អន្តរជាតិ
ឥណ្ឌូណេស៊ី, ម៉ាឡេស៊ី ព្រមានពិនិត្យឡើងវិញទំនាក់ទំនងជាមួយ EU ខណៈទីផ្សារដូងប្រេងខ្លួនប្រឈមនឹងការបិទ
× រដ្ឋាភិបាលក្រុងហ្សាកាតា និងក្រុងកូឡាឡាំពួរ បានដាក់លិខិតផ្លូវការទៅកាន់ក្រុងព្រុចសែល ដោយបង្ហាញការមិនពេញចិត្ត និងជំទាស់ដាច់ខាតលើគោលនយោបាយចុងក្រោយរបស់សហភាពអឺរ៉ុបដែល រឹតត្បិតផលិតផលដូងប្រេងខ្លួន។ រដ្ឋាភិបាលទាំងពីរ ជាថ្មីម្តងទៀត បានព្រមានតទល់ជាមួយ EU តាមរយៈអង្គការពាណិជ្ជកម្មពិភពលោក។
តាមរយៈលិខិតផ្លូវការរួមចុះថ្ងៃ៥ មេសាកន្លងទៅ ដែលជាសេចក្តីថ្លែងការណ៍ថ្មីបំផុតរបស់ប្រទេសផលិតដូងប្រេងធំបំផុតរបស់ពិភពលោកទាំងពីរ លោកប្រធានាធិបតី ចូកូ វីដូដូ និងលោកនាយករដ្ឋមន្ត្រី មហាធៀ មហាម៉ាត់ បានគូសបញ្ជាក់ពីផលប៉ះពាល់ខ្លាំងពីផែនការសហភាពអឺរ៉ុប និងថែមទាំងគំរាមតបតវិញតាមរយៈវិធានការពាណិជ្ជកម្មផងដែរ។
តាមការចុះផ្សាយរបស់សារព័ត៌មានឥណ្ឌូណេស៊ី Jakarta Globe មេដឹកនាំទាំងពីរ បានលើកឡើងយ៉ាងដូច្នេះ៖ «ប្រសិនបើបទបញ្ញត្តិចូលជាធរមាន រដ្ឋាភិបាលរបស់ពួកយើង នឹងពិនិត្យឡើងវិញលើទំនាក់ទំនងជាមួយនឹងសហភាពអឺរ៉ុបជារួម ក៏ដូចជាសមាជិករបស់សហភាពអឺរ៉ុបផង។ ក្នុងនោះរាប់បញ្ចូលទាំង ការពិនិត្យលើភាពជាដៃគូចរចា, កិច្ចសន្យាដេញថ្លៃ និងការនាំចូលសំខាន់ៗពីសហភាពអឺរ៉ុបផងដែរ»។
លិខិតដដែលនោះ បានបន្តថា រដ្ឋាភិបាលទាំងពីរ នឹងប្រឈមជាមួយនឹងបទបញ្ញត្តិនេះតាមរយៈយន្តការដោះស្រាយវិវាទរបស់អង្គការពាណិជ្ជកម្មពិភពលោក និងអង្គការពាក់ព័ន្ធផ្សេងទៀត ដ្បិតបទបញ្ញត្តិនេះ បានប្រឆាំងនឹងផលិតផលដូងប្រេងយ៉ាងពិតប្រាកដ។ រដ្ឋាភិបាលទាំងពីរ ថែមទាំងចោទគោលនយោបាយថ្មីនេះ ថាប៉ះពាល់ដល់កាត់បន្ថយភាពក្រីក្រ ដែលជាគោលដៅអភិវឌ្ឍប្រកបដោយចីរភាពរបស់អង្គការសហប្រជាជាតិ។
អ្វីដែលគួរឲ្យកត់សម្គាល់នោះ តាមរយៈលិខិតផ្លូវការរួមលើដំបូងនេះ មេដឹកនាំទាំងពីរ បានលើកឡើងត្រង់ថា ច្បាប់ ឬបទបញ្ញត្តិថ្មីរបស់សហភាពអឺរ៉ុប មានចរិតលក្ខណៈនយោបាយ និងទំនោរទៅរកការគាំពារនិយម ជាជាងការសម្រេចចិត្តបែបវិទ្យាសាស្ត្រ។ សម្រាប់រដ្ឋាភិបាលទាំងពីរ នេះ គឺជាយុទ្ធសាស្ត្រសេដ្ឋកិច្ច និងនយោបាយដកចេញផលិតផលដូងប្រេងចេញពីទីផ្សារសហភាពអឺរ៉ុបតែម្តង។
សូមជម្រាបផងដែរថា នៅឆ្នាំ២០១៨កន្លងទៅ សហភាពអឺរ៉ុប បានអនុម័តច្បាប់ថ្មីមួយពាក់ព័ន្ធនឹងការដោះស្រាយបញ្ហាប្រែប្រួលអាកាសធាតុ។ តាមរយៈច្បាប់ថ្មីនោះ សហភាពអឺរ៉ុប បានសម្រេចចាប់ផ្តើមរឹតត្បិតលើមុខទំនិញពាក់ព័ន្ធទាំងឡាយណាដែលប៉ះពាល់ដល់បរិស្ថាន ដែលត្រូវអនុវត្តពីឆ្នាំ២០១៩នេះតទៅ និងកាត់បន្ថយបរិមាណនាំចូលជាបន្តបន្ទាប់នៅឆ្នាំ២០២៣ និងឈានទៅដល់ការបិទការនាំចូលតែម្តងនៅក្នុងឆ្នាំ២០៣០។ ផលិតផលដូងប្រេង ដែលកន្លងមកត្រូវបានអឺរ៉ុបនាំចូល និងប្រើប្រាស់ជាប្រេងឥន្ធនៈ គឺជាគោលដៅចម្បងមួយដែលត្រូវហាមឃាត់ផងដែរ៕
Tag:
ឥណ្ឌូណេស៊ី
ម៉ាឡេស៊ី
© រក្សាសិទ្ធិដោយ thmeythmey.com