អន្តរជាតិ
អតីតប្រធានាធិបតីវៀតណាមស្លាប់នៅវ័យ៩៩ឆ្នាំ
× ឧត្តមសេនីយ៍ Le Duc Anh អតីតប្រធានធិបតីវៀតណាម ដឹកនាំដឹកនាំទ័ពវៀតណាមជួយប្រជាជនកម្ពុជាផ្តួលរំលំនៃរបបខ្មែរក្រហមនោះ បាត់បង់ជីវិតក្នុងអាយុ ៩៩ឆ្នាំ។
កើតក្នុងឆ្នាំ១៩២០ លោក Le Duc Anh បានចំណាយពេលស្ទើរមួយជីវិតលោកនៅវៀតណាមភាគខាងត្បូង ទីដែលលោកបានចូលប្រឡូកក្នុងសង្គ្រាមប្រឆាំងបារាំង និងសហរដ្ឋអាមេរិក។ បើតាមទីភ្នាក់ងារព័ត៌មានរដ្ឋ Vietnam News លោក បាត់បង់ជីវិតកាលពីយប់ថ្ងៃចន្ទទី ២២ មេសា ដោយសារជំងឺប្រចាំកាយ និងចាស់ជរា។
លោក Le Duc Anh បានកាន់តំណែងជារដ្ឋមន្ត្រីការពារជាតិវៀតណាម ចាប់ពីឆ្នាំ១៩៨៧ ដល់ ១៩៩១ និងក្រោយមក បានកាន់តំណែងជាប្រធានាធិបតីចាប់ពីឆ្នាំ១៩៩២ ដល់ខែកញ្ញា ឆ្នាំ១៩៩៧។ ក្នុងអាណត្តិដឹកនាំ លោក Anh បានដើរតួនាទីយ៉ាងសំខាន់ក្នុងការសម្របសម្រួលទំនាក់ទំនងរវាងវៀតណាម ជាមួយចិន និងសហរដ្ឋអាមេរិក។
តួយ៉ាង ក្នុងឆ្នាំ១៩៩៥ លោក បានក្លាយជាប្រមុខរដ្ឋវៀតណាមទីមួយបង្អស់ ជាន់លើទឹកដីអាមេរិក ក្រោយពីសង្គ្រាមវៀតណាមបញ្ចប់កាលពីឆ្នាំ១៩៧៥ កាលនោះលោកបានចូលរួមខួបលើកទី៥០ឆ្នាំនៃអង្គការសហប្រជាជាតិក្នុងបុរី ញូវយ៉ក។ នេះបើតាមទីភ្នាក់ងារព័ត៌មាន AFP ។
ទទួលការអប់រំនៅអតីតសហភាពសូវៀត និងបានបាត់បង់ភ្នែកម្ខាងផងនោះ អតីតប្រមុខរដ្ឋវៀតណាមរូបនេះ បានកាន់តំណែងកំពូលៗមួយចំនួនអំឡុងសង្គ្រាមវៀតណាម៕
លោក Le Duc Anh នាជំនួបជាមួយសម្តេចព្រះវររាជបិតា នរោត្តម សីហនុ នៅក្រុងហាណូយ កាលពីឆ្នាំ១៩៩៥។ រូបថត AFP
Tag:
វៀតណាម
ខ្មែរក្រហម
Le Duc Anh
© រក្សាសិទ្ធិដោយ thmeythmey.com