អន្តរជាតិ
ហេតុអ្វីលោក អាបេ អន្ទះសាចង់ជួបលោក គីម ជុងអ៊ុន?
× នាយករដ្ឋមន្ត្រីជប៉ុន ស៊ិនហ្សូ អាបេ ហាក់អន្ទះសាយ៉ាងខ្លាំងដើម្បីជួបជាមួយមេដឹកនាំកូរ៉េខាងជើង គីម ជុងអ៊ុន ជជែកគ្នាទំនាក់ទំនងទ្វេភាគី។ ក្នុងចំណោមមេដឹកនាំប្រទេសនៃតុចរចា៦ភាគី មានតែនាយករដ្ឋមន្ត្រីជប៉ុនប៉ុណ្ណោះដែលមិនជួបចរចាជាមួយមេដឹកនាំកូរ៉េខាងជើង។ ក្នុងកិច្ចសម្ភាសមួយនៅថ្ងៃទី១ ខែឧសភា លោក អាបេ ប្រកាសចង់មានជំនួបជាមួយលោក គីម ជុងអ៊ុន ដោយគ្មានការដាក់លក្ខខណ្ឌអ្វីឡើយ។
មេដឹកនាំចិន អាមេរិក កូរ៉េខាងត្បូង និងរុស្ស៊ី សុទ្ធតែបានជួបមេដឹកវ័យក្មេងកូរ៉េខាងជើង គីម ជុងអ៊ុន រួចហើយនៅឡើយតែនាយករដ្ឋមន្ត្រីជប៉ុនប៉ុណ្ណោះ។ ប្រធានាធិបតីចិន ស៊ី ជិនភីង ជួបលោក គីម ញឹកជាងគេ គឺដល់ទៅបួនដង ខណៈប្រធានាធិបតីកូរ៉េខាងត្បូង ជួបលោក គីម បានបីដង។ ប្រធានាធិបតីអាមេរិក ដូណាល់ ត្រាំ ជួបចរចាជាមួយមេដឹកនាំកូរ៉េខាងជើងចំនួនពីរដង ឯលោកប្រធានាធិបតីរុស្ស៊ី វ្ល៉ាឌីមៀ ពូទីន ទើបជួបលោក គីម បានម្ដងកាលពីសប្ដាហ៍មុន។
ជាញឹកញយ នាយករដ្ឋមន្ត្រីជប៉ុន ស៊ិនហ្សូ អាបេ តែងបង្ហាញជំហរជួបលោក គីម ដើម្បីដោះស្រាយបញ្ហារាំងស្ទះក្នុងទំនាក់ទំនងទ្វេភាគី ប៉ុន្តែគេមិនឃើញមានគម្រោងរៀបចំជំនួបអ្វីឡើយ។ នៅថ្ងៃទី១ ខែឧសភា លោក អាបេ ក៏បោះដៃទៅរកកូរ៉េខាងជើងមុនជាថ្មីទៀត។ ក្នុងកិច្ចសម្ភាសជាមួយកាសែត Sankei Shimbun ប្រមុខរដ្ឋាភិបាលជប៉ុនរូបនេះនិយាយថា លោកចង់ជួបលោក គីម ដោយគ្មានលក្ខខណ្ឌអ្វីឡើយ ហើយជជែកដោយគ្មានការលាក់លៀម និងដោយចំហ។
«វាជារឿងសំខាន់សម្រាប់ប្រទេសទាំងពីរក្នុងការធ្វើសកម្មភាពដើម្បីដោះស្រាយបញ្ហា។» នេះជាការលើកឡើងរបស់នាយករដ្ឋមន្ត្រីដែលបន្តថា ជប៉ុន និងកូរ៉េខាងជើងមិនអាចបំបែកភាពមិនទុកគ្នាបានឡើយ បើលោកមិនជួបចរចាដោយផ្ទាល់ជាមួយលោក គីម ដែលប្រធានគណៈកម្មការកិច្ចការរដ្ឋកូរ៉េខាងជើងនោះ។ លោក អាបេ សង្ឃឹមដែរថា មេដឹកនាំវ័យក្មេងកូរ៉េខាងជើង មនុស្សដែលអាចសម្រេចចិត្តជាយុទ្ធសាស្ត្រ និងបត់បែនដើម្បីប្រយោជន៍ប្រទេសខ្លួន។
ដោយសារមើលឃើញថា ជប៉ុនហាក់នៅក្រៅសង្វៀននៃដំណើរការទូតរបស់កូរ៉េខាងជើង លោក អាបេ ទំនងជាចង់ឲ្យប្រទេសលោករក្សាតួនាទីក្នុងសំណុំរឿងប្រចាំអាស៊ីបូព៌ានេះបន្តទៀត។ តាមពិតទៅ ជប៉ុន ជាប្រទេសដែលរិះគន់កូរ៉េខាងជើងខ្លាំងជាងគេជុំវិញកម្មវិធីនុយក្លេអ៊ែរ ព្រោះជប៉ុនតែងរងការគំរាមកំហែងវាយប្រហារដោយមីស៊ីល ឬនុយក្លេអ៊ែរពីសំណាក់កូរ៉េខាងជើងជាញឹកញយ។ ប៉ុន្តែបញ្ហាធំដែលរាំងស្ទះទំនាក់ទំនងទ្វេភាគី គឺការចាប់ជំរិតជនជាតិជប៉ុន។
ទីក្រុងជឿថា ភ្នាក់សម្ងាត់កូរ៉េខាងជើងបានចាប់ពង្រត់ជនជាតិជប៉ុនដើម្បីភាសាជប៉ុនដល់ក្រុមចារកម្មរបស់ពួកគេអំឡុងទសវត្សរ៍ទី៧០ និងទី៨០ ។ ជាច្រើនឆ្នាំបន្ទាប់ពីការបដិសេធដាច់ណាត់ នៅឆ្នាំ២០០២ ក្រុងព្យុងយ៉ាងក៏បានសារភាពថា ខ្លួនចាប់ជនជាតិជប៉ុនចំនួន១៣នាក់ ដោយជនជាតិជប៉ុន៥នាក់ដែលត្រូវចាប់ខ្លួន ត្រូវបានដោះលែងវិញ ឯ៨នាក់ទៀត បានស្លាប់ទៅហើយ៕
Tag:
ជប៉ុន
កូរ៉េខាងជើង
ស៊ិនហ្សូ អាបេ
គីម ជុងអ៊ុន
© រក្សាសិទ្ធិដោយ thmeythmey.com