សៀមរាប៖ ស្រុកបន្ទាយស្រីមានភាពល្បីល្បាយតាមរយៈប្រាសាទបន្ទាយស្រី ដែលទាក់ទាញទេសចរឆ្ងាយជិតឱ្យមកទស្សនា។ ផលិតផលដែលគេស្គាល់ថាជាអត្ដសញ្ញាណរបស់ស្រុកនេះ រួមមានស្ករត្នោត និងនំបញ្ចុកប្រដាក់។ ឆ្នាំនេះ ស្រុកបន្ទាយស្រីក៏បានរៀបចំព្រឹត្តិការណ៍សង្ក្រាន្តនឹងគេដែរ គឺបន្ទាយស្រីសង្ក្រាន្ត ដែលមានការរៀបចំកម្មវិធីជាច្រើន ក្នុងនោះមានដូចជាស្ករផែនយក្សជាដើម។ អភិបាលស្រុកបន្ទាយស្រីបានឱ្យដឹងថា បន្ទាប់ពីជោគជ័យនៃការរៀបចំសង្ក្រាន្តឆ្នាំនេះដោយមានស្ករផែនយក្សហើយនោះ នៅឆ្នាំក្រោយស្រុកបន្ទាយស្រីនឹងរៀបចំនំបញ្ចុកយក្សវិញម្ដង ក្នុងព្រឹត្តិការណ៍បន្ទាយស្រីសង្ក្រាន្ត។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកស្រី អ៊ីសា រ៉ហានី ពីខេត្តសៀមរាបដូចតទៅ
គេសង្កេតឃើញថា ការរៀបចំកម្មវិធីសង្ក្រាន្តធំៗបានរីកសាយភាយតាមបណ្ដាខេត្តស្ទើរពេញប្រទេស បន្ទាប់ពីព្រឹត្តិការណ៍អង្គរសង្ក្រាន្ត បានផ្អាកការរៀបចំនៅឆ្នាំនេះ។ ក្រៅពីការរៀបចំតាមបណ្ដាខេត្តធំៗហើយនោះ នៅខេត្តសៀមរាបឯណេះវិញ មានការរៀបចំទាំងនៅក្នុងក្រុងដែលរៀបចំដោយរដ្ឋបាលខេត្ត សហការជាមួយសហភាពសហព័ន្ធយុវជនខេត្ត នៅស្រុកបន្ទាយស្រីឯណោះវិញ ក៏បានរៀបចំក្នុងទ្រង់ទ្រាយសមរម្យផងដែរ។
ពេលមុនៗដែលមានអង្គរសង្ក្រាន្ត អ្នកស្រុកបន្ទាយស្រីក៏ដូចជាតាមបណ្ដាស្រុកជុំវិញខេត្តសៀមរាប តែងឡើងមកលេងក្នុងព្រឹត្តិការណ៍នេះ ឯតាមស្រុកហាក់រៀងស្ងាត់។ ខុសពីមុន ឆ្នាំនេះអ្នកស្រុកបន្ទាយស្រីក៏មាន បន្ទាយស្រីសង្ក្រាន្តដែរ ដែលរៀបចំឡើងដោយរដ្ឋបាលស្រុក សហការជាមួយក្រុមយុវជន។
លោក ណុប វុធ្ធី អភិបាលស្រុកបន្ទាយស្រី ពេលកំពុងត្រៀមទទួលទេវតាឆ្នាំថ្មីនៅបរិវេណប្រារព្ធកម្មវិធីបន្ទាយស្រីសង្ក្រាន្តបានឱ្យដឹងថា ឆ្នាំនេះហាក់ប្លែកបន្ដិចសម្រាប់អ្នកបន្ទាយស្រី ព្រោះមានកម្មវិធីធំក្នុងភូមិស្ថានរបស់ខ្លួន។ លោកបន្ថែមថា បំណងសំខាន់នៃការរៀបចំព្រឹត្តិការណ៍នេះគឺដើម្បីសាមគ្គីភាព និងឱ្យពលរដ្ឋបានដឹងពីទំនៀមទម្លាប់ប្រពៃណីដ៏ផូរផង់របស់ដូនតាខ្មែរ។ ជាងនេះទៅទៀតនោះ ស្រុកបន្ទាយស្រីជាស្រុកមានសក្កានុពលមួយដែលទេសចរតែងស្គាល់ជាទូទៅនៅសំណង់ប្រាសាទបន្ទាយស្រី ដូច្នេះរដ្ឋបាលស្រុកចង់ផ្សព្វផ្សាយពីភូមិសាស្ដ្រស្រុកនេះឱ្យទេសចរកាន់តែស្គាល់បន្ថែមទៀតតាមរយៈការរៀបចំព្រឹត្តិការណ៍មួយនេះ។
តាមរយៈអ្នកចូលរួមត្រឹមថ្ងៃទីមួយ លោកអភិបាលស្រុកបន្ទាយស្រីមើលឃើញថា មានការចូលរួមច្រើនហួសពីការរំពឹងទុករបស់ក្រុមការងារ។ កម្មវិធីក្នុងព្រឹត្តិការណ៍បន្ទាយស្រីសង្ក្រាន្ត រួមមានកម្មវិធីប្រពៃណីសាសនា ល្បែងប្រជាប្រិយ តំបន់ត្រជាក់ចិត្ត ពិសេសគឺមានការរៀបចំស្ករផែនយក្ស។ ការផលិតស្ករផែននេះ គឺប្រើទឹកត្នោតចំនួន ១,១១៩លីត្រ ដែលរំងាស់បានស្ករផែនទម្ងន់ ១,០១៩គីឡូក្រាម។
