អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
កាលពីចុងសប្ដាហ៍មុន អង្គការសហប្រជាជាតិបានព្រមានពីវិបត្តិស្បៀងអាហារធ្ងន់ធ្ងរដែលអាចកើតឡើងនៅកូរ៉េខាងជើង។ បើតាមរបាយការណ៍ កូរ៉េខាងជើង បានកាត់បន្ថយរបបអាហាប្រចាំថ្ងៃយល់កម្រិតទាបបំផុត ព្រោះមិនមានស្បៀងគ្រប់គ្រាន់។ គ្រោះធម្មជាតិដូចជាទឹកជំនន់ និងគ្រោះរាំងស្ងួតជាដើម ជាមូលហេតុសំខាន់ដែលធ្វើឲ្យកូរ៉េខាងជើងប្រមូលតិចមិនធ្លាប់មានក្នុងរយៈពេលមួយទសវត្សរ៍ចុងក្រោយ ខណៈទណ្ឌកម្មរាប់សិបជាន់ ក៏ជាកត្តាបង្កមួយដែរ។ 
កម្មវិធីស្បៀងអាហារពិភពលោក (WFP) និងអង្គការស្បៀងអាហារ និងកសិកម្ម (FAO) របស់អង្គការសហប្រជាជាតិ បានចេញផ្សាយរបាយការណ៍មួយ ដែលបានព្រមានពីការកើតឡើងវិបត្តិមនុស្សធម៌ដ៏អាក្រក់នៅកូរ៉េខាងជើង។ ក្នុងរបាយការណ៍វាយតម្លៃរួមគ្នានេះ ប្រជាជនកូរ៉េខាងជើងជាង១០លាននាក់ ជួបបញ្ហាកង្វះអាហារយ៉ាងធ្ងន់ធ្ងរ ព្រោះការប្រមូលផលបានទាបយ៉ាងខ្លាំង មិនធ្លាប់មានក្នុងរយៈពេល១០ឆ្នាំចុងក្រោយមកនេះ។
អង្គការអន្តរជាតិទាំងពីរ បានចុះត្រួតពិនិត្យដោយផ្ទាល់នៅកូរ៉េខាងជើង ចំនួនពីរដងកាលពីឆ្នាំ២០១៨ ដោយបានវាយតម្លៃសន្តិសុខស្បៀងអាហារ ទៅពិនិត្យកសិដ្ឋាន ទីជនបទ និងទីក្រុង ក៏ដូចជាមជ្ឈមណ្ឌលបែងចែកទិន្នផល។ ក្រុមស៊ើបអង្កេត WFP និង FAO ក៏រកឃើញថា តាំងពីខែមករា ឆ្នាំ២០១៩ ក្រុងព្យុងយ៉ាងបានបង្ខំចិត្តកាត់បន្ថយបរិមាណអាហារចំនួន៣០០ក្រាមក្នុងមួយថ្ងៃ ដែលបរិមាណនេះតិចជាពេលក្នុងឆ្នាំ២០១៨ ដែលមានចំនួន៣៨០ក្រាម។
លើសពីនោះ ក្រុមគ្រួសារកូរ៉េខាងជើង ទទួលទានអាហារមានប្រូតេអ៊ីនតិចតួច ហើយអាហារភាគច្រើនគឺមានតែបាយ និងគីមឈីប៉ុណ្ណោះ។ លោក Nicolas Bidault សហប្រធានក្រុមស៊ើបអង្កេត ចាត់ទុកស្ថានភាពបែបនេះ ជាការគួរឲ្យព្រួយបារម្ភ ព្រោះសហគមន៍ជាច្រើនប្រឈមមុខបញ្ហាខ្លាំង ហើយការកាត់បន្ថយរបបអាហារកាន់តែទាប នឹងធ្វើឲ្យប្រជាជនកូរ៉េខាងជើងធ្លាក់ក្នុងវិបត្តិអាហារមិនខាន។ បើគ្មានជំនួយទេនោះ ការកាត់បន្ថយអាហារ នឹងកើតឡើងនៅអំឡុងខែមិថុនា ដល់ខែតុលានេះមិនខាន។
ជាមួយការព្រមានពីហានិភ័យផ្នែកស្បៀងអាហារនៅប៉ុន្មានខែខាងមុខនេះ របាយការណ៍របស់អង្គការស្បៀងអាហារទាំងពីរបាន បានលើកឡើងពីភាពចាំបាច់ នៃជំនួយដើម្បីទប់ស្កាត់ការធ្លាក់ចុះផលិតកម្មអាហារ។ រលកកម្ដៅខ្លាំង ទឹកជំនន់ គ្រោះរាំងស្ងួតដែលអូសបន្លាយយូរ សុទ្ធសឹងជាមូលហេតុ ដែលធ្វើឲ្យការប្រមូលផលរបស់កូរ៉េខាងជើងធ្លាក់ចុះ។ របាយការណ៍ដដែលនេះ ក៏ចង្អុលដល់ទណ្ឌកម្មអន្តរជាតិ ដែលជះឥទ្ធិពលអវិជ្ជមាន លើវិស័យកសិកម្មប្រទេសនេះដែរ។
ទណ្ឌកម្មដែលសំដៅបញ្ឈប់កូរ៉េខាងជើង ពីការអនុវត្តកម្មវិធីនុយក្លេអ៊ែរនោះ បានរឹតត្បិតការនាំចូលគ្រឿងម៉ាស៊ីន ការនាំចូលប្រេង និងគ្រឿងបន្លាស់ ហើយវាក៏នាំឲ្យកសិករកូរ៉េខាងជើងរងគ្រោះទៅវិញ។ របាយការណ៍ខាងលើ ទំនងជាឱកាសសម្រាប់ការស្នើ ឲ្យមានការបន្ធូរបន្ថយទណ្ឌកម្មខ្លះ លើកូរ៉េខាងជើង ពិសេសការបន្ថយការហាមឃាត់ លើការនាំចូលគ្រឿងយន្តកសិកម្ម និងការបើកផ្លូវឲ្យមានការផ្ដល់ជំនួយកាន់តែទូលាយ៕
Tag:
UN
កូរ៉េខាងជើង
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
