ភ្នំពេញ៖ ពលករ និងនិស្សិតខ្មែរមួយចំនួន ដែលកំពុងរស់នៅបរទេសក្នុងការបំពេញការងារ និងសិក្សា បានបង្ហាញក្តីនឹករឭកដល់ស្រុកកំណើតយ៉ាងខ្លាំង ពិសេសនឹកគ្រួសារ សាច់ញាតិ និងមិត្តភក្តិ ស្របពេលដែលពិធីបុណ្យចូលឆ្នាំខ្មែរ ប្រពៃណីជាតិចូលមកដល់។ ពួកគេនឹកគិតដល់ការជួបជុំគ្នាជាមួយឪពុក-ម្តាយ បងប្អូន មិត្តភក្តិ ទៅវត្តជុំគ្នា និងការលេងល្បែងប្រជាប្រិយជាដើម។
លោក ប្រាក់ ដារ៉ា ជាពលករខ្មែរមួយរូប ដែលធ្វើការងារផ្នែកឧស្សាហកម្មនៅសាធារណរដ្ឋកូរ៉េខាងត្បូងអស់រយៈពេលជិត២ឆ្នាំមកហើយ។ លោកបានចាកចេញពីកម្ពុជានៅចុងឆ្នាំ២០១៧។ ដារ៉ា បាននិយាយប្រាប់សារព័ត៌មានថ្មីៗថា លោកពិតជានឹកដល់ស្រុកកំណើត ឪពុកម្តាយ បងប្អូន មិត្តភក្តិ និងគូដណ្តឹងខ្លាំងណាស់។ អ្នកខេត្តកណ្តាលរូបនេះ កាន់តែមានអារម្មណ៍ក្តុកក្តួល និងនឹកផ្ទះទ្វេដង នៅពេលដែលរដូវចូលឆ្នាំខ្មែរបានដល់មក។
លោកប្រាក់ ដារ៉ា ជាពលករខ្មែរទៅធ្វើការងារនៅប្រទេសកូរ៉េខាងត្បូង
និយាយដោយសំឡេងតិចៗនិងអួលដើមក បុរសវ័យ២៧ឆ្នាំរូបនេះ បានរៀបរាប់ដូច្នេះ« សម្រាប់ឆ្នាំនេះគឺជាឆ្នាំទីពីរហើយ ដែលខ្ញុំមិនបានជួបជុំជាមួយក្រុមគ្រួសារ និងមិនបានចូលរួមអបអរសាទរបុណ្យចូលឆ្នាំខ្មែរយើងជាមួយពួកគាត់។ ខ្ញុំពិតជាឯកា កំសត់ និងច្រណែនគេណាស់ នៅពេលឃើញមិត្តភក្តិកំពុងសប្បាយជាមួយគ្រួសារគេ មិត្តភក្តិគេ លេងល្បែងកម្សាន្តប្រពៃណីក្នុងវត្តនានា ខណៈពេលដែលខ្ញុំត្រូវបំពេញការងារឱ្យគេរហូតដល់ឆ្នាំ២០២០»។
បើតាមលោក ប្រាក់ ដារ៉ា ក្នុងអំឡុពេលបុណ្យចូលឆ្នាំខ្មែរ នៅប្រទេសកូរ៉េ ក៏មានកន្លែងមួយចំនួនរៀបចំកម្មវិធីរាំលេងកម្សាន្ត និងលេងល្បែងប្រពៃណីខ្មែរ ជារៀងរាល់ឆ្នាំផងដែរ។ ប៉ុន្តែលោកមិនបានទៅចូលរួមទេ ព្រោះទីតាំងប្រារព្ធពិធីទាំងនោះ ឆ្ងាយពីកន្លែងធ្វើការនិងរស់នៅពេក។
