មេប៉ូលិសស្រីលង្កាមិនព្រមចុះចេញ ទោះជាប្រធានាធិបតីចុចឈ្មោះឲ្យលាលែងក៏ដោយ

អន្តរជាតិ

មេប៉ូលិសស្រីលង្កាមិនព្រមចុះចេញ ទោះជាប្រធានាធិបតីចុចឈ្មោះឲ្យលាលែងក៏ដោយ

29, Apr 2019 , 9:19 pm

រូបភាព

មេប៉ូលិសជាតិស្រីលង្កា Pujith Jayasundara ។ រូបភាព AFP

ដោយ: តន ចាន់រិទ្ធារ៉ា

មេប៉ូលិសជាតិស្រីលង្កា Pujith Jayasundara បានបដិសេធចុះចេញពីតំណែងរបស់ខ្លួន ដើម្បីជាការទទួលខុសត្រូវចំពោះការវាយប្រហារគ្រាប់បែកកាលពីថ្ងៃទី២១ ខែមេសាកន្លងទៅ។ លោក Jayasundara ត្រូវបានលោកប្រធានាធិបតី Maithripala Sirisena បង្គាប់ឲ្យលាលែងពីតំណែង ព្រោះមិនអាចទប់ស្កាត់ការវាយប្រហារដ៏បង្ហូរឈាមនៅក្នុងសណ្ឋាគារ និងវិហារគ្រិស្តសាសនាជាច្រើនកន្លែង ទាំងដឹងពីផែនការមុនក្ដី។

ប្រធានាធិបតីស្រីលង្កា Maithripala Sirisena កាលពីថ្ងៃទី២៦ ខែមេសា បានបញ្ជាឲ្យអធិការប៉ូលិសជាតិលោក Pujith Jayasundara លាលែងពីតំណែងដើម្បីរ៉ាប់រងកំហុសដែលនាំឲ្យមានការវាយប្រហារបំផ្ទុះគ្រាប់បែកសម្លាប់មនុស្សច្រើនជាង៣០០រយនាក់កាលពីថ្ងៃទី២១ ខែមេសា។ យ៉ាងណាមិញ មកទល់ថ្ងៃទី២៩ ខែមេសា លោក Jayasundara បានមិនបានចុះចេញពីតំណែងតាមការបង្គាប់របស់ប្រធានាធិបតីឡើយ។

ស្ថានការណ៍ក្បាលម៉ាស៊ីនផ្នែកសន្តិសុខរបស់ស្រីលង្កា កំពុងច្របូកច្របល់ខ្លាំងក្រោយហេតុការណ៍ថ្ងៃទី២១ ខែមេសា ដ្បិតប៉ូលិសបានដឹងពីគម្រោងវាយប្រហារនេះ តែមិនធ្វើសកម្មភាពទប់ស្កាត់ទៅវិញ ហើយបណ្ដោយឲ្យមនុស្សជាច្រើនបាត់បង់ជីវិត និងរងរបួស។ លោក Sirisena បានទម្លាក់កំហុសលើមេប៉ូលិសជាតិ និងមន្ត្រីជាន់ខ្ពស់នៅក្រសួងការពារជាតិ ព្រោះមន្ត្រីចារកម្មដឹងពីបញ្ហានេះ តែមិនបានប្រាប់រូបលោក និងនាយករដ្ឋមន្ត្រី Ranil Wickremesinghe ទៅទៀត។

តាមពិតទៅ ប្រធានាធិបតីស្រីលង្ការូបនេះ បានអះអាងថា មេប៉ូលិសជាតិខាងលើបានសម្រេចចិត្តលាលែងពីតំណែងហើយ។ ប៉ុន្តែមន្ត្រីស្រីលង្កានិយាយថា លោក Jayasundara មិនបានដាក់ពាក្យសុំលាលែងឡើយ ហើយបន្តស្នាក់នៅផ្ទះរដ្ឋដដែល។ នេះបើតាមការផ្សាយរបស់ទីភ្នាក់ងារព័ត៌មាន AFP ដែលបន្តថា លោក Sirisena ថែមទាំងបានតែងតាំងមន្ត្រីប៉ូលិសម្នាក់ជាស្នងការប៉ូលិសស្ដីទីដើម្បីកាន់ការងារជំនួសលោក Jayasundara ទៀតផង។

មន្ត្រីស្រីលង្កាម្នាក់និយាយថា ការបដិសេធលាលែងពីតំណែងរបស់មេប៉ូលិសរូបនេះ មានន័យស្មើការព្យួរតំណែងខ្លួនឯង ដើម្បីរង់ចាំការសម្រេចចិត្តពីសភា។ ក្រោមច្បាប់រដ្ឋធម្មនុញ្ញស្រីលង្កា មានតែរដ្ឋសភាប៉ុណ្ណោះដែលមានសិទ្ធិដកតំណែងមេប៉ូលិសជាតិ។ នេះក៏ព្រោះតែច្បាប់ទប់ស្កាត់ការជ្រៀតជ្រែករបស់អ្នកនយោបាយទៅក្នុងកិច្ចការសន្តិសុខ។ លោក Jayasundara នេះ ត្រូវបានជ្រើសរើសឲ្យកាន់តំណែងប្រមុខប៉ូលិសជាតិដោយនាយករដ្ឋមន្ត្រី Wickremesinghe ។

ក្រៅពីលោក Jayasundara មន្ត្រីជាន់ខ្ពស់នៅក្រសួងការពារជាតិស្រីលង្កាម្នាក់ បានចុះចេញពីតំណែងរបស់ខ្លួន។ រដ្ឋលេខាធិការក្រសួងការពារជាតិ Hemasiri Fernando បានចាកចេញពីតំណែងតាមការបញ្ជារបស់លោក Sirisena ដែលមិនពេញចិត្តចំណាត់ការរបស់ក្រុមសន្តិសុខជុំវិញហេតុការណ៍វាយប្រហារដែលត្រូវបានក្រុមជ្រុលនិយមរដ្ឋឥស្លាមប្រកាសទទួលខុសត្រូវ៕