ដោយ៖ រ៉ឹម ភារី
ភ្នំពេញ៖ បច្ចុប្បន្ន មានស្ត្រីជាច្រើនបានធ្វើការនៅក្នុងវិស័យសារព័ត៌មាននៅកម្ពុជា ប៉ុន្តែ មានស្ត្រីតិចតួចណាស់ ដែលឈរក្នុងតំណែងជាអ្នកយកព័ត៌មានលើប្រធានបទរសើបៗ។ កញ្ញា កាន់ វិច្ឆិកា ជាអ្នកាសែតស្ត្រីវ័យក្មេង និងសកម្មមួយរូប ដែលតែងតែយកព័ត៌មានពាក់ព័ន្ធនឹងប្រធានបទ នយោបាយ សិទ្ធិមនុស្ស និងរឿងរ៉ាវជម្លោះដីធ្លីនៅកម្ពុជា។ តើហេតុអ្វីបានជាវិច្ឆិកាចាប់អាជីពអ្នកសារព័ត៌មាន? តើអ្វីដែលជំរុញឲ្យស្ត្រីរូបនេះ តែងតែយកព័ត៌មានលើប្រធានបទក្តៅដូច្នេះ?
ពលរដ្ឋទូទៅតែងតែឃើញ កញ្ញា កាន់ វិច្ឆិកា កាន់ក្បាលមេក្រូរាយការណ៍ព័ត៌មានពាក់ព័ន្ធរឿងនយោបាយ រឿងក្តីក្តាំនៅមុខតុលាការ ទំនាស់ដីធ្លី និងកន្លែងធ្វើបាតុកម្មរបស់ពលរដ្ឋជាដើម។ វិច្ឆិកាបានប្រឡូកចូលក្នុងការងារជាអ្នកកាសែតនេះប្រមាណ៥ឆ្នាំមកហើយ ពោលគឺតាំងតែពីឆ្នាំ២០១៤ម្ល៉េះ បន្ទាប់ពីនាងបានបញ្ចប់ការសិក្សាបរិញ្ញាបត្រផ្នែកច្បាប់។
មានមូលហេតុមួយចំនួនដែលជំរុញ ឲ្យយុវតីដែលកើតនៅភ្នំពេញរូបនេះ ក្លាយខ្លួនជាអ្នកសារព័ត៌មាន។ ហេតុផលចម្បងមួយ ក្នុងចំណោមទាំងនោះ គឺក្រុមគ្រួសារនាង ក៏ធ្លាប់បាត់បង់ផ្ទះចំនួន២កន្លែង ដោយសារការរំលោភយកដោយគ្មានសំណងកាលពីប្រមាណ២០ឆ្នាំមុន។ នេះជាការអះអាងរបស់ កញ្ញា កាន់ វិច្ឆិកា ដែលនាងបានរម្លឹករឿងអតីតកាលរបស់ខ្លួនទាំងទឹកមុខស្រពោន ៖ «ខ្ញុំឈឺចាប់ ដោយសារ តែការបាត់បង់ដីធ្លី រួមជាមួយនឹងការមកគំរាមកំហែង។ ខ្ញុំឆ្ងល់ថា ម៉េចបានជាគេឃោរឃៅខ្លាំងម្ល៉េះពេលហ្នឹង? រហូតដល់ថ្នាក់ដីរបស់យើងខ្លួនឯងដែលយើងកាន់កាប់តាំងពីមុខឆ្នាំ១៩៩០ ហើយចុងក្រោយ គេថា ដីហ្នឹងជាដីរបស់គេ ហើយគំរាមកំហែងឲ្យយើងចាកចេញពីដីហ្នឹង។ ពេលនោះ ខ្ញុំគិតថា ម៉េចបានជាអ៊ីចឹង? គ្រួសារខ្ញុំសុទ្ធតែជាអ្នកច្បាប់ ប៉ាខ្ញុំក៏ជាអតីតអ្នកច្បាប់ម្នាក់ដែរ។ ពួកយើងគឺជាអ្នករៀនច្បាប់ អ៊ីចឹងដឹងច្បាស់ ថា អ្វីត្រូវ អ្វីខុស។ ប៉ុន្តែ ទោះបីយើងរៀនច្បាប់ យើងដឹងពីច្បាប់ តែនៅតែគេមករំលោភ។ នៅពេលដែលយើងដឹងច្បាប់ហើយ ហើយយើងនៅតែប្រឈមជាមួយភាពអយុត្តិធម៌ទាំងអស់ហ្នឹងទៀត មានអារម្មណ៍ថា យើងឈឺចាប់ជាងយើងអត់ដឹង»។
វិច្ឆិកា អះអាងថា ការមើលឃើញពីភាពអយុត្តិធម៌នៅក្នុងសង្គមនេះហើយ បានជំរុញឲ្យនាងឈានចូលប្រឡូកក្នុងវិស័យសារព័ត៌មាន។
