ការបោះឆ្នោតពាក់កណ្តាលអាណត្តិនៅហ្វីលីពីន អាចជួយពង្រឹងអំណាចលោក ឌូទើតេ

អន្តរជាតិ

ការបោះឆ្នោតពាក់កណ្តាលអាណត្តិនៅហ្វីលីពីន អាចជួយពង្រឹងអំណាចលោក ឌូទើតេ

13, May 2019 , 10:28 am

រូបភាព

ប្រជាជនហ្វីលីពីនឈរតម្រង់ជួររង់ចាំបោះឆ្នោតនៅព្រឹកថ្ងៃចន្ទទី ១៣ ខែឧសភា (AFP)

ដោយ: ថ្មីៗ

ប្រជាជនហ្វីលីពីនរាប់លាននាក់នាំគ្នាចេញមកបោះឆ្នោតពាក់កណ្តាលអាណត្តិនៅថ្ងៃចន្ទទី ១៣ ខែឧសភានេះ។ គេរំពឹងថា ការបោះឆ្នោតនេះនឹងជួយពង្រឹងអំណាចរបស់លោក រ៉ូឌ្រីហ្គោ ឌូទើតេ បន្ថែមទៀតក្នុងការដឹកនាំជាពិសេសនាំយកមកវិញនូវទោសប្រហារជីវិត និងកែរដ្ឋធម្មនុញ្ញ។

ការបោះឆ្នោតពាក់កណ្តាលអាណត្តិជ្រើសរើសសមាជិកស្ថាប័ននីតិបញ្ញតិ្តនៅហ្វីលីពីន ចាប់ផ្តើមជាផ្លូវការនៅព្រឹកម៉ោង ៦ ថ្ងៃ ១៣ ខែឧសភា។ ប្រជាជនដែលចុះឈ្មោះមានរហូតដល់ ៦១លាននាក់ ចាប់ផ្តើមចាកចេញពីលំនៅដ្ឋានដើម្បីជ្រើសរើសតំណាងរបស់ខ្លួន។

បើតាមទីភ្នាក់ងារព័ត៌មាន AFP ការបោះឆ្នោតនេះធ្វើឡើងដើម្បីជ្រើសរើសសមាជិកស្ថាប័ននីតិបញ្ញត្តិថ្នាក់ជាតិ និងថ្នាក់មូលដ្ឋានប្រហែល ១៨០០០ នាក់ក្នុងនៅមានសមាជិកសភាតំណាង ២៩៧ រូប និងសមាជិកព្រឹទ្ធសភាចំនួន ១២ រូបថែមទៀត។ ព្រឹទ្ធសភាហ្វីលីពីនមានសមាជិកសរុប ២៤ នាក់ ដោយមានអាណត្តិរយៈពេល ៦ឆ្នាំ។

យ៉ាងណាក៏ដោយ គេរំពឹងថា ការបោះឆ្នោតពាក់កណ្តាលអាណត្តិនេះនឹងជួយប្រធានាធិបតី រ៉ូឌ្រីហ្គោ ឌូទើតេ ពង្រឹងឥទ្ធិពលរបស់ខ្លួនបន្ថែមទៀតផង។ ថ្វីបើលោក ឌូទើតេ រងការរិះគន់ និងជាអ្នកនយោបាយចម្រូងចម្រាសខ្លាំងក្តី លោកនៅតែមានប្រជាប្រិយភាពខ្ពស់ ដោយសារប្រជាជនហ្វីលីពីនធុញទ្រាន់នឹងស្ថានភាពស្រុកទេស និងក្រុមអភិជននយោបាយដែលមិនគិតគូរពីប្រទេសជាតិ។

បើសិនជាសម្ព័ន្ធមិត្តលោកបានទទួលបានសំឡេងភាគច្រើនក្នុងព្រឹទ្ធសភា លោក ឌូទើតេ នឹងទទួលបានការគាំទ្រទាំងស្រុងពីស្ថាប័ននីតិបញ្ញត្តិដើម្បីឈានទៅដល់ការ នាំយកមកវិញទោសប្រហារជីវិតដើម្បីបោសសម្អាតក្រុមឈ្មួញនិង និងឧក្រិដ្ឋជនគ្រឿងញៀន និងរៀបចំសរសេររដ្ឋធម្មនុញ្ញឡើងវិញដែរ។

គណបក្សប្រឆាំងហ្វីលីពីនបានព្រមានជាមុនហើយថា ជ័យជម្នះរបស់បក្សពួកលោក ឌូទើតេ ក្នុងការបោះឆ្នោតនេះនឹងអាចអនុញ្ញាតឲ្យប្រធានាធិបតីសរសេររដ្ឋធម្មនុញ្ញឡើងវិញ ដោយដកមាត្រាកំណត់អាណត្តិប្រធានាធិបតីចេញ ថ្វីបើលោកធ្លាប់ប្រកាសម្តងជាពីរដងថា លោកនឹងចាកចេញពីតំណែងពេលចប់អាណត្តិក៏ដោយ។

ក្នុងករណីដែលលោក ឌូទើតេ បន្តកាន់អំណាចទៅមុខទៀតដោយសរសេររដ្ឋធម្មនុញ្ញឡើងវិញមែននោះ សង្គ្រាមគ្រឿងញៀនដែលលោកដាក់ចេញក្រោយឡើងកាន់អំណាចឆ្នាំ ២០១៦ នឹងត្រូវពង្រីកថែមទៀតជាមួយការអនុវត្តទោសប្រហារជីវិត។

រដ្ឋអាស៊ីអាគ្នេយ៍មួយនេះសម្រាប់លុបចោលទោសប្រហារជីវិតឆ្នាំ ១៩៨៧ ហើយនៅឆ្នាំ ១៩៩៣ ទោសប្រហារជីវិតនេះត្រូវបានដាក់អនុវត្តឡើងវិញ មុននឹងត្រូវលុបចោលម្តងទៀតនៅឆ្នាំ ២០០៦៕