ជាតិ
សម្ដេច ស ខេង ស្នើឲ្យក្រសួងពាក់ព័ន្ធ ពិនិត្យមើលទីតាំងអាជីវកម្មសិន មុននឹងផ្ដល់អាជ្ញាបណ្ណ ដើម្បីកុំឲ្យប៉ះពាល់សណ្ដាប់ធ្នាប់
× ភ្នំពេញ៖ កន្លែងអាជីវកម្មមួយចំនួន កំពុងបង្កបញ្ហាកកស្ទះចរាចរណ៍ ដែលតម្រូវឲ្យអាជ្ញាធរពាក់ព័ន្ធទាងអស់ ត្រូវចូលរួមដោះស្រាយ។ នេះជាការលើកឡើងរបស់រដ្ឋមន្ត្រីក្រសួងមហាផ្ទៃ។
សម្ដេច ស ខេង ដែលបានមើលឃើញពីបញ្ហាកកស្ទះចរាចរណ៍នេះ បានសង្កត់ថា កន្លែងភោជនីយដ្ឋាន និងទីតាំងផ្ដល់សេវាផ្សេងៗខ្លះ មានទីធ្លារតូចៗ ហើយខ្វះកន្លែងចំណតយានយន្តគ្រប់គ្រាន់ បែរយកផ្លូវសាធារណៈ ធ្វើជាកន្លែងសម្រាប់ចតយានយន្តរបស់ភ្ញៀវទៅវិញ។ ការបំពានរបស់ម្ចាស់អាជីវកម្មទាំងនេះ គឺជាមូលហេតុដែលនាំឲ្យមានបញ្ហាកកស្ទះចរាចរណ៍។
ដោយសារមើលឃើញចំណុចនេះ រដ្ឋមន្ត្រីក្រសួងមហាផ្ទៃ ឲ្យក្រសួងពាក់ព័ន្ធ ពិនិត្យមើលទីតាំងអាជីវកម្មសិន មុននឹងផ្ដល់អាជ្ញាបណ្ណឲ្យម្ចាស់អាជីវកម្មដំណើរការរកស៊ី ដើម្បីកុំឲ្យប៉ះពាល់សណ្ដាប់ធ្នាប់ចរាចរណ៍សាធារណៈ។
ថ្លែងក្នុងកិច្ចប្រជុំត្រួតពិនិត្យលទ្ធផលការងារសុវត្ថិភាពចរាចរណ៍ផ្លូវគោក ប្រចាំត្រីមាសទី១ ឆ្នាំ២០១៩ សម្ដេច ស ខេង រដ្ឋមន្ត្រីក្រសួងមហាផ្ទៃ បាននិយាយថា៖«ដូចខ្ញុំធ្លាប់និយាយហើយគឺថា អ្នកដែលផ្ដល់ច្បាប់អនុញ្ញាតអាជ្ញាបណ្ណឲ្យបើកសណ្ឋាគារនៅជាប់ផ្លូវ ហើយអត់មានធ្វើកន្លែងចត។ ភោជនីយដ្ឋាន ក្នុងផ្លូវមួយប្រហែលកន្លះគីឡូ មានភោជនីយដ្ឋាន៤ទៅ៥ កន្លែង ប៉ុន្តែអត់មានរកដំណោះស្រាយចតឡានទេ។ តែគាត់មានភ្ញៀវប្រហែល៥០នាក់ ឡាននៅពេញហ្នឹងបណ្ដោយ វាកកស្ទះបាត់ហើយ»។
អមជាមួយការលើកឡើងនេះ ប្រមុខក្រសួងមហាផ្ទៃ អះអាងថា អាជ្ញាធរមានសមត្ថកិច្ច បានខិតខំដោះស្រាយបញ្ហាចរាចរណ៍នេះ ប៉ុន្តែវានៅតែកើតមាន ដែលតម្រូវឲ្យមានការយកចិត្តទុកដាក់ពីគ្រប់ភាគីពាក់ព័ន្ធបន្ថែមទៀត៕
© រក្សាសិទ្ធិដោយ thmeythmey.com