អន្តរជាតិ
រដ្ឋាភិបាលថ្មីរបស់ថៃ អាចលេចរូបរាងនៅខែមិថុនា
× ក្រោយការបោះឆ្នោតថ្ងៃទី២៤ ខែមីនា បក្សនយោបាយធំៗពីរ បានបបួលបក្សនយោបាយផ្សេងដែលទទួលបានអាសនៈសភាតាមលទ្ធផលមិនផ្លូវការដើម្បីបង្កើតរដ្ឋាភិបាលថ្មី។ លទ្ធភាពដឹកនាំរដ្ឋាភិបាលបានឬអត់ ត្រូវរង់ចាំលទ្ធផលបោះឆ្នោតផ្លូវការ និងការបែងចែកអាសនៈដោយគណៈកម្មការរៀបចំការបោះឆ្នោត។ ឧបនាយករដ្ឋមន្ត្រីថៃ Wissanu Krea-ngam នៅថ្ងៃទី២ ខែឧសភា និយាយថា រដ្ឋាភិបាលថ្មី អាចត្រូវបានបង្កើតនៅក្នុងខែមិថុនា បើលទ្ធផលប្រកាសនៅសប្ដាហ៍ក្រោយ។
ឧបនាយករដ្ឋមន្ត្រីថៃ លោក Wissanu Krea-ngam បានបង្កើបពីកាលវេលាដែលរដ្ឋាភិបាលអាចលេចជារូបរាងក្រោយការបោះឆ្នោតជាទូទៅថ្ងៃទី២៤ ខែមីនា។ បើតាមមន្ត្រីជាន់ខ្ពស់រូបនេះ ប្រសិនបើគណៈកម្មការរៀបចំការបោះឆ្នោតថ្ងៃ ប្រកាសបេក្ខជនសមាជិកសភានៅថ្ងៃទី៨ ខែឧសភា នោះរដ្ឋាភិបាលថ្មី នឹងកើតនៅខែក្រោយនេះ។
បើគិតតាមកាលបរិច្ឆេទនេះ ក្រោយការប្រកាសលទ្ធផលផ្លូវការយ៉ាងតិច៩៥ភាគរយ សភាត្រូវកោះប្រជុំអំឡុងពេល១៥ថ្ងៃបន្ទាប់។ លើសពីនោះ បញ្ជីឈ្មោះសមាជិកព្រឹទ្ធសភាទាំង២៥០នាក់ ត្រូវបញ្ជូនទៅកាន់រាជវាំងដើម្បីសុំការយល់ព្រមពីមហាក្សត្រអំឡុងពេលបីថ្ងៃក្រោយការប្រកាសលទ្ធផល។ លោក Krea-ngam បញ្ជាក់ថា កិច្ចការដំបូងសម្រាប់សភាទាំងពីរ គឺជ្រើសរើសប្រធានរៀងៗខ្លួន ដែលបន្ទាប់មកត្រូវសុំការយល់ព្រមពីស្ដេចថៃទៀត។
ដំណាក់កាលបន្ទាប់ ប្រធានសភាទាំងពីរ នឹងកំណត់ពេលដើម្បីកោះប្រជុំរួមព្រឹទ្ធសភា-រដ្ឋសភាដើម្បីជ្រើសរើសនាយករដ្ឋមន្ត្រី។ ឧបនាយករដ្ឋមន្ត្រីថៃ Krea-ngam បន្ថែមថា គិតគូរតាមពេលនេះ នាយករដ្ឋមន្ត្រីដែលទើបត្រូវបានជ្រើសរើសតាំង អាចបង្កើតរដ្ឋាភិបាលនៅក្នុងខែមិថុនាខាងមុខតែម្ដង។ នេះបើតាមការផ្សាយរបស់កាសែតបាងកកប៉ុស្តិ៍។
យោងតាមលទ្ធផលមិនផ្លូវការ បក្សភឿថៃស្និទ្ធអតីតនាយករដ្ឋមន្ត្រីត្រកូល ស៊ីណាវ៉ាត់ ទទួលបានអាសនៈច្រើនជាងបក្សកម្លាំងប្រជារាស្ត្រដែលគាំទ្រលោក ប្រាយុទ្ធ ចន្ទអូចា ឲ្យដឹកនាំប្រទេសទៀត។ យ៉ាងណាមិញ បក្សទាំងពីរកំពុងប្រមូលបក្សដែលមាននិន្នាការដូចគ្នាដើម្បីចងសម្ព័ន្ធភាពជាមួយគ្នា ហើយម្យ៉ាងដើម្បីប្រមូលសំឡេងឲ្យបានច្រើនផង។
យ៉ាងណាមិញ បក្សកម្លាំងប្រជារាស្ត្រ ហាក់មានប្រៀបជាងបក្សភឿថៃក្នុងការជ្រើសរើសនាយករដ្ឋមន្ត្រី និងការបង្កើតរដ្ឋាភិបាល ឯមូលហេតុ គឺច្បាប់បោះឆ្នោតដែលសរសេរដោយរបបយោធាតែម្ដងតាមរយៈការអនុញ្ញាតឲ្យសមាជិកព្រឹទ្ធសភាចូលរួមជ្រើសរើសនាយករដ្ឋមន្ត្រីសម្រាប់អាណត្តិដំបូងរបស់ខ្លួន។ ការណ៍នេះ ធ្វើឲ្យបក្សកម្លាំងប្រជារាស្ត្រ មិនត្រូវការសំឡេងច្រើនឡើយ តែបក្សភឿថៃឯណោះទេដែលត្រូវប្រមូលសំឡេងរបស់ខ្លួនឲ្យច្រើនតាមតែអាចធ្វើបានដើម្បីទប់ស្កាត់ការលូកដៃរបស់ព្រឹទ្ធសភា៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com