ជាតិ
សេដ្ឋកិច្ច
អំបិលនាំទៅបារាំង ១០០តោន មិនធំដុំប៉ះពាល់តម្រូវការក្នុងស្រុកទេ តែបារម្ភភ្លៀងច្រើនទៅវិញទេ
× ភ្នំពេញ៖ ក្រុមហ៊ុនក្នុងស្រុកមួយគ្រោងនាំអំបិល ១០៨តោនទៅប្រទេសបារាំង តាមការបញ្ជាទិញ។ មុននាំចេញនេះ កាលពីចុងឆ្នាំ២០១៨ កម្ពុជាបាននាំចូលអំបិល១ម៉ឺនតោន ដោយសារការផលិតក្នុងស្រុកជួបបញ្ហាភ្លៀងធ្លាក់ច្រើន មិនអាចផ្គត់ផ្គង់តម្រូវការពេញលេញ។ ព័ត៌មាននាំចេញអំបិល ខណៈដែលក្នុងស្រុកខ្វះខាតនោះ ត្រូវបានមហាជនមួយចំនួនប្រតិកម្ម ឬមានចម្ងល់។
ការនាំចេញអំបិលដូចខាងលើនេះ ត្រូវបានប្រធានសហគមន៍អ្នកផលិតអំបិលកំពត-កែប លោក ប៊ុន បារាំង ចាត់ទុកជារឿងធម្មតាក្នុងទីផ្សារសេរី ហើយថាបរិមាណ១០០តោននេះតិចតួចប៉ុណ្ណោះ។ លោកបានប្រាប់សារព័ត៌មានថ្មីៗដូច្នេះថា៖«ទីផ្សារសេរី វាតែងតែវិលទៅវិលមក (យើងនាំទៅគេ គេនាំមកយើង)។ អំបិល ១០០តោនគ្មានអ្វីច្រើននោះទេ ហើយកន្លែងណាបានថ្លៃ គាត់លក់ទៅទីនោះហើយ។ ដូចថាគេចង់ហូបអំបិលយើង គាត់ក៏ធ្វើទុកឲ្យគេអ៊ីចឹងទៅ វាមិនធំដុំរហូតប៉ះពាល់តម្រូវការក្នុងស្រុកទេ»។ ក្រុមអ្នកផលិតអំបិលសម្រាប់នាំចេញទៅបារាំងនោះទៀតសោត គឺនៅក្រៅសហគមន៍ស្រាប់ ដែលកាន់តែមានសេរីភាពក្នុងការលក់ដូរ។
បើតាមលោក ប៊ុន បារាំង ឈ្មួញអំបិលរបស់បារាំង មិនមែនទើបតែទិញអំបិលពីកម្ពុជាលើកដំបូងនោះទេ គឺមាននាំចូលអំបិលកម្ពុជាឆ្នាំមុនៗ កន្លងរួចមកហើយ។ លោកបារាំងបន្ថែមថា ក្រៅពីនាំទៅបារាំង កម្ពុជាមិនមាននាំចេញអំបិលទៅប្រទេសផ្សេងនោះទេ។ បើតាមលោក បារាំង អំបិលដែលគ្រោងនាំចេញនោះ គឺជាផ្កាអំបិល ដែលអណ្ដែតលើទឹកផលិតអំបិល ហើយមានកម្រិតជាតិប្រៃតិចជាងអំបិលក្រួស តែមានតម្លៃខ្ពស់ជាងអំបិលក្រួស។
លោក ប៊ុន បារាំង អះអាងថា អំបិលដែលកម្ពុជានាំចូលកន្លងមកជាអំបិលផលិតពីទឹកសមុទ្ររួចហាលថ្ងៃ ដែលជាអំបិលល្អ មិនមែនអំបិលរ៉ែនោះទេ។
ប្រធានសហគមន៍អ្នកផលិតអំបិលរូបនេះហាក់មិនសូវចាប់អារម្មណ៍នឹងបរិមាណនាំចេញអំបិលដ៏តិចតួចនោះទេ តែលោកបង្ហាញការព្រួយបារម្មណ៍ចំពោះអាកាសធាតុឆ្នាំនេះដែលអាចធ្វើឲ្យការផ្គត់ផ្គង់ក្នុងស្រុកខ្វះខាតច្រើន។ លោក ប៊ុន បារាំង«ការផលិតអំបិលប្រហែលខ្វះទៀតហើយ ភ្លៀងម្ដងៗអំបិលរលាយទាំងអស់។ គួរជឿអត់! ខែនេះនៅកំពតភ្លៀងជន់ ខណៈកន្លែងផ្សេងកម្ដៅ៤០អង្សា»។ លោកមិនអាចប៉ាន់ស្មានទំហំខ្វះខាតអំបិលនោះទេ តែលោកថាអាចនឹងខ្វះច្រើន ហើយត្រូវរង់ចាំមើលជាក់ស្ដែង។ កម្ពុជាមានតម្រូវការអំបិលសម្រាប់ប្រើប្រាស់ក្នុងស្រុកប្រមាណ ១០ម៉ឺនតោនក្នុងមួយឆ្នាំ។
គួរបញ្ជាក់ថា ក្រៅពីបញ្ហាផ្គត់ផ្គង់ក្នុងស្រុកខ្វះខាត វិស័យផលិតអំបិលក៏ជួបបញ្ហាមិនឯកភាពគ្នាផងដែរ។ ក្រុមផលិតប្រមាណ៣០ភាគរយនៃក្រុមផលិតប្រមាណ ២០០ក្រុម មិនព្រមចូលជាសមាជិកសហគមន៍ផលិតដូចមុន។ ក្រសួងឧស្សាហកម្ម និងសិប្បកម្ម និងអាជ្ញាធរខេត្តធ្លាប់បានជួយសម្របសម្រួលរួចហើយ តែអ្នកចាកចេញទាំងនោះនៅតែនៅក្រៅសហគមន៍ ដែលធ្វើឲ្យស្ទើរតែឈានដល់ការរំសាយសហគមន៍ចោល។ បើតាមលោក ប៊ុន បារាំង លោកបានស្ដាប់ការណែនាំរបស់ក្រសួង ដោយមិនទាន់រំសាយ ហើយរង់ចាំអ្នកនៅក្រៅសហគមន៍ ចូលមកវិញ តែឆ្នាំនេះការផលិតជួបបញ្ហា ដូចនេះការសង្ឃឹមចូលសមាជិកវិញ កាន់តែពិបាក៕
© រក្សាសិទ្ធិដោយ thmeythmey.com