អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
ពិធីរាជាភិសេកមហាក្សត្រថៃ បានចាប់ផ្ដើមហើយនៅថ្ងៃទី៤ ខែឧសភានេះ។ មហាក្សត្រ មហា វជិរាលង្ករណ៍ បានប្រថាប់លើរាជបល្ល័ង្កបន្តពីបិតារបស់ទ្រង់ អតីតមហាក្សត្រ ភូមិបុល អាឌុលយ៉ាដេត ដែលសោយទិវង្គតកាលពីឆ្នាំ២០១៦ ។ ពិធីរាជាភិសេកជាលើកដំបូងតាំងពីឆ្នាំ១៩៥០ នឹងត្រូវរៀបចំដល់ថ្ងៃទី៦ ខែឧសភា។
ព្រះចៅ មហា វជិរាលង្ករណ៍ បានក្លាយជាមហាក្សត្រថៃផ្លូវការហើយក្នុងពិធីរាជាភិសេកដែលធ្វើនៅរាជវាំងទីក្រុងបាងកក។ នៅថ្ងៃទី៤ ខែឧសភា ដែលជាថ្ងៃទីមួយនៃពិធីអភិសេកដែលធ្វើឡើងចំនួនបីថ្ងៃ មហាក្សត្រ មហា វជិរាលង្ករណ៍ បានយាងចូលរួមក្នុងពិធីស្រោចស្រពសុគន្ធវារី ដែលទឹកពិសិដ្ឋទាំងន៉ត្រូវបាននាំយកពីខេត្តទាំង៧៧ របស់ថៃ។ បន្ទាប់មក ទ្រង់ប្រថាប់លើបល្ល័ង្ក ដែលមានស្វេតច្ឆេត្រពីខាងលើ។
តមក មន្ត្រីរាជវាំងថៃ ថ្វាយព្រះអង្គនូវគ្រឿងបញ្ចកកុធភណ្ឌទាំង៥ មាន ព្រះមហាពិជ័យមកុដ, ព្រះសែងខ័នជ័យស្រី, ព្រះទណ្ឌៈ (ដំបង), វាលវីជនី (ផ្លិត) និងព្រះសុពណ៌បាទ។ គ្រឿងទាំងនេះ ជាវត្ថុចាំបាច់បំផុតសម្រាប់ក្សត្រគ្រងរាជ្យដែលថ្វាយពីសំណាក់មហាព្រាហ្មណ៍រាជគ្រូប្រចាំព្រះបរមរាជវាំងដើម្បីគ្រងរាជសម្បត្តិពេញបរិបូណ៌ជាមហាក្សត្ររបស់ថៃ។ ស្ដេចរាមាទី១០ អង្គនេះ គ្រងព្រះមហាពិជ័យមកុដ ដែលមានទម្ងន់ដល់ទៅជាង៧គីឡូក្រាម ហើយផ្នែកកំពូលដាំដោយត្បូងនាំយកពីឥណ្ឌា។
នៅរសៀលថ្ងៃដដែល សមាជិករាជវង្សសំខាន់ៗ មន្ត្រីជាន់ខ្ពស់ប្រទេស នឹងចូលគាល់មហាក្សត្រ មហា វជិរាលង្ករណ៍ នៅឯមហាប្រាសាទអមរិន្ទវិនិច្ឆយក្នុងព្រះបរមារាជវាំង។ កម្មវិធីចុងក្រោយថ្ងៃទីមួយ គឺស្ដេចថៃអង្គនេះ យាងទៅកាន់ព្រះវិហារព្រះកែវមរកត។
សម្រាប់ប្រជាជនថៃភាគច្រើន នេះជាលើកទីមួយសម្រាប់ពួកគេដែលបានឃើញផ្ទាល់ពិធីរាជាភិសេកមហាក្សត្របែបនេះ។ ពិធីរាជាភិសេកចុងក្រោយ ប្រារព្ធឡើងតាំងពីឆ្នាំ១៩៥០ ពេលក្សត្រ ភូមិបុល អាឌុលយ៉ាដេត ឡើងគ្រងរាជ្យជាស្ដេចរាមាទី៩ នៃរាជវង្សចក្រីរបស់ថៃ៕
Tag:
ថៃ
មហា វជិរាលង្ករណ៍
© រក្សាសិទ្ធិដោយ thmeythmey.com
