អន្តរជាតិ
×![]()
ដោយ: គី ចំណា
ការវាយប្រហារលើកំពង់ផែ Pearl Harbor កោះហាវ៉ៃពីសំណាក់ជប៉ុនឆ្នាំ ១៩៤១ បង្ខំឲ្យអាមេរិកចូលប្រឡូកក្នុងសង្គ្រាមលោកលើកទីពីរ។ អ្វីដែលគួរឲ្យកត់សម្គាល់ ក្នុងពេលប្រយុទ្ធ ជប៉ុនក៏បានប្រើប្រាស់យុទ្ធសាស្ត្រយោធាដ៏ចម្លែកតាមរយៈការបើកយន្តហោះធ្វើអត្តឃាត ក្នុងគោលបំណងយកប្រៀបលើទាហានអាមេរិក។
គេហទំព័រ history.com បានពន្យល់ថា កម្លាំងទ័ពរបស់ភាគីជប៉ុនជួបបញ្ហាជាច្រើនក្នុងពេលធ្វើសង្គ្រាមដែលក្នុងនោះមានសព្វាវុធ ធនធានសម្រាប់ទ្រទ្រង់ការវាយលុក និងទិន្នន័យអំពីការប្រយុទ្ធសំខាន់ៗដទៃទៀត។ ដោយសារហេតុនេះ ក្នុងថ្ងៃទី ២៥ ខែតុលា ឆ្នាំ១៩៤៤ ជប៉ុនបានសម្រេចឲ្យមានការវាយលុកបែបថ្មីមួយដែលពិភពលោកមិនអាចនឹកស្មានដល់។ វាត្រូវបានប្រជាជនជប៉ុនដាក់ឈ្មោះថា Kamikaze ឬ ជាភាសាអង់គ្លេសថា «Divine Wind»។
យុទ្ធសាស្ត្រវាយប្រហារផ្លូវការអាកាសថ្មីនោះ គឺអ្នកបើកយន្តហោះភ្ជាប់ខ្លួនជាមួយគ្រាប់បែកដោយបើកតម្រង់នាវាចម្បាំងសំខាន់ៗ របស់សត្រូវជាពិសេសសហរដ្ឋអាមេរិកតែម្តង។ ទាហានជប៉ុនបានសម្លាប់ខ្លួនឯងដោយមិនញញើតឡើយ ដើម្បីឲ្យប្រទេសរបស់ខ្លួនមានប្រៀបក្នុងពេលសង្គ្រាម។
អ្នកបើកនាវាជប៉ុនកាលពីសម័យនោះ លោក Motoharu Okamura បាននិយាយថា៖ «ខ្ញុំជឿជាក់ថា មធ្យោបាយតែមួយគត់ដែលអាចបង្វិលទិសដៅសង្គ្រាមមកកាន់ការចង់បានរបស់យើងគឺ ការប្រើប្រាស់យុទ្ធសាស្ត្រយន្តហោះអត្តឃាត។ ដោយធ្វើដូចនេះ មានមនុស្សជាច្រើនសុខចិត្តចូលរួមដើម្បីការពារប្រទេសជាតិរបស់គេ»។
នៅក្នុងសង្គ្រាមឆ្នេរ Leyte ទាហានកាមីកាហ្ស៊ីជប៉ុនជាង៥០០០ នាក់បានបូជាជីវិត ដើម្បីពន្លិចនាវាអាមេរិកអស់៣៤គ្រឿង។ ទាហានអាមេរិក និងអង់គ្លេសប្រមាណ៣០០០នាក់បានស្លាប់ដោយសារយុទ្ធសាស្ត្ររបស់ជប៉ុនមួយនេះ។ ទោះបីជាយ៉ាងនេះក្តី ក៏អាមេរិកមិនបានចុះចាញ់ ក្នុងសង្គ្រាមប្រឆាំងប្រទេសជប៉ុនដែរ។ អាមេរិកបានយកជ័យជម្នះក្នុងការកាន់កាប់តំបន់ជាច្រើនក្នុងមហាសមុទ្រប៉ាស៊ីហ្វិក៕
© រក្សាសិទ្ធិដោយ thmeythmey.com