នាងបញ្ជាក់បន្ថែមថា៖ «ដោយសារ ខ្ញុំធ្លាប់មានបទពិសោធ នៅពេលដែលពួកខ្ញុំរងភាពអយុត្តិធម៌ គឺអត់មានការដោះស្រាយ ឬមានស្ថាប័នពាក់ព័ន្ធចេញមកដោះស្រាយ និងអើពើជាមួយស្ថានភាពរបស់ពួកខ្ញុំដែលកំពុងរងភាពអយុត្តិធម៌នោះទេ។ ខ្ញុំមើលឃើញអំពីភាពអយុត្តិធម៌ក្នុងសង្គម រួមជាមួយនឹងការតវ៉ាដីធ្លី ឃើញប្រជាពលរដ្ឋយំជាច្រើនដង។ ទាំងអស់ហ្នឹង បានជំរុញទឹកចិត្តខ្ញុំឲ្យប្រឡូកក្នុងវិស័យសារព័ត៌មាន។ យើងដឹងហើយថា អ្នកសារព័ត៌មាន គឺអត់ស្រួលទេ ជាពិសេស យើងធ្វើការងារនៅក្នុងស្ថាប័នវិជ្ជាជីវៈ និងឯករាជ្យ វាកាន់តែមានសម្ពាធក្នុងការធ្វើការងាររបស់ពួកយើង។ ដោយសារអ្វី? ខ្ញុំចុះទៅយកព័ត៌មាន និងសម្ភាសចំពោះសមត្ថកិច្ច និងមន្ត្រីធំៗ ពេលខ្លះពួកគេមិនសប្បាយចិត្តក្នុងការផ្តល់សម្ភាសដល់អ្នកកាសែតដូចជាពួកយើងនេះទេ»។
រយៈពេល៥ឆ្នាំ ក្នុងតួនាទីជាអ្នកសារព័ត៌មាន កញ្ញា កាន់ វិច្ឆិកា វ័យ២៧ឆ្នាំ ដែលកំពុងបម្រើការងារនៅវិទ្យុសំឡេងសហរដ្ឋអាមេរិករូបនេះ ត្រូវបានគេស្គាល់ថា ជាអ្នកសារព័ត៌មានស្ត្រីដ៏សកម្មម្នាក់ ដែលយកព័ត៌មានពាក់ព័ន្ធនឹងប្រធានបទនយោបាយ សិទ្ធិមនុស្ស និងរឿងរ៉ាវជម្លោះដីធ្លីនៅកម្ពុជា។ បើទោះបី វិច្ឆិកា ធ្លាប់រងគ្រោះយ៉ាងនេះក្តី តែនៅពេលនាងសរសេរព័ត៌មានលើប្រធានទំនាស់ដីធ្លី ឬប្រធានបទពាក់ព័ន្ធនឹងរឿងក្តីក្តាំសង្គមផ្សេងៗនោះ នាងអះអាងថា មិនបានយករឿងរ៉ាវឈឺចាប់របស់ខ្លួន មកលាយឡំ ជាមួយវិជ្ជាជីវៈរបស់ខ្លួនឡើយ។
នាងអះអាងយ៉ាងដូច្នេះ៖«នៅពេលខ្ញុំចុះទៅយកព័ត៌មាន ដោយបានឃើញពលរដ្ឋយំ ស្រែកទាមទាររកយុត្តិធម៌ វាជាការពិត ពេលខ្លះ វាធ្វើឲ្យប៉ះពាល់ដល់អារម្មណ៍របស់ខ្ញុំ។ ប៉ុន្តែ ខ្ញុំតែងតែប្រាប់ខ្លួនឯងថា ធ្វើជាអ្នកសារព័ត៌មានមួយរូបដែលមានវិជ្ជាជីវៈ ហើយខ្ញុំត្រូវតែនៅកណ្តាល។ ខ្ញុំមិនអាចយកអារម្មណ៍របស់ខ្ញុំ ដាក់លើរឿងហ្នឹងបានទេ។ អ៊ីចឹង ខ្ញុំព្យាយាមផ្សាយការពិត ហើយប្រមូលសំឡេងទាំងអស់ យកមកផ្សាយបន្ត»។
ទោះធ្លាប់ទទួលការគំរាម តែវិច្ឆិកានៅតែបន្តអាជីពនេះរហូតសារព័ត៌មានមានអំណាចពិតប្រាកដ
