ដើមឆ្នាំ២០១៩នេះ អ្នកកាសែត១១នាក់ត្រូវបានសម្លាប់ និងជិត៣៥០នាក់ជាប់ឃុំ

អន្តរជាតិ

ដើមឆ្នាំ២០១៩នេះ អ្នកកាសែត១១នាក់ត្រូវបានសម្លាប់ និងជិត៣៥០នាក់ជាប់ឃុំ

03, May 2019 , 7:29 am

រូបភាព

ដោយ: រួបរួម

បើគិតត្រឹមខែឧសភា ឆ្នាំ២០១៩ អ្នកកាសែតចំនួន១១នាក់ត្រូវបានសម្លាប់ និងសរុប៣៤១នាក់រងការចោទប្រកាន់ និងជាប់ពន្ធនាគារ។ នេះបើតាមយោងអង្គការអ្នកកាសែតគ្មានព្រំដែន (RSF) ដោយអះអាងរបាយការណ៍របស់ខ្លួន មិនបានភ្ជាប់ករណីអ្នកកាសែតស្លាប់ ឬជាប់ឃុំ ដែលមិនពាក់ព័ន្ធនឹងការងារខ្លួននោះឡើយ។

របាយការណ៍បានបង្ហាញថា ត្រឹមដើមឆ្នាំ២០១៩នេះ មានអ្នកកាសែត១០នាក់ ត្រូវបានសម្លាប់ក្នុងនោះមានកាសែតអាជីព៨នាក់ អ្នកកាសែតពលរដ្ឋ (Citizens Journalists) ១នាក់ និងជំនួយការសារព័ត៌មាន (Media Assistants) ១នាក់។ ក្នុងចំណោមអ្នកកាសែតអាជីពទាំង៨នាក់ដែលត្រូវបានសម្លាប់ មាន៣រូបជាជនជាតិអាហ្វហ្គានីស្ថាន ម៉ិកស៊ិក៣រូប ហ្គាណា១រូប អង់គ្លេស១រូប និងលីប៊ី១រូប។ អ្នកកាសែតពលរដ្ឋដែលបានស្លាប់១នាក់ ជាជនជាតិអាហ្វហ្គានីស្ថាន រីឯជំនួយការសារព័ត៌មាន ជាជនជាតិអឺរ៉ាក់។

ទាក់ទងនឹងការឃុំឃាំង អ្នកកាសែតមានចំនួនសរុប៣៤១នាក់ ដោយ១៧៤នាក់ ជាអ្នកកាសែតអាជីព ១៥០នាក់ជាអ្នកកាសែតពលរដ្ឋ និង១៧នាក់ជាជំនួយការសារព័ត៌មាន។ អ្នកកាសែតនៅប្រទេសចំនួន៣២ស្ថិតចំណោមអ្នកកាសែតអាជីព១៧៤នាក់ដែលជាប់ឃុំ និងរងការចោទប្រកាន់ ដោយតួកគីមានរហូតដល់ទៅ៣៥នាក់ អារ៉ាប៊ីសាអូឌីត មាន២៣នាក់ អាហ្ស៊ីបមាន២៣នាក់ ចិន១៤នាក់ អេរីត្រេមាន១១នាក់ និងបារ៉ែនមាន៩នាក់។

លោក អួន ឈិន និងយាង សុធារិន ហៅ សុជា មេត្តា អតីតបុគ្គិលិកអាស៊ីសេរី ក៏ត្រូវបានអង្គការអ្នកកាសែតគ្មានព្រំដែន (RSF) ដាក់ក្នុងបញ្ជីអ្នកកាសែតជាប់ឃុំផងដែរ បើទោះបីជាពួកលោកត្រូវបានដោះលែងចេញពីពន្ធនាគារព្រៃស តាំងពីខែសីហា ឆ្នាំ២០១៨ ក៏ដោយ។ បច្ចុប្បន្នតុលាការមិនទាន់ទម្លាក់បទចោទប្រកាន់លើអ្នកទាំងពីរពីបទផ្ដល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិនោះឡើយ។

នៅតំបន់អាស៊ាន ក្រៅពីអតីតអ្នកកាសែតកម្ពុជាពីរនាក់ដែលមិនទាន់រួចផុតពីការចោទប្រកាន់នោះ មានមីយ៉ាន់ម៉ា៤នាក់ ឡាវ ថៃ និងវៀតណាម មាន១នាក់រៀងៗខ្លួន។

ក្នុងចំណោមអ្នកកាសែតពលរដ្ឋដែលជាប់ឃុំចំនួន១៥០នាក់នៅ១៦ប្រទេស ចិនមានរហូតដល់ទៅ៥០នាក់ វៀតណាម២៩នាក់ អ៊ីរ៉ង់១៨នាក់ និងអារ៉ាប៊ីសាអូឌីតមាន ១៤នាក់។ រីឯជំនួយការសារព័ត៌មានដែលជាប់ឃុំ១៧នាក់នោះ មាននៅ៨ប្រទេស ដោយនៅអេរីត្រេ ៤នាក់ ម៉ារ៉ុក និងភាគខាងលិចតំបន់សាហារ៉ា មាន៣នាក់ ស៊ីរី២នាក់ មីយ៉ាន់ម៉ា ២នាក់ អេហ្ស៊ីប២នាក់ តួកគី និងកូរ៉េខាងជើង មាន១នាក់រៀងៗខ្លួន៕