អន្តរជាតិ
ស៊ុលតង់ព្រុយណេ ប្រកាសផ្អាកអនុវត្តទោសប្រហារជីវិត ក្រោយរងការរិះគន់ជុំទិស
× ស៊ុលតង់ព្រុយណេ ហាសាណាល់ ប៊ុលគៀ នៅថ្ងៃទី៥ ខែឧសភា បានប្រកាសផ្អាកការអនុវត្តទោសប្រហារជីវិតដែលមានចែងក្នុងច្បាប់ព្រហ្មទណ្ឌថ្មីដ៏ចម្រូងចម្រាស។ ច្បាប់ថ្មីនេះរងការរិះគន់ជុំទិស និងត្រូវបានចាត់ទុកថា មានការរើសអើសក្រុមបុរសស្រឡាញ់ភេទដូចគ្នារហូតដល់ថ្នាក់មានការដាក់ទោសទណ្ឌប្រហារជីវិតទៀតផង។ តារាបរទេសល្បីជាច្រើន បានចេញមុខអំពាវនាវឲ្យព្រុយណេលុបចោលការអនុវត្តទោសធ្ងន់ធ្ងរបែបនេះ ឯខ្លះទៀតប្រកាសមិនចូលដេកសណ្ឋាគាររបស់ស៊ុលតង់អង្គនេះផង។
ជារឿងកម្របំផុតមួយ មហាក្សត្រព្រុយណេ ស៊ុលតង់ ហាសាណាល់ បុលគៀ បានឆ្លើយតបជាសាធារណៈទៅនឹងពាក្យរិះគន់ជុំវិញការអនុវត្តច្បាប់ឥស្លាមដ៏តឹងរ៉ឹង ដែលក្រុមការពារសិទ្ធិមនុស្សចាត់ទុកជាការបំពានសិទ្ធិមនុស្សធ្ងន់ធ្ងរ ពិសេសក្រុមស្រឡាញ់ភេទដូចគ្នាក្នុងប្រទេសសម្បូរប្រេងមួយនេះ។ ក្រោមច្បាប់ព្រហ្មទណ្ឌថ្មី បុគ្គលដែលរកឃើញថា រួមភេទជាមួយភេទដូចគ្នា នឹងត្រូវកាត់ទោសដោយការគប់ដុំថ្មរហូតស្លាប់។
ប្រទេសជាច្រើន អង្គការសិទ្ធិមនុស្ស បូកទាំងអង្គការសហប្រជាជាតិ និងតារាសម្ដែងល្បីៗពេញពិភពលោក សុទ្ធតែរិះគន់ច្បាប់ថ្មីដែលកំណត់កាត់ដៃជើងសម្រាប់បទល្មើសលួច ហើយដែលចូលធរមានកាលពីខែមេសាកន្លងទៅ។ ថ្លែងនៅថ្ងៃទី៥ ខែឧសភា ស៊ុលតង់ព្រុយណេ បានទទួលស្គាល់ពីការយល់ខុស និងសំណួរជាច្រើនទាក់ទិនការអនុវត្តច្បាប់ថ្មីនេះ។ ស៊ុលតង់អង្គនេះមានបន្ទូលថា ច្បាប់ឥស្លាមនេះ មិនគួរបង្កឲ្យមានការព្រួយបារម្ភឡើយ ព្រោះជាក្ដីមេត្តារបស់ព្រះ។
តាមពិតទៅ នៅព្រុយណេ បទល្មើសជាច្រើន ត្រូវបានកំណត់ឲ្យមានការដាក់ទោសប្រហារជីវិតដូចជាការធ្វើឃាតដោយចេតនា និងការរត់ពន្ធគ្រឿងញៀនជាដើម។ ប៉ុន្តែតាំងពីឆ្នាំ១៩៩០ មក គេមិនទាន់ឃើញមានការដាក់ទោសធ្ងន់បែបនេះឡើយ។ ក្នុងសេចក្ដីថ្លែងការណ៍តាមទូរទស្សន៍ ព្រះចៅ ប៊ុលគៀ មានបន្ទូលរំឭកពីការផ្អាកអនុវត្តទោសប្រហារជីវិតនេះ ហើយក៏ប្រកាសថា ការផ្អាកនេះ ក៏អនុវត្តលើបទល្មើសដែលមានចែងក្នុងច្បាប់ថ្មីនេះដែរ។
ក្នុងសុន្ទរកថាជាភាសាអង់គ្លេសដែលចេញដោយរាជវាំង ស៊ុលតង់ព្រុយណេមានបន្ទូលសង្កត់ធ្ងន់ពីសារសំខាន់របស់ច្បាប់សាសនាឥស្លាម ដែលដើរទន្ទឹមគ្នាជាមួយច្បាប់រដ្ឋ ហើយមានគោលដៅធានាសន្តិភាព និងភាពសុខដុមរបស់ប្រទេស។ នេះជាក៏ជារឿងកម្រទៀត ដែលរាជវាំងព្រុយណេចេញសុន្ទរកថារបស់ទ្រង់ដែលបកប្រែជាភាសាអង់គ្លេសបែបនេះ។
ក្រោយការចូលធរមានផ្នែកចុងក្រោយដ៏ចម្រូងចម្រាសនៃច្បាប់ឥស្លាមនេះ ពាក្យរិះគន់បានធ្លាក់លើរដ្ឋអាស៊ានមួយនេះយ៉ាងខ្លាំង។ តារាសំដែងអាមេរិក George Clooney តន្ត្រីករអង់គ្លេស Elton John បានស្នើឲ្យមានការធ្វើពហិការសណ្ឋាគារកាន់កាប់ដោយប្រមុខរដ្ឋព្រុយណេដូចជា សណ្ឋាគារ Dorchester ក្នុងទីក្រុងឡុងដ៍ និងសណ្ឋាគារ Beverly Hills នៅអាមេរិកជាដើម៕
Tag:
ព្រុយណេ
Hassanal Bolkiah
© រក្សាសិទ្ធិដោយ thmeythmey.com