អន្តរជាតិ
ឆ្នេរថៃដ៏ល្បីឈ្មោះមួយ បន្តបិទពីរឆ្នាំទៀតដើម្បីការពារបរិស្ថាន ប្រភពរូប៖ កាសែតបាងកកប៉ុស្តិ៍
× ឆ្នេរ Maya Bay របស់ថៃ ដែលត្រូវបានបិទចាប់តាំងពីខែមិថុនាឆ្នាំមុន នឹងត្រូវពន្យាពេលបិទបន្តរហូតដល់រយៈពេល២ឆ្នាំទៀត។ គោលដៅនៃការបិទជាបណ្តោះអាសន្ននេះ គឺធ្វើឡើងដើម្បីទុកពេលបន្ថែមទៀតឲ្យអេកូឡូស៊ីរបស់ឆ្នេរនេះលូតលាស់ឡើងវិញ ក្រោយខូចខាតដោយសារភ្ញៀវទេសចរមកលេងជាប់ៗគ្នាពេក។
ឆ្នេរ Maya Bay ដែលស្ថិតនៅលើកោះ Ko Phi Phi Ley មានបណ្តោយ២៥០ម៉ែត្រ និងទទឹង១៥ម៉ែត្រ។ ប្រជាប្រិយភាពរបស់ឆ្នេរនេះ ហក់ឡើងខ្ពស់ ក្រោយពីការចាក់បញ្ចាំងរឿងហូលីវ៉ូតដ៏ល្បីល្បាញមួយកាលពី១៩ឆ្នាំមុន ដោយមានចំណងជើងថា The Beach ។ រឿងនេះ បានចូលរួមសម្តែងដោយតារាសម្តែងរឿង Titanic លោក Leonardo DiCaprio ។ ជាលទ្ធផល ភ្ញៀវទេសចរ ៥ពាន់នាក់ ចូលមកលេងកម្សាន្តនៅតំបន់ឆ្នេរនេះជារៀងរាល់ថ្ងៃ។
បើតាមការចុះផ្សាយរបស់ទីភ្នាក់ងារព័ត៌មាន AFP ទីប្រឹក្សានៃនាយកដ្ឋានឧទ្យានជាតិថៃ លោក Thon Thamrongnawasawat បញ្ជាក់ឲ្យដឹងនៅថ្ងៃទី០៩ ខែឧសភាថា ការហាមប្រាមមកលេងកម្សាន្តនៅឆ្នេរសមុទ្រនេះ នឹងត្រូវពន្យាររហូតដល់ពាក់កណ្តាលឆ្នាំ២០២១។ ត្រង់ចំណុចនេះ លោក និយាយទៀតថា គោលបំណងនៃការបិទនេះ នាយកដ្ឋានលោក ចង់ទុកពេលច្រើនបន្ថែមទៀតដើម្បីឲ្យអេកូឡូស៊ីរបស់ឆ្នេរនេះ លូតលាស់ឡើងវិញយ៉ាងពេញលេញ។
លើសពីនេះ លោក Thon លើកឡើងថា ក្រោយពីឆ្នេរនេះ បើកឲ្យភ្ញៀវមកកម្សាន្តឡើងវិញនោះ វិធានការមួយចំនួន នឹងត្រូវអនុវត្ត ក្នុងនោះរួមមាន កំណត់ចំនួនភ្ញៀវទេសចរដែលមកលេងកម្សាន្តប្រចាំថ្ងៃ និងហាមឃាត់ទូកនានាចតនៅក្បែរមាត់ទឹក ដែលច្បាប់ហាមឃាត់។
សូមបញ្ជាក់ថា ជិតមួយឆ្នាំក្រោយឆ្នេរនេះត្រូវបានបិទពីសាធារណៈ ត្រីឆ្លាមជាច្រើន ត្រូវបានគេមើលឃើញវិលត្រឡប់ទៅកាន់តំបន់នោះវិញ។ អាជ្ញាធរអភិរក្សនៅតំបន់នោះ ចាត់ទុកការវិលត្រឡប់បែបនេះ ជាសញ្ញាវិជ្ជមាននៃការលូតលាស់នៃអេកូឡូស៊ីឡើងវិញនៅតំបន់នេះ៕
© រក្សាសិទ្ធិដោយ thmeythmey.com