ចំពោះក្តីនឹករលឹក ភាពចង់ជួបមុខក្រុមគ្រួសារ មិត្តភក្តិ និងចង់លេងល្បែងប្រជាប្រិយក្នុងឱកាសបុណ្យចូលឆ្នាំខ្មែរ ក៏បានកើតឡើងចំពោះកញ្ញា លី សុជាតា ដែលជាពលករមួយរូបកំពុងធ្វើការងារនៅប្រទេសកូរ៉េផងដែរ។ រូបភាពអនុស្សាវរីយ៍ និងរឿងសប្បាយៗមួយចំនួន ក្នុងថ្ងៃចូលឆ្នាំខ្មែរ បានឃ្លាតពី សុជាតា ជាងពីរឆ្នាំមកហើយ។ សុជាតា បញ្ជាក់ថា៖«គ្មាននរណាម្នាក់ដែលមិនចង់ជួបជុំគ្រួសាររបស់ខ្លួននោះទេ។ ខ្ញុំពិតជាចង់ចូលរួមប្រារព្ធពិធីបុណ្យចូលឆ្នាំខ្មែរជាមួយគ្រួសារណាស់ ប៉ុន្តែខ្ញុំមិនអាចចូលរួមបាន។ ខ្ញុំពិតជាសោកស្តាយខ្លាំងណាស់»។
ដើម្បីរំសាយចិត្តនឹកដល់ស្រុកកំណើត កញ្ញា សុជាតា ត្រៀមចូលរួមជួបជុំសិស្ស-និស្សិត ពលករ ដែលកំពុងសិក្សានៅប្រទេសកូរ៉េ ដែលខាងសមាគមរៀបចំពិធីបុណ្យចូលឆ្នាំខ្មែរ នៅថ្ងៃទី១៤ ខែមេសានេះ។
រីឯកញ្ញា សួន ស្រីនាង និស្សិតខ្មែរមួយរូបកំពុងសិក្សាលើជំនាញសារព័ត៌មាន និងទូរគមនាគមន៍នៅប្រទេសឥណ្ឌូណេស៊ីវិញ ក៏មានអារម្មណ៍ស្រងេះស្រងោចចិត្ត ដែលមិនបានជួបជុំគ្រួសារនៅចូលឆ្នាំខ្មែរនេះ ។ ស្រីនាង ដែលទើបចាកចេញពីកម្ពុជា ប្រមាណជាងមួយខែ ដើម្បីបន្តការសិក្សានេះ ពិតជាពិបាកធ្វើចិត្តខ្លាំងណាស់ ហើយពេលខ្លះ ស្រីនាង ក៏លួចយំផងដែរ នៅពេលគិតដល់ថ្ងៃចូលឆ្នាំ ដែលឃើញតែស្នាមដានអនុស្សាវរីយ៍ជួបជុំគ្រួសារនៅចំពោះមុខ។
កញ្ញា សួន ស្រីនាង កំពុងសិក្សាលើជំនាញ សារព័ត៌មាន នៅប្រទេសឥណ្ឌូនេស៊ី
«រាល់ឆ្នាំខ្ញុំបានចូលរួមជាមួយគ្រួសារក្នុងពិធីបុណ្យចូលខ្មែរ ប៉ុន្តែឆ្នាំនេះខ្ញុំមិនបានចូលរួមជាពួកគាត់ទៅវិញ។ ខ្ញុំពិតជាមានអារម្មណ៍ក្តុកក្តួល និងបានយំជាច្រើនដង ពេលឃើញគេជួបជុំគ្រួសារ ហើយអ្វីដែលធ្វើឱ្យខ្ញុំកាន់រំជួលចិត្តខ្លាំងនោះ គឺពេលឃើញសាលារៀននីមួយៗបានធ្វើសង្ក្រាន្តដើម្បីស្វាគមន៍ឆ្នាំថ្មី»។ នេះជារៀបរាប់របស់ ស្រីនាង។
មធ្យោបាយតែមួយគត់ ដែលស្រីនាង អាចកាត់បន្ថយការនឹកក្រុមគ្រួសារនោះ គឺការទូរសព្ទ ឬ Video Call តាមបណ្ដាញសង្គម មកគ្រួសារ និងសាច់ញាតិបងប្អូន ដើម្បីបន្ធូរអារម្មណ៍ក្រៀមក្រំខ្លួន។ នេះជាអ្វីដែលស្រីនាង ប្រាប់សារព័ត៌មានថ្មីៗ៕