លោក ពូទីន បញ្ជាស៊ើបអង្កេតឲ្យល្អិតល្អន់ជុំវិញហេតុការណ៍ឆេះយន្តហោះសម្លាប់មនុស្ស៤១នាក់

អន្តរជាតិ

លោក ពូទីន បញ្ជាស៊ើបអង្កេតឲ្យល្អិតល្អន់ជុំវិញហេតុការណ៍ឆេះយន្តហោះសម្លាប់មនុស្ស៤១នាក់

06, May 2019 , 3:28 pm

រូបភាព

ដោយ:

យន្តហោះដឹកអ្នកដំណើរមួយគ្រឿងរបស់រុស្ស៊ី ផ្ទុះឆាបឆេះក្នុងអណ្តាតភ្លើង ក្រោយពីចុះចតយ៉ាងបន្ទាន់មួយ នៅអាកាសយានដ្ឋានដ៏មមាញឹកបំផុតរបស់ទីក្រុងមូស្កូ កាលពីម៉ោង ៦ល្ងាច (ម៉ោងក្នុងស្រុក) ថ្ងៃទី៥ ខែឧសភា។ ក្នុងហេតុការណ៍នេះ មនុស្ស៤១បាត់បង់ជីវិត និង៣៧នាក់ផ្សេងទៀត សំណាងល្អនៅរស់រានមានជីវិត។

វីដេអូគួរឲ្យរន្ធត់មួយ ដែលបង្ហោះលើបណ្តាញសង្គម បង្ហាញពីទិដ្ឋភាពយន្តហោះធុន Sukhoi Superjet 100 របស់ក្រុមហ៊ុនរុស្ស៊ី Aeroflot ផ្ទុះឆេះនៅផ្នែកខាងក្រោយពេលចុះចតជាបន្ទាន់ក្នុងល្បឿនដ៏លឿននៅលើផ្លូវយន្តហោះនៅអាកាសយានដ្ឋានអន្តរជាតិ Sheremetyevo ។ ក្រោយមក អណ្តាតភ្លើងឆាបឆេះឡើងពីតួយន្តហោះតែម្តង។

យោងតាមសេចក្តីថ្លែងការណ៍របស់គណៈកម្មការស៊ើបអង្កេតរបស់រុស្ស៊ី នៅលើយន្តហោះ មានមនុស្សសរុប ៧៨នាក់ រួមទាំងអ្នកបម្រើការលើយន្តហោះផងដែរ។ ក្នុងចំណោមនោះ មនុស្ស ៤១នាក់ស្លាប់ និងគិតមកទល់ពេលនេះ មនុស្ស ៣៧នាក់ រួចខ្លួនមានជីវិត។ បើតាមទីភ្នាក់ងារព័ត៌មាន AFP យន្តហោះនេះ មានគោលដៅហោះហើរចេញពីអាកាសយានដ្ឋានអន្តរជាតិ Sheremetyevo ទៅកាន់ទីក្រុង Murmansk ភាគពាយព្យនៃរុស្ស៊ី។

យ៉ាងណាមិញ អាជ្ញាធររុស្ស៊ី ពុំទាន់បញ្ជាក់ឲ្យច្បាស់លាស់ពីមូលហេតុនៃឧបទ្ទវហេតុនេះនៅឡើយទេ។ ទោះបីជាបែបនេះក្តី ប្រធានាធីបតីរុស្ស៊ី លោក វ្ល៉ាឌីមៀ ពូទីន បានបង្ហាញការសោកស្តាយទៅកាន់សាច់ញាតិជាទីស្រឡាញ់របស់ជនរងគ្រោះ និងបាននិយាយថា ការស៊ើបអង្កេត ត្រូវធ្វើឡើងឲ្យបានល្អិតល្អន់ និងឆាប់បំផុត។ បើតាមប្រភពវិមានក្រេមឡាំង នាយករដ្ឋមន្ត្រីរុស្ស៊ី លោក Dmitry Medvedev បានបញ្ជាគណៈកម្មការពិសេសឲ្យបើកការស៊ើបអង្កេតក្នុងរឿងនេះ៕