អន្តរជាតិ
អតីតបុគ្គលិកក្រសួងការបរទេសបានសារភាពកំហុសពីបទលាក់បាំងការទាក់ទងនឹងចិន
×![]()
ដោយ: VOA
ក្រសួងយុត្តិធម៌បានប្រកាសកាលពីថ្ងៃពុធថា អតីតបុគ្គលិកក្រសួងការបរទេសអាមេរិកដែលត្រូវបានចោទប្រកាន់ពីបទលាក់បាំងការទាក់ទងជាច្រើនជាមួយប្រទេសចិនបានសារភាពកំហុសតាមការចោទប្រកាន់ពីបទសមគំនិតដើម្បីលួចព័ត៌មានរដ្ឋាភិបាលអាមេរិក។
អ្នកស្រី Claiborne បានទទួលកំហុសនៅតុលាការរដ្ឋធានីវ៉ាស៊ីនតោន។
លោក John Demers ឧបការីរដ្ឋមន្ត្រីយុត្តិធម៌បាននិយាយថា អ្នកស្រី Candace Marie Claiborne វ័យ៦៣ឆ្នាំបានលក់ព័ត៌មានសម្ងាត់និងព័ត៌មានអសាធារណៈរបស់រដ្ឋាភិបាលយកលុយសុទ្ធនិងអំណោយពីភ្នាក់ងារបរទេស ដែលអ្នកស្រីដឹងថា ធ្វើការឲ្យសេវាស៊ើបការណ៍សម្ងាត់ឲ្យប្រទេសចិន។
អ្នកស្រី Claiborne បានចាប់ផ្តើមធ្វើការនៅក្រសួងការបរទេសក្នុងឆ្នាំ១៩៩៩ ហើយបានធ្វើការនៅក្រុងប៉េកាំងនិងក្រុងសៀងហៃ។ អ្នកស្រីបានឆ្លងកាត់ការត្រួតពិនិត្យសន្តិសុខកំពូល ហើយត្រូវបានតម្រូវឱ្យរាយការណ៍អំពីបណ្តាញទាក់ទងបរទេស។
រដ្ឋអាជ្ញាបាននិយាយថា ភ្នាក់ងារស៊ើបការណ៍សម្ងាត់របស់ចិនបានឱ្យលុយអ្នកស្រីរាប់ពាន់ដុល្លារជាអំណោយរយៈពេលជាង៥ឆ្នាំជាថ្នូរនឹងការ«ចម្លងឯកសារផ្ទៃក្នុងរបស់ក្រសួងការបរទេសស្តីពីប្រធានបទចាប់ពីយុទ្ធសាស្ត្រសេដ្ឋកិច្ចសហរដ្ឋអាមេរិករហូតដល់ទស្សនកិច្ចរបស់ឥស្សរជនប្រទេសទាំងពីរ» ។
អ្នកស្រី Claiborne នឹងត្រូវកាត់ទោសនៅថ្ងៃទី៩ ខែកក្កដាឆ្នាំ២០១៩។ អ្នកស្រីអាចប្រឈមនឹងទោសជាប់ពន្ធនាគាររហូតដល់៥ឆ្នាំ៕
© រក្សាសិទ្ធិដោយ thmeythmey.com
