ជាតិ
នយោបាយជាតិ
មន្ត្រី UN ថ្លែងនៅមុខសម្តេចថា «ដើម្បីបោះជំហានទៅមុខ ត្រូវយកចិត្តទុកដាក់រវាងសេដ្ឋកិច្ចនិងសិទ្ធិមនុស្ស...»
ជំនួបរវាងសម្តេចនាយករដ្ឋមន្រ្តី និង អ្នកស្រី Pauline Tamesis នៅវិមានសន្តិភាព នាថ្ងៃទី៦ ខែឧសភា ឆ្នាំ២០១៩
×![]()
ដោយ: ថ្មីៗ
អ្នកស្រី Pauline Tamesis អ្នកសម្របសម្រួលអង្គការសហប្រជាតិ (UN) ប្រចាំកម្ពុជា បានដឹកនាំគណៈប្រតិភូទៅចូលរួមប្រជុំប្រចាំឆ្នាំជាមួយសម្តេចនាយករដ្ឋមន្ត្រី ហ៊ុន សែន នៅថ្ងៃទី៦ ខែឧសភា ឆ្នាំ២០១៩។ 
មន្ត្រីនៃការិយាល័យអ្នកសម្របសម្រួលអង្គការសហប្រជាជាតិ បានស្រង់ប្រសាសន៍របស់អ្នកស្រី Pauline Tamesis ដែលនិយាយនៅចំពោះមុខសម្តេច ហ៊ុន សែន ទៅសរសេរក្នុងសេចក្តីប្រកាសព័ត៌មានយ៉ាងដូច្នេះថា «ដើម្បីបោះជំហានទៅមុខ ទាមទារឲ្យមានការយកចិត្តទុកដាក់ខ្ពស់ជាអាទិភាពរវាងតុល្យភាពនៃកំណើនសេដ្ឋកិច្ចជាមួយនឹងការការពារបរិស្ថាន ការការពារសិទ្ធិមនុស្ស និងការលើកកម្ពស់គោលដៅសង្គម ដើម្បីធានាថា ប្រជាជនក្រីក្រ ត្រូវបានការពារពីហានីភ័យ និង ធានាថា វិបុលភាព ត្រូវបានចែករំលែកប្រកបដោយសមធម៌ ហើយជំនាន់ក្រោយៗទៀត ក៏ទទួលបានអត្ថប្រយោជន៍ពីការសម្រេចចិត្តថ្ងៃនេះ អំពីរបៀបដែលធនធានត្រូវបានគ្រប់គ្រង»។
សម្តេចនាយករដ្ឋមន្ត្រី តបទៅអ្នកស្រី ថា កាលពីដើមឡើយ កម្ពុជា មានភាពក្រីក្ររហូតដល់១០០ភាគរយឯណោះ ហើយក្រោយមក ក៏មានការចាប់ផ្ដើមផ្ដល់កិច្ចគាំពារសង្គមទៅដល់ស្ត្រីដែលមានផ្ទៃពោះ បន្ទាប់មកដល់ស្ត្រីដែលធ្វើការនៅតាមរោងចក្រ និងបន្ទាប់មកទៀតគឺទៅដល់ស្ត្រីដែលមានភាពក្រីក្រ ហើយក៏បានធ្វើការមួយចំនួនថែមទៀត រួមទាំងការកាត់បន្ថយថ្លៃអគ្គិសនី ការកសាងហេដ្ឋារចនាសម្ព័ន្ធ ការជីកអណ្តូងទឹក ជីកស្រះទឹកជាដើម ដែលទាំងអស់នេះសុទ្ធសឹងតែជាការគាំពារសង្គម។ នេះបើតាមសំណេរលើទំព័រហ្វេសប៊ុករបស់សម្តេចនាយករដ្ឋមន្ត្រី។
ក្នុងជំនួបនោះ អ្នកស្រី បានលើកឡើងពីចំណុចសំខាន់ៗ៣ រួមមាន កម្មវិធីគាំពារសង្គម ទិន្នន័យសម្រាប់ការអភិវឌ្ឍ និងវឌ្ឍនភាពនៃការអនុវត្តគោលដៅអភវិឌ្ឍន៍ប្រកបដោយចីរភាព។
បន្ទាប់ពីបញ្ចប់ជំនួប មានការចុះហត្ថលេខាលើក្របខ័ណ្ឌជំនួយអភិវឌ្ឍន៍អង្គការសហប្រជាជាតិ (UNDAF) ២០១៩ ដល់ ២០២៣ រវាងអ្នកស្រី Pauline Tamesis និង លោក ប្រាក់ សុខុន រដ្ឋមន្ត្រីក្រសួងការបរទេស។ ក្របខ័ណ្ឌ UNDAF ផ្តោតលើអាទិភាពនៃការអភិវឌ្ឍ៥យ៉ាង គឺ ការពង្រីកឱកាសសង្គម ការពង្រីកឱកាសសេដ្ឋកិច្ច ការលើកកម្ពស់ការរស់នៅប្រកបដោយចីរភាព ការពង្រឹងការចូលរួម និង គណនេយ្យភាព និង ការគ្រប់គ្រងនគរូបនីយកម្ម៕
Tag:
UN
កម្ពុជា
ហ៊ុន សែន
Pauline Tamesis
© រក្សាសិទ្ធិដោយ thmeythmey.com
