក្សាការងារជាមួយលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា នោះលោក វ៉ាង លីពីង (Wang Liping) ប្រធានក្រុមហ៊ុន GuangBo Group បានសន្យាពិនិត្យលទ្ធភាពពង្រីកការវិនិយោគមកកម្ពុជា នាពេលឆាប់ៗខាងមុខ ដើម្បីតភ្ជាប់ទំនាក់ទំនងពាណិជ្ជកម្មប្រទេសទាំងពីរ ក្រោមក្របខណ្ឌខ្សែក្រវ៉ាត់មួយ និងផ្លូវមួយ ដើម្បីបង្កើតឱកាសការងារ និងប្រាក់ចំណូលជូនប្រជាពលរដ្ឋខ្មែរ ។ ជាពិសេសការអភិវឌ្ឍកំណើនសេដ្ឋកិច្ច ជាមួយរាជរដ្ឋាភិបាលកម្ពុជា។
ឆ្លើយតបគោលបំណងរបស់ក្រុមហ៊ុនចិននេះ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បាននិយាយថា រាជរដ្ឋាភិបាលបានលើកកម្ពស់បរិយាកាសធុរកិច្ច និងវិនិយោគ តាមរយៈការកាត់បន្ថយសកម្មភាពការិយាធិបតេយ្យ ,ការសាងហេដ្ឋារចនាសម្ព័ន្ធរូបវន្ត ,ការបណ្តុះបណ្តាលធនធានមនុស្ស ,ការចងក្រង និងធ្វើវិសោធនកម្មច្បាប់ថ្មីៗ សំដៅគាំទ្រការអភិវឌ្ឍវិស័យឯកជន និងពង្រឹងឧត្តមភាពប្រកួតប្រជែងរបស់កម្ពុជា។
ក្នុងជំនួបពិភាក្សាការងារ កាលពីថ្ងៃទី៩មេសា ឆ្នាំ២០១៩ លោក ប៉ាន សូរស័ក្តិ បាននិយាយដូច្នេះ៖ «កម្ពុជាមានតំបន់សេដ្ឋកិច្ចពិសេសចំនួន១៩ កំពុងធ្វើប្រតិបត្តិការសម្រាប់ផ្តល់ឱ្យវិនិយោគិន បើករោងចក្រ ដើម្បីទទួលបានការលើកលែងពន្ធលើប្រាក់ចំណេញ៩ឆ្នាំ អាចគ្រប់គ្រងភាគហ៊ុន ១០០ភាគ រយ។ លើសពីនេះអាចនាំចេញផលិតផលទៅកាន់ទីផ្សារក្នុងតំបន់អាស៊ាន អាមេរិក និងសហគមន៍អឺរ៉ុប នៅក្រោមកម្មវិធីអនុគ្រោះពន្ធថែមទៀត»។
បើតាមរដ្ឋមន្ត្រីពាណិជ្ជកម្ម សក្តានុពលនៃទីតាំងភូមិសាស្ត្រ ,គោលនយោបាយគាំពារវិនិយោគ គោលនយោបាយអភិវឌ្ឍឧស្សាហកម្ម ,គម្រោង Plus One នៅតាមតំបន់សេដ្ឋកិច្ចពិសេស និងការលើកទឹកចិត្តផ្សេងៗរបស់រាជរដ្ឋាភិបាលកម្ពុជា វាជាអនុគ្រោះដ៏សមរម្យសម្រាប់វិនិយោគិនបរទេស។នេះបើយោងតាមហ្វេសប៊ុកក្រសួងពាណិជ្ជកម្ម៕
© រក្សាសិទ្ធិដោយ thmeythmey.com