«មិនសូវមានទេ ស្ត្រីអ្នកយកព័ត៌មាន ដែលផ្តោតលើប្រធានបទ នយោបាយ និងសិទ្ធិមនុស្ស»។ នេះជាការរៀបរាប់របស់វិច្ឆិកា ប្រាប់សារព័ត៌មានថ្មីៗនៅកន្លែងការងាររបស់នាង។ សម្រាប់ស្ត្រីអ្នកសារព័ត៌មានរូបនេះ ការយកព័ត៌មានលើរឿងរ៉ាវនយោបាយ និងសិទ្ធិមនុស្ស គឺមានការហត់នឿយ និងរងការគំរាមកំហែង។ ហើយនេះជាមូលហេតុដែល អ្នកសារព័ត៌មានស្ត្រីដទៃទៀត ងាកទៅធ្វើជាអ្នកយកព័ត៌មានផ្នែកសេដ្ឋកិច្ច កម្សាន្ត និងសុខភាពជាដើមវិញ ព្រោះតែ ប្រធានបទទាំងនេះ មិនតម្រូវឲ្យចុះហាលក្តៅហាលភ្លៀង និងមិនសូវប្រឈមនឹងការគំរាមកំហែង។
វិច្ឆិកាបានរម្លឹកថា៖«ជាស្ត្រីដែលធ្វើការក្នុងស្ថាប័នឯករាជ្យ និងវិជ្ជាជីវៈ ខ្ញុំក៏ធ្លាប់ត្រូវបានគេគំរាមវ៉ៃដែរ។ គេគំរាមចំឈ្មោះស្ថាប័ន ហើយនៅចំពីមុខខ្ញុំតែម្តង គេសំឡឹងមុខខ្ញុំហើយគេនិយាយ។ កាលហ្នឹង ខ្ញុំធ្វើការនៅ VOD នៅឡើយ។ ក្រុមសន្តិសុខពេលហ្នឹង គាត់និយាយថា នឹងត្រូវតែវ៉ៃអ្នកសារព័ត៌មាន VOD ឲ្យបាន។ កាលហ្នឹង ខ្ញុំធ្វើការជាមួយកាមេរ៉ាមែនមួយរូប។ គ្រាន់តែគេគំរាមថ្ងៃហ្នឹង ស្អែកឡើង ឡាយ សាមាន ដែលជាអតីតអ្នកសារព័ត៌មាននៅ VOD ដែរហ្នឹង ពេលរសៀសត្រូវបានគេវ៉ៃ»។
ហេតុការណ៍នេះ បានធ្វើឲ្យវិច្ឆិកាតក់ស្លុត និងភិតភ័យ ហើយក៏យល់ថា គឺជាការគំរាមកំហែងធ្ងន់ធ្ងរមួយ។ ដោយសារតែការភ័យខ្លាចចំពោះសុវត្ថិភាពវិច្ឆិកា ឪពុកម្តាយវិច្ឆិកាមិនចង់ឲ្យវិច្ឆិកាប្រកបអាជីពនោះទេ។ ជាកូនពៅក្នុងចំណោមបងប្អូន៨នាក់ ឪពុករបស់វិច្ឆិកា ក៏ធ្លាប់បានបង្ខំឲ្យនាងលាឈប់ពីការងារនេះចំនួន២ដងទៀតផង ព្រោះ តែខ្លាចពីសុវត្ថិភាព ខណៈដែលវិច្ឆិកាឧស្សាហ៍ចុះទៅយកព័ត៌មានតាមខេត្ត និងពេលយប់។ ប៉ុន្តែ ទោះយ៉ាងណា វិច្ឆិកានៅតែមិនបោះបង់ចោលអាជីពនេះឡើយ។ ជាមនុស្សដែលរហ័សរហួន និងមានសម្តីមាត់ៗ វិច្ឆិកា អះអាងថា ការគំរាមកំហែងនេះ មិនបានធ្វើឲ្យនាងមានបំណងរាយថយពីរបរនេះឡើយ តែផ្ទុយទៅវិញ នាងបានបង្កើនការប្រយ័ត្នប្រយែងជាងមុន ទាំងនៅពេលចុះទៅយកព័ត៌មាន និងនៅពេលសរសេរ ក្រោយហេតុការណ៍នោះ ដើម្បីបន្តសង្ឃឹម និងផ្តល់ឱកាសឲ្យអ្នកដែលគ្មានសំឡេងបានបញ្ចេញមតិយោបល់របស់ពួកគេ។ វិច្ឆិកា សង្ឃឹមថា នឹងអាចមើលឃើញ វិស័យសារព័ត៌មាននៅកម្ពុជា ក្លាយជាអំណាចទី៤ដូចនៅសហរដ្ឋអាមេរិក។ ទន្ទឹមនឹងនេះ វិច្ឆិកា ក៏ចង់ឲ្យមានការបើកទូលាយពីគ្រប់ភាគីពាក់ព័ន្ធ ក្នុងការផ្តល់ព័ត៌មានពិត ដល់អ្នកសារព័ត៌មាន ដើម្បីឲ្យពួកគេមានប្រភពគ្រប់ជ្រុងជ្រោយ ដែលផ្តល់ភាពងាយស្រួលក្នុងផ្សព្វផ្សាយជាប្រយោជន៍សម្រាប់ប្រទេសកម្ពុជា៕