អន្តរជាតិ
សមុទ្រចិនខាងត្បូង៖ ចិនទទូចឲ្យអាមេរិកឈប់បង្ករឿង និងព្រមានប្រើគ្រប់មធ្យោបាយការពារអធិបតេយ្យខ្លួន
× រដ្ឋាភិបាលក្រុងប៉េកាំង បានប្រតិកម្មជាថ្មីទៅនឹងរដ្ឋាភិបាលក្រុងវ៉ាស៊ីនតោនពាក់ព័ន្ធការធ្វើសកម្មភាពនៅក្នុងសមុទ្រចិនខាងត្បូង។ ក្រុងប៉េកាំង បានចោទក្រុងវ៉ាស៊ីនតោនថាមានចេតនាបង្ករឿង និងទទូចឲ្យបញ្ឈប់សកម្មភាពបំពានក្នុងដែនអធិបតេយ្យរបស់ខ្លួនក្នុងដែនទឹកសមុទ្រចិនខាងត្បូងទៀតផង។
តាមរបាយការណ៍ក្នុងសន្និសីទសារព័ត៌មានប្រចាំថ្ងៃរបស់ក្រសួងការបរទេសចិន នៅថ្ងៃ៦ ឧសភា មាននាវាល្បាតរបស់អាមេរិកពីរគ្រឿង បានធ្វើដំណើរចូលទៅកៀកនឹងតំបន់កោះរបស់ចិនដែលស្ថិតនៅក្នុងដែនទឹកសមុទ្រចិនខាងត្បូងដោយគ្មានការអនុញ្ញាតពីរដ្ឋាភិបាលចិនជាមុនឡើយ។ សកម្មភាពនេះ ត្រូវបានរដ្ឋាភិបាល ចាត់ទុក ថាបានបំពានអធិបតេយ្យរបស់ខ្លួនយ៉ាងធ្ងន់ធ្ងរ។
តាមការអះអាងថារបស់អ្នកនាំពាក្យក្រសួងការបរទេសចិន លោក Geng Shuang នារយៈសន្និសីទសារព័ត៌មានដដែលនោះ បានផ្ញើសារប្រឆាំងដាច់ខាតចំពោះសកម្មភាពបែបនេះ។ លោកអ្នកនាំពាក្យ បានចាត់ទុកសកម្មភាពនេះ ជាការបំផ្លាញសន្តិភាព សន្តិសុខ និងសណ្តាប់ល្អនៅក្នុងដែនទឹកពាក់ព័ន្ធ។
ឆ្លៀតឱកាសនោះផងដែរ លោក Geng Shuang បានគូសបញ្ជាក់ថា ក្រោមកិច្ចប្រឹងប្រែងចរចារវាងចិន និងរដ្ឋអាស៊ាន ស្ថានភាពនៅក្នុងសមុទ្រចិនខាងត្បូង បានមានភាពល្អប្រសើរជាបន្តបន្ទាប់។ លោក សង្កត់ធ្ងន់ថា៖«ចិន សូមទទូចឲ្យអាមេរិកបញ្ឈប់សកម្មភាពបង្ករឿង ហើយគោរពអធិបតេយ្យ និងផលប្រយោជន៍សន្តិសុខរបស់ចិន និងកិច្ចប្រឹងប្រែងរបស់ប្រទេសក្នុងតំបន់ក្នុងការការពារសន្តិភាព និងស្ថិរភាពនៅក្នុងសមុទ្រចិនខាងត្បូង»។
លោកអ្នកនាំពាក្យរូបនេះ ក៏បានប្រកាសជំហរត្រង់ៗរបស់ចិនយ៉ាងដូច្នេះ៖« ចិន នឹងបន្តចាត់គ្រប់វិធានការចាំបាច់ ក្នុងការការពារអធិបតេយ្យ សន្តិសុខ សន្តិភាព និងស្ថិរភាពនៅក្នុងសមុទ្រចិនខាងត្បូង»។
គួរជម្រាបផងដែរ សមុទ្រចិនខាងត្បូង គឺជាដែនជម្លោះមួយដែលមានរដ្ឋជាប់ពាក់ព័ន្ធដោយផ្ទាល់ដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ ភាគីរដ្ឋអាស៊ាន បានទាមទារគ្រប់គ្រងតំបន់ខ្លះនៅក្នុងសមុទ្រចិនខាងត្បូងដោយយោងតាមច្បាប់អន្តរជាតិ ដែលត្រួតស៊ីគ្នាទៅនឹងការទាមទាររបស់ចិន ដោយយោងតាមកត្តាប្រវត្តិសាស្ត្ររបស់ខ្លួននោះ។
គួរកត់សម្គាល់នោះ អាមេរិក បានមានសកម្មភាពយ៉ាងសកម្មទាំងតាមរយៈការចូលរួមក្នុងវេទិកាអន្តរជាតិ និងទាំងតាមរយៈការធ្វើសកម្មភាពផ្ទាល់ក្នុងតំបន់ជម្លោះ។ អាមេរិក ដែលមានសម្ព័ន្ធមិត្តរបស់ខ្លួនដូចជាវៀតណាម និងហ្វីលីពីនក្នុងភាគីជម្លោះ ជាញឹកញាប់បានបញ្ជូនទាំងនាវាល្បាត និងយន្តហោះល្បាតមកកាន់តំបន់នេះ ដែលធ្វើឲ្យចិន ផ្ទុះប្រតិកម្មជាបន្តបន្ទាប់ផងដែរ៕
Tag:
ចិន
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com