ជាតិ
សង្គមជាតិ
ចាប់ប៉េអឹមសក្តិបួនកន្លះម្នាក់ និងគ្នីគ្នាពីរនាក់ទៀត ពាក់ព័ន្ធនឹងគ្រឿងញៀន
× កម្លាំងពីអគ្គស្នងការនគរបាលជាតិ បានចុះទៅចាប់កងរាជអាវុធហត្ថម្នាក់ឈ្មោះ ហោ រ៉ាពិណាត ដែលមានឋានន្តរសក្តិជាវរសេនីយ៍ទោ (សក្តិបួនកន្លះ) និងមានតំណែងជានាយរងការិយាល័យហិរញ្ញវត្ថុនៃកងរាជអាវុធហត្ថលើផ្ទៃប្រទេស រួមទាំងបក្សពួកពីរនាក់ទៀត កាលពីយប់ថ្ងៃទី៩ ខែមេសា ឆ្នាំ២០១៩ នៅខណ្ឌច្បារអំពៅ ដោយសង្ស័យថាពាក់ព័ន្ធនឹងបទល្មើសគ្រឿងញៀន។
ឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិ បានប្រាប់សារព័ត៌មានថ្មីៗថា ជានីតិវិធី ជនសង្ស័យទាំងបី ត្រូវបញ្ជូនទៅតុលាការ ព្រោះសមត្ថកិច្ច មិនអាចទុកពួកគេ ឲ្យលើសពី៤៨ម៉ោងឡើយ។ លោក មិនបានបញ្ជាក់ទេថា ជនសង្ស័យពីរនាក់ទៀត ជាកងរាជអាវុធហត្ថដែរឬយ៉ាងណា។ អ្នកនាំពាក្យរូបនេះ និយាយថា «ខ្ញុំ មិនបានសួរពីអត្តសញ្ញាណរបស់ពួកគេទេ។ យើង មិនខ្វល់ថាជាអ្នកណាទេ ឲ្យតែខុសច្បាប់ គឺចាប់ហើយ»។
សារព័ត៌មានថ្មីៗ មិនអាចសុំការបកស្រាយពីអ្នកនាំពាក្យកងរាជអាវុធហត្ថលើផ្ទៃប្រទេសបានឡើយ ដោយសារតែហៅទូរសព្ទមិនចូល។
កន្លងមក នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ធ្លាប់ដាស់តឿនកងរាជអាវុធហត្ថ ឲ្យចៀសពីគ្រឿងញៀន។
ចំណែក សម្តេចនាយករដ្ឋមន្ត្រី ហ៊ុន សែន ទើបនឹងព្រមានថា ទោះជាមានលុយ មានអំណាច និងពាក់ដល់លោកខែក៏ដោយ ក៏ត្រូវតែចាប់ដែរ ឲ្យតែពាក់ព័ន្ធនឹងគ្រឿងញៀន។ ការព្រមានរបស់សម្តេចនាយករដ្ឋមន្ត្រី គឺធ្វើឡើងបន្ទាប់ពីសមត្ថកិច្ចចាប់ឧកញ៉ា គិត ធាង ម្ចាស់ក្លិបរ៉ក់ (Rock) ដែលត្រូវបានបិទចោល ដោយសារលួចនាំចូលគ្រឿងញៀន៕
© រក្សាសិទ្ធិដោយ thmeythmey.com