ជាតិ
សេដ្ឋកិច្ច
ត្រីមាសដំបូងឆ្នាំ២០១៩ វិស័យសំណង់កើនឡើងខ្ពស់ ជាពិសេស គម្រោងបុរី ផ្ទះល្វែង និងវីឡាកូនកាត់ រូបថត AFP
× វិស័យសំណង់ដែលត្រូវបានអនុម័តនាខែមករា និងកុម្ភៈ ក្នុងឆ្នាំ២០១៩នេះ មានទំហំប្រមាណ ១.៣៦ ពាន់លានដុល្លារអាមេរិក។ ការវិនិយោគសរុបក្នុងវិស័យសំណង់នៅក្នុងប្រទេសកម្ពុជាត្រូវប៉ាន់ស្មានថាអាចនឹងឈានដល់ ១.៨ ពាន់លានដុល្លារអាមេរិក ដែលស្មើនឹងការកើនឡើងចំនួន ៩៣ ភាគរយ បើធៀបនឹងត្រីមាសក្នុងឆ្នាំ២០១៨។ នេះបើយោងតាមរបាយការណ៍ប្រចាំត្រីមាសទី១ ឆ្នាំ២០១៩ របស់ ភ្នាក់ងារអចលនទ្រព្យកម្ពុជា CBRE។
វិស័យបុរីមានក៏មានសន្ទុះគួរឲ្យកត់សម្គាល់ផងដែរ ដែលភាគច្រើនវិនិយោគដោយក្រុមហ៊ុនក្នុងស្រុក ដែលស្ថិតនៅក្នុង ខណ្ឌ សែន សុខ មានចំនួន៤៥ គម្រោង, ខណ្ឌឫស្សីកែវមានចំនួន ៣១គម្រោង, ខណ្ឌមានជ័យ មានចំនួន ២៤គម្រោង និងខណ្ឌច្បារអំពៅមានចំនួន ២៣គម្រោង។ គម្លាតរវាងតម្លៃលក់នៃលំនៅដ្ឋានបុរី នៅក្នុងរាធានីភ្នំពេញមានភាពខុសគ្នាអាស្រ័យទៅតាមទំហំ និងទីតាំងនៃផ្ទះ។
ចំពោះផ្ទះល្វែង និងវីឡាកូនកាត់ ដែលស្ថិតនៅក្នុងតំបន់ជាយក្រុងមានតម្លៃមធ្យមប្រមាណ ១០១,១៤៤ ដុល្លារ សម្រាប់ផ្ទះល្វែង និងផ្ទះវីឡាកូនកាត់មានតម្លៃប្រមាណ ១០៨, ៥០៥ ដុល្លារ។ ចំណែកឯផ្ទះល្វែងដែលស្ថិតក្នុងតំបន់អាជីវកម្មមានតម្លៃ ២០២,៧៧៥ ក្នុងមួយល្វែង។ សម្រាប់ផ្ទះវីឡាភ្លោះមានតម្លៃប្រមាណ ២៦២,៤៧២ ដុល្លារ និងផ្ទះវីឡាមានតម្លៃប្រមាណ ៧៨៩,៦២៩ ដុល្លារ។
តាមរយៈរបាយការណ៍ដដែលនេះបានបង្ហាញទៀតថា គម្រោងបុរីថ្មីៗ ដែលនឹងត្រូវចូលមកកាន់ទីផ្សារនារយៈពេល៣ឆ្នាំខាងមុខ ភាគច្រើនស្ថិតនៅក្នុង ខណ្ឌជ្រោយចង្វារ ខណ្ឌពោធិ៍សែនជ័យ និងខណ្ឌមានជ័យ។
ដោយឡែកវិស័យខុនដូមានការកើនឡើង៧.៦៩ ភាគរយ បើធៀបនឹងត្រីមាសមុន ហើយចំពោះតម្លៃលក់គឺមានការកើនឡើងតិចតួច គឺប្រមាណ ០.៤ ភាគរយប៉ុណ្ណោះ ក្នុងដើមឆ្នាំ២០១៩នេះ។ ចំពោះអគារការិយាល័យសម្រាប់ជួលមានការកើនឡើងប្រមាណ២.៧ ភាគរយ ធៀបនឹងត្រីមាសមុន ប៉ុន្តែតម្លៃនៃការជួលមិនមានការប្រែប្រួលគួរឲ្យកត់សម្គាល់នោះទេ៕
© រក្សាសិទ្ធិដោយ thmeythmey.com