ជាតិ
EDC៖ ទោះខ្វះអគ្គិសនី ក៏មិនផ្តាច់នៅមន្ទីរពេទ្យដែរ រូបភាពពីអគ្គិសនីកម្ពុជា
× ទោះបីកម្ពុជា កំពុងស្ថិតក្នុងស្ថានភាពខ្វះថាមពលអគ្គិសនីក្តី តែអគ្គិសនីកម្ពុជា (EDC) នៅតែដាក់កិច្ចការអាទិភាពច្បាស់លាស់ ក្នុងការប្រតិបតិ្តចែកចាយថាមពលអគ្គិសនី ចូលទៅគ្រប់មន្ទីរពេទ្យទាំងអស់។ នេះបើយោងតាមការចេញផ្សាយលើទំព័រហ្វេសប៊ុករបស់អគ្គិសនីកម្ពុជានៅថ្ងៃទី២៩មេសា ឆ្នាំ២០១៩។
ពាក់ព័ន្ធការដាច់ចរន្តអគ្គិសនីនៅមន្ទីរពេទ្យព្រះកុសុមៈ ធ្វើឲ្យមានការយល់ច្រឡំដល់ប្រជាពលរដ្ឋមួយចំនួនគិតថា អគ្គិសនីកម្ពុជា ផ្ដាច់ភ្លើងនៅមន្ទីរពេទ្យ។ អគ្គិសនីកកម្ពុជា បានអះអាងថា ក្នុងករណីនេះ គឺជាឧបទ្ទវហេតុ ដោយសារផ្ទុះដាច់ខ្សែកាបបណ្ដាញតង់ស្យុងមធ្យម(MV) ក្រោមដីចេញពីអនុស្ថានីយទី៣ (GS3-F14A) ជាហេតុបណ្ដាលឲ្យដាច់ចរន្តអគ្គិសនីចូលមន្ទីរពេទ្យព្រះកុសុមៈកាលពីថ្ងៃទី២៥ ខែមេសា ឆ្នាំ២០១៩។
«ការរក្សានិរន្តរភាពនៃការផ្គត់ផ្គង់ចរន្តអគ្គិសនីចូលមន្ទីរពេទ្យទាំងអស់ គឺជាកិច្ចការអាទិភាពដែលអគ្គិសនីកម្ពុជាបានដាក់ចេញនូវការណែនាំច្បាស់លាស់បំផុតក្នុងប្រតិបត្តិការងារចែកចាយថាមពល។ បើទោះបី ក្នុងពេលវេលាដែលពុំមានប្រភពថាមពលផ្គត់ផ្គង់គ្រប់គ្រាន់ក៏ដោយ ក៏អគ្គសនីកម្ពុជាទុកអាទិភាពផ្ដល់ចរន្តអគ្គិសនីចូលមន្ទីរពេទ្យដែរ»។ នេះជាការបញ្ជាក់របស់អគ្គិសនីកម្ពុជា។
ទន្ទឹមនឹងនេះ អគ្គិសនីកម្ពុជា បានសម្រេចចូលរួមវិនិយោគជួយដល់មន្ទីរពេទ្យគន្ធបុប្ផារាជធានីភ្នំពេញជិត២៣ម៉ឺនដុល្លារ ដើម្បីសាងសង់បន្ទាប់ភ្លើង រួមជាមួយការបំពាក់បរិក្ខាអគ្គិសនីចំបាច់ក្នុងស្មារតីរួមចំណែកបង្កើនប្រសិទ្ធិភាព និងម៉ាស៊ីនភ្លើងបម្រុង១គ្រឿង។ ការចូលរួមជួយដល់មន្ទីរពេទ្យគន្ធបុប្ផាបែបនេះ គឺជាស្មារតីរួមចំណែកបង្កើនប្រសិទ្ធភាព និងនិរន្តភាពក្នុងការផ្គត់ផ្គង់ថាមពលអគ្គិសនី។ អគ្គិសនីកម្ពុជាបានបញ្ជាក់ថា គម្រោងនេះនឹងបញ្ចប់នៅចុងខែឧសភា ឆ្នាំ២០១៩៕
Tag:
អគ្គិសនិកម្ពុជា
ការផ្គត់ផ្គង់
ចរន្តអគ្គិសនី
© រក្សាសិទ្ធិដោយ thmeythmey.com