អាមេរិក លើកលែងទណ្ឌកម្មលើមេចារកម្មវ៉េណេស៊ុយអេឡាដែលរត់ចោលលោក ម៉ាឌុយរ៉ូ

អន្តរជាតិ

អាមេរិក លើកលែងទណ្ឌកម្មលើមេចារកម្មវ៉េណេស៊ុយអេឡាដែលរត់ចោលលោក ម៉ាឌុយរ៉ូ

08, May 2019 , 11:47 am

រូបភាព

ដោយ: តន ចាន់រិទ្ធារ៉ា

សហរដ្ឋអាមេរិក នៅថ្ងៃទី៧ ខែឧសភា បានប្រកាសលើកលែងទណ្ឌកម្មលើមេចារកម្មវ៉េណេស៊ុយអេឡា ដែលរត់ចោលប្រធានាធិបតី នីកូឡាស់ ម៉ាឌុយរ៉ូ ហើយងាកទៅគាំទ្រមេដឹកនាំប្រឆាំង។ អនុប្រធានាធិបតីអាមេរិក ម៉ៃ ផេន ចាត់ទុកការលុបចោលទណ្ឌកម្មនេះ ជាកាដូទាក់ទាញសណ្ដានចិត្តបណ្ដាមេទ័ពវ៉េណេស៊ុយអេឡាផ្សេងទៀតឲ្យបោះបង់របបដឹកនាំលោក ម៉ាឌុយរ៉ូ ។ លោក ផេន ក៏ឆ្លៀតព្រមានចៅក្រមវ៉េណេស៊ុយអេឡា បើហ៊ានកាត់ទោសសមាជិកសភាដែលគាំទ្រលោក ហ័ន ក្វៃដូ ។

នាកម្មវិធីមួយនៅក្រសួងការបរទេសអាមេរិក អនុប្រធានាធិបតី ម៉ៃ ផេន បានប្រកាសដកទណ្ឌកម្មទាំងអស់ដែលដាក់លើឧត្តមសេនីយ៍ Manuel Ricardo Cristopher Figuera អតីតនាយកចារកម្មវ៉េណេស៊ុយអេឡា។ លោក Figuera បានអស់តំណែងក្រោយជាប់ពាក់ព័ន្ធក្នុងរដ្ឋប្រហារមិនបានសម្រេចមួយកាលពីសប្ដាហ៍មុន។ ឧត្តមសេនីយ៍រូបនេះអះអាងថា ការបោះបង់ប្រធានាធិបតី នីកូឡាស់ ម៉ាឌុយរ៉ូ គឺដើម្បីកសាងជាតិឡើងវិញ។

លោក ផេន សង្ឃឹមថា ការដកទណ្ឌកម្មពីអតីតមន្ត្រីជាន់ខ្ពស់រដ្ឋាភិបាលវ៉េណេស៊ុយអេឡារូបនេះ នឹងក្លាយជាឱកាសសម្រាប់មន្ត្រីផ្សេងទៀតដែលនៅត្រាំត្រែងជាមួយលោក ម៉ាឌុយរ៉ូ ចាកចេញដែរ។ អនុប្រធានាធិបតីអាមេរិករូបនេះបញ្ជាក់ថា ខណៈលោក ហ័ន ក្វៃដូ សា្ថបនាអនាគតភ្លឺស្វាងសម្រាប់វ៉េណេស៊ុយអេឡា ចំណាត់ការរបស់អាមេរិកពេលនេះ នឹងក្លាយជាការជំរុញចិត្តមន្ត្រីដទៃទៀតឲ្យដើរតាមឧត្តមសេនីយ៍ Figuera និងមន្ត្រីឯទៀតដែលបានគាំទ្រលោក ក្វៃដូ ។

ជាសារទៅកាន់ក្រុមមន្ត្រីវ៉េណេស៊ុយអេឡាដែលបន្តឈរជាមួយលោក ក្វៃដូ លោក ផេន អះអាងថា អាមេរិក នឹងពិចារណាលើកលែងទណ្ឌកម្មសម្រាប់មន្ត្រីដែលបោះជំហានទៅមុខដើម្បីគាំទ្រនីតិរដ្ឋ។ នេះបើតាមការផ្សាយរបស់ទីភ្នាក់ងារព័ត៌មាន AFP ។

ក្រោយការប្រកាសរបស់លោក ផេន ក្រសួងរតនាគារអាមេរិក ក៏បានបញ្ជាក់ពីព័ត៌មាននេះដែរ។ ក្នុងសេចក្ដីប្រកាសថ្ងៃទី៧ ខែឧសភា ក្រសួងដដែលនេះបញ្ជាក់ថា អាមេរិកបានបង្ហាញឆន្ទៈរបស់ខ្លួនតាមការលុបចោលទណ្ឌកម្មលើបុគ្គលដែលជាប់ឈ្មោះ ហើយដែលបានធ្វើសកម្មដ៏មានន័យដើម្បីស្ដារប្រជាធិបតេយ្យ និងងើបឡើងប្រឆាំងរបបដឹកនាំលោក ម៉ាឌុយរ៉ូ ។

អាមេរិក ហាក់បង្កើនការប្រឹងប្រែងរបស់ខ្លួនក្នុងការអូសទាញមន្ត្រីតូចធំនៅវ៉េណេស៊ុយអេឡា ដែលបន្តធ្វើការឲ្យលោក ម៉ាឌុយរ៉ូ បន្ទាប់ពីការប៉ុនប៉ងផ្ដួលរំលំមេដឹកនាំរូបនេះកាលពីសប្ដាហ៍មុន បានបរាជ័យ។ លោក ម៉ាឌុយរ៉ូ នៅតែទទួលបានការគាំទ្រពីក្រុមយោធាដដែល ទោះជាមានរបាយការណ៍ខ្លះបង្ហាញថា មានមេទាហានខ្លះបានសម្រេចចិត្តគាំទ្រគម្រោងបះបោរក្ដី។ ក្រោយព្រឹត្តការណ៍នេះ រដ្ឋាភិបាលក្រុងការ៉ាកាស់ ក៏ប្រកាសកាត់ទោសអ្នកជាប់ពាក់ព័ន្ធមិនឲ្យរួចខ្លួនឡើយ។

សមាជិកសភាចំនួន៧នាក់ដែលស្ថិតក្រោមការដឹកនាំរបស់លោក ក្វៃដូ ត្រូវបានសភានីតិបញ្ញត្តិដែលបង្កើតដោយលោក ម៉ាឌុយរ៉ូ ដកអភ័យឯកសិទ្ធិ ហើយប្រឈមមុខការកាត់ទោសករណីក្បត់ជាតិ។ តំណាងរាស្ត្រទាំងនេះ បានគាំទ្រការប៉ុនប៉ងផ្ដួលរំលំលោក ម៉ាឌុយរ៉ូ កាលពីសប្ដាហ៍មុន។ យ៉ាងណាមិញ អាមេរិកក៏ព្រមានដែរថា ខ្លួនដាក់ទណ្ឌកម្មលើចៅក្រមវ៉េណេស៊ុយអេឡាដែលចូលដៃចូលជើងជាមួយរបបលោក ម៉ាឌុយរ៉ូ ៕