ជាតិ
សេដ្ឋកិច្ច
រយៈពេល៤ខែ ចំណូលពីការលក់សំបុត្រចូលទស្សនាអង្គរមានជាង៤៤លានដុល្លារ ថយចុះជាង៨ភាគរយ
×
សៀមរាប៖ រយៈពេល៤ខែ ដើមឆ្នាំ២០១៩នេះ ភ្ញៀវទេសចរដែលបានទិញសំបុត្រចូលទស្សនារមណីយដ្ឋានអង្គរបានថយចុះជាង៧ភាគរយ បើធៀបនឹងរយៈពេលដូចគ្នាកាលពីឆ្នាំទៅ។ រីឯចំណូលពីនេះ ក៏មានការថយចុះជាង ៨ភាគរយដែរ។ នេះបើយោងតាមសេចក្ដីប្រកាសព័ត៌មានរបស់គ្រឹះស្ថានអង្គរ។
គ្រឹះស្ថានអង្គរបានធ្វើរបាយការណ៍ខ្លី ពីចំនួនទេសចរបរទេស ដែលចូលទិញសំបុត្រទស្សនារមណីយដ្ឋានអង្គរ ក៏ដូចជាចំណូលពីការលក់។ ក្នុងនោះ នារយៈពេល៤ខែដើមឆ្នាំ២០១៩ ភ្ញៀវទេសចរបរទេសសរុបចំនួន ៩៧៣,៣០៥នាក់ បានទិញសំបុត្រចូលទស្សនារមណីយដ្ឋានអង្គរ ដែលចំនួននេះថយចុះជាង ៧ភាគរយ។ រីឯចំណូលដែលទទួលបានពីការលក់សំបុត្រនេះដែរ មានចំនួន ៤៤,១៣៤,៦៣៥ដុល្លារ ថយចុះ ៨.៥៤ភាគរយ ធៀបនឹងឆ្នាំទៅ។ ចំណូលទាំងនេះ បានឧបត្ថម្ភចូលមូលនិធិគន្ធបុប្ជាសរុបចំនួន ១,៩៤៦,៦១០ដុល្លារ។
គួររម្លឹកថា តម្លៃសំបុត្រសម្រាប់ទស្សនារមណីយដ្ឋានអង្គររយៈពេលមួយថ្ងៃតម្លៃ ៣៧ដុល្លារ តម្លៃ ៦២ដុល្លារសម្រាប់រយៈពេល៣ថ្ងៃ និងតម្លៃ៧២ដុល្លារ សម្រាប់រយៈពេលមួយសប្ដាហ៍។ រដ្ឋាភិបាលបានសម្រេចផ្លាស់ប្ដូរតម្លៃលក់សំបុត្រនេះ ចាប់ពីដើមខែ សីហា ឆ្នាំ២០១៦មក ក្រោយពីដកហូតសិទ្ធិគ្រប់គ្រងពីក្រុមហ៊ុន សុខា មកឱ្យគ្រឹះស្ថានអង្គរ ដែលជាស្ថាប័នរបស់រដ្ឋគ្រប់គ្រងជំនួស។ តម្លៃចាស់សម្រាប់សំបុត្រទស្សនាមួយថ្ងៃ តម្លៃ២០ដុល្លារ តម្លៃ៤០សម្រាប់ទស្សនា៣ថ្ងៃ និងតម្លៃ៦០សម្រាប់ទស្សនាមួយសប្ដាហ៍៕
© រក្សាសិទ្ធិដោយ thmeythmey.com