ជាតិ
ក្នុងចំណោមបរទេសនៅខ្មែរ ចិនប្រព្រឹត្តបទល្មើស និងរងគ្រោះច្រើនជាងគេ រូបភាពពីក្រសួងមហាផ្ទៃ
× ជនបរទេសទទួលរងគ្រោះក្នុងត្រីមាសទី១ នៃឆ្នាំ២០១៩នេះ មានប្រមាណ១៦០ករណី ដែលមានជនរងគ្រោះសរុបជាង២០០នាក់ ក្នុងនោះ ជនជាតិចិនជិត១០០នាក់ ទទួលរងគ្រោះ ដែលជាចំនួនច្រើនជាងគេ។ ចំណែកជនប្រព្រឹត្តបទល្មើសច្រើនជាងគេ ក៏ជាជនជាតិចិនដែរ គឺមានជាង២០០នាក់ឯណោះ។ នេះបើតាមការចេញផ្សាយលើទំព័រហ្វេសប៊ុករបស់ក្រសួងមហាផ្ទៃថ្ងៃទី៧ឧសភា ឆ្នាំ២០១៩។
លោក ថោង លីម អគ្គស្នងការរងនៃអគ្គស្នងការដ្ឋាននគរបាលជាតិ បានបើកកិច្ចប្រជុំ នៅទីស្តីការក្រសួងមហាផ្ទៃ នាថ្ងៃទី៧ ខែឧសភា ឆ្នាំ២០១៩ អំពីលទ្ធផលកិច្ចសហប្រតិបត្តិការក្រុមព័ត៌មានទាន់ហេតុការណ៍ (HOT LINE) ជាមួយជនបរទេសនៅកម្ពុជាប្រចាំត្រីមាសទី១ឆ្នាំ២០១៩។ ក្រុមព័ត៌មានទាន់ហេតុការណ៍ បានបង្ហាញថា ជនបរទេសទទួលរងគ្រោះសរុបជាង១៦០ករណី និងប្រព្រឹត្តបទល្មើស៨២ករណី ដោយក្នុងនោះជនរងគ្រោះនិងជនបរទេសដែលប្រព្រឹត្តបទល្មើសច្រើនជាគេ គឺជាជនជាតិចិន។
ជនបរទេសដែលរងគ្រោះ រួមមាន ចិន៩៨នាក់, បារាំង១២នាក់, អង់គ្លេស១១នាក់, អាល្លឺម៉ង់៩នាក់, និង អាមេរិក៧នាក់។ ជនបរទេសដែលប្រព្រឹត្តបទល្មើស រួមមាន ចិនជាង២០០នាក់, វៀតណាម៤៩នាក់, ថៃ២៦នាក់, កូរ៉េខាងត្បូង៤នាក់, និង អាមេរិក ៣នាក់។
តាមរបាយការណ៍របស់ក្រុម Hotline ជនបរទេស មានបណ្តឹងសុំអន្តរាគមន៍ពីជនបរទេសនិងស្ថានទូតចំនួន១១ករណី ហើយបានដោះស្រាយបញ្ចប់៨ករណី និងមិនទាន់បញ្ចប់៣ករណី(ស្ថិតក្នុងការស៊ើបអង្កេត)។ សមត្ថកិច្ច នឹងបន្តស៊ើបអង្កេតស្រាវជ្រាវ និងដោះស្រាយករណីបណ្ដឹងដែលនៅសល់ បង្កើនការយកចិត្តទុកដាក់ការពារសន្តិសុខ សុវត្ថិភាព និងសណ្តាប់ធ្នាប់សាធារណៈ រួមជាមួយនឹងការបន្តជួបពិភាក្សាការងារជាមួយគ្រប់ភាគីពាក់ព័ន្ធទាំងអស់ ដើម្បីដោះស្រាយបញ្ហានានា៕
© រក្សាសិទ្ធិដោយ thmeythmey.com