ពីនេះ ពីនោះ
«អាម៉េរិក» ត្រូវតាមវចនានុក្រម តែ «អាមេរិក» ត្រូវតាមក្រុមប្រឹក្សាជាតិភាសាខ្មែរ និងទម្លាប់
×![]()
ដោយ: ថ្មីៗ
«សហរដ្ឋអាម៉េរិក», «សហរដ្ឋអាម៉េរិគ» ឬ«សហរដ្ឋអាមេរិក» កំពុងក្លាយជាពាក្យដែលនាំឲ្យមានការជជែកដេញដោលគ្នា។ មតិខ្លះសំដែងការភ្ញាក់ផ្អើលយ៉ាងខ្លាំង ដោយឃើញ រាជបណ្ឌិត្យសភា បានសរសេរពាក្យនេះ ដោយមានសញ្ញា «មូសិកទន្ត» ឬ «ធ្មេញកណ្តុរ» ពីលើអក្សរ «ម» ខណៈជាទូទៅ គេច្រើនសរសេរថា «អាមេរិក» ជំនួសពាក្យ «អាម៉េរិក» ឬ «អាម៉េរិគ»។
នៅក្នុងវចនានុក្រមសម្តេចព្រះសង្ឃរាជ ជួន ណាត «អាម៉េរិក» ឬ«អាម៉េរិគ» ជាពាក្យត្រឹមត្រូវ។ វចនានុក្រម បានពន្យល់លំអិតថា អាម៉េរិក ជាឈ្មោះមហាទ្វីបមួយក្នុងមនុស្សលោក នៅក្នុងចន្លោះលំហនៃមហាសមុទ្រអត្លង់ទិគនិងមហាសមុទ្រប៉ាស៊ីហ្វិគ […] ។ ជាតិមនុស្សអ្នកមានពូជកំណើតនៅក្នុងទ្វីបអាម៉េរិគនោះ, បុរសហៅ អាម៉េរិក័ង ឬ អាម៉េរិក័ន (បារ. Américain, អ. អាម៉េរិក័ន American), ស្ត្រីហៅ អាម៉េរិកែន (បារ. Américaine); ខ្មែរច្រើនហៅ អាម៉េរិក័ង ឬ អាម៉េរិក័ន ទាំងបុរសទាំងស្ត្រី : ប្រុសអាម៉េរិក័ង, ស្រីអាម៉េរិក័ង ។
ដោយឡែក ក្រុមប្រឹក្សាជាតិភាសាខ្មែរ កាលពីឆ្នាំ២០០៩ បានអនុម័តឈ្មោះប្រទេស រាជធានី/រដ្ឋធានី សម្រាប់ការសរសេរផ្លូវការ។ នៅលេខរៀងទី១៧៣ United States of America ជាភាសាអង់គ្លេស ឬ États-Unis d'Amérique ត្រូវបកជាខ្មែរថា «សហរដ្ឋអាមេរិក»។
តើត្រូវសរសេរដោយផ្អែកតាមអ្វីជាមូលដ្ឋាន? តាមរយៈខ្សែអាត់សំឡេងនៅក្នុងកម្មវិធីបកស្រាយអក្សរសាស្ត្រមួយ សម្តេចព្រះសង្ឃរាជ ជួន ណាត ព្រះអង្គក៏បានលើកឡើងផងដែរថា ពិតជាពិបាកណាស់ក្នុងការកែប្រែនូវអ្វីដែលមនុស្សសរសេរតាមទម្លាប់។ សម្តេចបានបញ្ជាក់ថា វចនានុក្រមគឺជាក្បួនខ្នាតតម្រូវ ប៉ុន្តែពេលខ្លះ គេក៏មិនអាចប្រកែកចំពោះសំណេរតាមទម្លាប់នោះដែរ។
ពាក្យដែលគួរឲ្យកត់សម្គាល់មានដូចជា «មោទកភាព» ជាពាក្យត្រឹមត្រូវតាមវចនានុក្រម តែតាមទម្លាប់គេសរសេរថា «មោទនភាព»។ ក្រៅពីនោះមានដូចជា «ប្រឌិត» ជំនួសឲ្យពាក្យ «ប្រតិដ្ឋ», «ត្រសក់» ជំនួសឲ្យពាក្យ «តាសក់», «សាឡាង» ជំនួសឲ្យពាក្យ «ស្រឡាង» ជាដើម៕
Tag:
ពន្យល់ពាក្យ
© រក្សាសិទ្ធិដោយ thmeythmey.com
