សាលាអន្តរជាតិ វេសវីយូ កម្ពុជា រៀបចំពិព័រណ៍STEM លើកទី១ ក្នុងការលើកកម្ពស់ការយល់ដឹង

អត្ថបទពាណិជ្ជកម្ម

សាលាអន្តរជាតិ វេសវីយូ កម្ពុជា រៀបចំពិព័រណ៍STEM លើកទី១ ក្នុងការលើកកម្ពស់ការយល់ដឹង

05, May 2019 , 2:27 pm

រូបភាព

ដោយ: ថ្មីៗ

ថ្ងៃទី០៤ ខែឧសភា ឆ្នាំ២០១៩ សាលាអន្តរជាតិ វេសវីយូ កម្ពុជា បានរៀបចំពិព័រណ៍ស្ទែម (STEM)លើកទី១ នៅក្នុងបរិវេណអគារសិក្សាថ្មីដ៏ទំនើបរបស់ខ្លួន ដែលមានទីតាំងជាប់នឹងសាលាអន្តរជាតិលើននីង ចាំងហ្គល (សាខាបឋមសិក្សា) អាស័យដ្ឋានផ្ទះលេខ២៥៤AK ផ្លូវ៥៩៨ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។

នៅក្នុងពិព័រណ៍នេះ សាលាបានរៀបចំការពិសោធន៍ និងការបង្ហាញនានា ពាក់ព័ន្ធនឹងផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (ស្ទែម) ជូនដល់សិស្សានុសិស្ស និងអ្នកចូលរួមទាំងអស់ ព្រមទាំងបានរៀបចំសិក្ខាសាលា សម្រាប់មាតាបិតា និងអាណាព្យាបាលរបស់សិស្ស ស្តីពី «វិធីសាស្ត្រជួយកូនៗ ឲ្យទទួលភាពជោគជ័យក្នុងការសិក្សា» ផងដែរ។ សិក្ខាសាលានេះ ត្រូវបានរៀបចំ និងធ្វើបទបង្ហាញដោយលោកស្រី Melissa Ream ដែលជានាយិកាកម្មវិធីសិក្សា និងជាគ្រូដែលមានអាជ្ញាប័ណ្ណ និងបទពិសោធន៍បង្រៀនរយៈពេល១៥ឆ្នាំ មកពីសហរដ្ឋអាមេរិក។

គោលបំណងនៃការរៀបចំពិព័រណ៍នេះឡើង គឺដើម្បីលើកកម្ពស់ការយល់ដឹងរបស់អ្នកចូលរួមទាំងអស់ពីសារៈសំខាន់របស់ស្ទែមនៅក្នុងជីវភាពរស់នៅប្រចាំថ្ងៃ ជាពិសេសនៅក្នុងសង្គមសម័យទំនើបដែលមានទិន្នាការឆ្ពោះទៅរកវិស័យវិទ្យាសាស្ត្រនិងបច្ចេកវិទ្យា និងផ្ដោតការយកចិត្តទុកដាក់ខ្លាំងទៅលើការស្រាវជ្រាវ។

លោក Antoine de Saint-Exupery បានលើកឡើងថា៖ «ប្រសិនបើយើងចង់ផលិតកប៉ាល់មួយឲ្យបានជោគជ័យ ដើម្បីធ្វើដំណើរឆ្លងសមុទ្រ យើងគប្បីបង្រៀនក្រុមការងាររបស់យើងទាំងអស់ ដោយចាប់ផ្តើមចេញពីការបណ្តុះគំនិតឲ្យអ្នកទាំងនោះស្រលាញ់ និងចូលចិត្តការធ្វើដំណើរតាមសមុទ្រ ដែលមានវិសាលភាពដ៏ធំល្វឹងល្វើយ ជំនួសឲ្យការដែលគ្រាន់តែដាក់ចេញនូវបទបញ្ជា ឬការបែងចែកទំនួលខុសត្រូវ និងភារកិច្ចក្នុងការផលិត»។

ក្នុងន័យនេះ ពិព័រណ៍ស្ទែម បានដើរតួយ៉ាងសំខាន់ ក្នុងការចូលរួមចំណែកបំផុស និងជំរុញលើកទឹកចិត្តឲ្យសិស្សានុសិស្ស ងាកមកចាប់អារម្មណ៍លើវិស័យនេះ ហើយត្រូវត្រៀមខ្លួន និងកសាងមូលដ្ឋានគ្រឹះ ឲ្យបានរឹងមាំ នៅកម្រិតមធ្យមសិក្សា ដោយខិតខំយកចិត្តទុកដាក់សិក្សាបន្ថែម លើមុខវិជ្ជាស្នូល ដូចជា គណិតវិទ្យា រូបវិទ្យា គីមីវិទ្យា និងជីវវិទ្យា ជាដើម ។ជាពិសេសជ្រើសរើសយកគ្រឹះស្ថានមធ្យមសិក្សាមួយ ដែលមានគុណភាពកម្រិតស្តង់ដារអន្តរជាតិ ដូចជា សាលាអន្តរជាតិ វេសវីយូ កម្ពុជា ដើម្បីបន្តការសិក្សារបស់ខ្លួន។

គួររំលឹកថា សាលាអន្តរជាតិ វេសវីយូ កម្ពុជា គឺជាគ្រឹះស្ថានសិក្សាលំដាប់អន្តរជាតិថ្មីមួយ ដែលផ្តល់នូវសេវាកម្មអប់រំកម្រិតមធ្យមសិក្សា ចាប់ពីថ្នាក់ទី៧ ដល់ទី១២ និងត្រូវបានបង្កើតឡើង បន្តពីសាលាអន្តរជាតិ លើននីង ចាំងហ្គល ដែលបាននិងកំពុងផ្តល់នូវសេវាកម្មអប់រំប្រកបដោយគុណភាព និងទំនុកចិត្តនៅកម្រិតមត្តេយ្យសិក្សា និងបឋមសិក្សា អស់រយៈពេលប្រមាណ៥ឆ្នាំមកហើយ។

កម្មវិធីសិក្សារបស់សាលាអន្តរជាតិ វេសវីយូ កម្ពុជា មានលក្ខណៈពិសេស ដោយមានការច្របាច់បញ្ចូលគ្នារវាង American Common Core Standards (ACCS) ដែលជាស្តង់ដារអប់រំដ៏ល្បីកម្រិតពិភពលោក ជាមួយ និងកម្មវិធីសិក្សាភាសាខ្មែរ ដែលស្របតាមនិងទទួលស្គាល់ដោយក្រសួងអប់រំ យុវជន និងកីឡា។ ចក្ខុវិស័យរបស់សាលាអន្តរជាតិ វេសវីយូ កម្ពុជា គឺចូលរួមចំណែកបណ្តុះបណ្តាលធនធានមនុស្សរបស់កម្ពុជា ឲ្យក្លាយជាធនធានសកល ហើយរក្សាបាននូវគុណតម្លៃ វប្បធម៌ និងអត្តសញ្ញាណជាខ្មែរ