អន្តរជាតិ
លោក មហាធៀ៖ ការអភិវឌ្ឍប្រទេសជាតិ គួរដើរទន្ទឹមគ្នាជាមួយការអភិរក្សបរិស្ថាន
រូបថត៖ Bernama
×![]()
នាយករដ្ឋមន្ត្រីម៉ាឡេស៊ី មហាធៀ មហាម៉ាត់ និយាយថា ម៉ាឡេស៊ី នឹងមិនអាចជោគជ័យក្លាយជាប្រទេសអភិវឌ្ឍបានទេ ប្រសិនបើបរិស្ថានត្រូវទុកចោលឲ្យបាត់បង់ហើយនោះ។ មេដឹកនាំចាស់វស្សារូបនេះ លើកឡើងថា ខណៈកំពុងប្រឹងប្រែងអភិវឌ្ឍប្រទេសជាតិ ម៉ាឡេស៊ី មិនគួរភ្លេចពីសារសំខាន់នៃការរក្សា និងអភិរក្សាបរិស្ថាននោះឡើយ។ 
នៅក្នុងពិធីអបអរទិវាផែនដី កាលពីថ្ងៃទី២០ មេសា លោក មហាធៀ មហាម៉ាត់ ផ្ញើសារយ៉ាងច្បាស់មួយថា ការអភិរក្សធម្មជាតិ និងបរិស្ថានសម្រាប់ប្រជាជនជំនាន់នេះ ក៏ដូចជាប្រជាជនជំនាន់ក្រោយ គឺជាទំនួលខុសត្រូវរបស់បុគ្គល និងសហគមន៍ទាំងមូល។ ហើយទំនួលខុសត្រូវនេះ នឹងត្រូវអនុវត្តទៅមុខជានិច្ច ទោះស្ថិតក្នុងកាលៈទេសៈណាក៏ដោយ។ នេះយោងតាមការចុះផ្សាយរបស់ទីភ្នាក់ងារព័ត៌មាន Bernama ។
«យើងមើលឃើញ ឥទ្ធិពលនៃការអភិវឌ្ឍដែលគ្មានតុល្យភាព ដោយផ្តោតសំខាន់តែលើផលចំណេញតែមួយមុខ»។ នេះជាការបញ្ជាក់របស់លោក មហាធៀ ដោយបន្ថែមថា ម៉ាឡេស៊ី នឹងមិនអាចទទួលស្គាល់ជាប្រទេសអភិវឌ្ឍន៍បានទេ ប្រសិនបើម៉ាឡេស៊ីមានតែអគារខ្ពស់ៗកប់ពពក ប៉ុន្តែព្រៃឈើត្រូវបានកាប់ទន្ទ្រាន ចំណែកទឹក និងខ្យល់ត្រូវបានបំពុលហើយនោះ។
និយាយបែបផ្សេង លោក មហាធៀ គូសបញ្ជាក់ថា ម៉ាឡេស៊ី អាចក្លាយជាប្រទេសអភិវឌ្ឍន៍បាន លុះត្រាតែខ្លួនអាចមានតុល្យភាពរវាងការអភិវឌ្ឍហេដ្ឋារចនាសម្ព័ន្ធ និងការអភិរក្សធម្មជាតិបៃតង និងបរិស្ថានដែលមានស្រាប់របស់ខ្លួន។
ស្របពេលដែលទិវាផែនដី Earth Day នឹងត្រូវប្រារព្ធធ្វើឡើងជាសកលនៅថ្ងៃទី២២ ខែមេសា លោក មហាធៀ គូសបញ្ជាក់ថា ការយល់ដឹងពីការគាំពារបរិស្ថាន គួរតែត្រូវអនុវត្ត និងចែករំលែកដោយមនុស្សគ្រប់រូបនៅទូទាំងពិភពលោក។ សូមបញ្ជាក់ដែរថា ពិធីសាទរទិវាផែនដីរបស់ម៉ាឡេស៊ី ត្រូវបានធ្វើឡើងនៅក្នុងសួនព័ទ្ធដោយព្រៃជាង២៦ហិកតាមួយឈ្មោះថា Taman Tugu ដែលស្ថិតក្នុងបេះដូងនៃទីក្រុង កូឡាឡាំពួរ៕
Tag:
ម៉ាឡេស៊ី
មហាធៀមហាម៉ាត់
បរិស្ថាន
© រក្សាសិទ្ធិដោយ thmeythmey.com