លោក វ៉ាន់ឆៃ ដែលបានចូលរួមក្នុងព្រឹត្តិការណ៍បន្ទាយស្រីសង្ក្រាន្តដែរនោះយល់ថា ការរៀបចំពិធីនៅតាមស្រុកគឺជាការល្អប្រសើរ ដើម្បីបង្ហាញពីភាពសម្បូរបែបរបស់ស្រុកបន្ទាយស្រីដែលមានដំណាំធម្មជាតិចម្រុះដែលដាំដោយកសិករខ្មែរ។ សម្រាប់លោក វ៉ាន់ឆៃ ជាការប្លែកភ្នែកម្យ៉ាងដែរសម្រាប់អ្នកស្រុកបន្ទាយស្រី ដើម្បីផ្សព្វផ្សាយពីភាពល្បីល្បាញរបស់ស្រុកនេះបន្ថែមទៀតដល់ទេសចរបានដឹង ក្រៅពីប្រាសាទស្រុកបន្ទាយស្រីក៏មានសក្កានុពលលើវិស័យផ្សេងទៀតផងដែរ។
ជាមួយគ្នានេះ លោក វ៉ាន់ឆៃ គាំទ្រឱ្យបណ្ដាស្រុកដទៃទៀតចេះរៀបចំសង្ក្រាន្តដូចស្រុកបន្ទាយស្រីដែរ ដើម្បីកាត់បន្ថយការកម្សាន្តទៅតំបន់ឆ្ងាយៗ និងមានឱកាសឱ្យប្រជាពលរដ្ឋបង្ហាញពីវប្បធម៌ និងអារ្យធម៌ខ្លួនដល់អ្នកខាងក្រៅបានដឹង និងចូលរួម។
ស្រីរ័ត្ន គឺជាយុវជនស្រុកបន្ទាយស្រី ដែលចូលរួមផលិតស្ករផែនយក្ស។ ស្រីរ័ត្នថា នាងពិតជារីករាយណាស់ដែលមានឱកាសចូលរួមរៀបចំព្រឹត្តិការណ៍នេះជាមួយក្រុមការងារ ហើយការផលិតស្ករផែន ក៏ដើម្បីបង្ហាញពីអត្ដសញ្ញាណរបស់ស្រុកបន្ទាយស្រីនេះផងដែរ។ ឆ្នាំនេះ ស្រីរ័ត្នសង្កេតឃើញថា អ្នកភូមិនៅជួបជុំគ្នាល្អ ដោយសារមានកម្មវិធីធំក្នុងភូមិរបស់ខ្លួន ដោយឡែកឆ្នាំមុនៗពួកគេចេញទៅលេងក្នុងព្រឹត្តិការណ៍អង្គរសង្ក្រាន្ត។
រីឯ សុភីវិញ ក៏សប្បាយរីករាយមិនខុសពីស្រីរ័ត្នប៉ុន្មានដែរ។ ជាយុវជនស្ម័គ្រចូលរួមផលិតស្ករផែនមួយរូប សុភីថា ចង់ឱ្យមានការរៀបចំព្រឹត្តិការណ៍នេះនៅឆ្នាំក្រោយៗទៀតដើម្បីភាពសប្បាយរីករាយក្នុងភូមិ។ មានកម្មវិធីច្រើនក្នុងព្រឹត្តិការណ៍បន្ទាយស្រីសង្ក្រាន្ត តែសុភីចាប់អារម្មណ៍កម្មវិធីស្ករផែនយក្សជាងគេ ព្រោះថាក្រុមការងារនាងជាអ្នកអ្នកចំនៅទីនេះ។ នាងថា ទម្រាំចេញស្ករផែនយក្សនេះបាន ក្រុមការងាររបស់ខ្លួននឿយហត់គ្រប់គ្នា និងប្រើពេលពេញមួយថ្ងៃកូរទឹកត្នោតចេញជាស្ករ។
ជាឆ្នាំដំបូងក្នុងការរៀបចំបន្ទាយស្រីសង្ក្រាន្ត និងមានការគាំទ្រច្រើន លោក ណុប វុធ្ធី អភិបាលស្រុកបានបង្ហើបឱ្យដឹងថា ឆ្នាំក្រោយបន្ទាយស្រីសង្ក្រាន្តនឹងរៀបចំទៀត និងមានកម្មវិធីពិសេស គឺការផលិតនំបញ្ចុកយក្សវិញម្ដង។ លោកអភិបាលស្រុកមិនទាន់លម្អិតពីគម្រោងនេះទេ តែថានំបញ្ចុកជាអត្ដសញ្ញាណមួយរបស់ស្រុកបន្ទាយស្រី ដែលនំបញ្ចុករបស់អ្នកភូមិប្រដាក់មានភាពល្បីល្បាញពីសំណាក់ទេសចរទូទៅដែលមកកម្សាន្តខេត្តសៀមរាប៕