ជាតិ
នយោបាយជាតិ
នាយករដ្ឋមន្ត្រីនេប៉ាល់ លោក K.P. Sharma Oli មកដល់កម្ពុជា នារសៀលនេះ លោក K.P. Sharma Oli បំពេញទស្សនកិច្ចផ្លូវរដ្ឋនៅវៀតណាម និងកម្ពុជា
× ភ្នំពេញ៖ នាយករដ្ឋមន្ត្រីនេប៉ាល់ លោក K.P. Sharma Oli នឹងមកទស្សនកិច្ចនៅកម្ពុជា រយៈពេល៣ថ្ងៃ គឺចាប់ពីថ្ងៃទី១៣ ដល់១៥ ឧសភា។ នេះបើតាមក្រសួងការបរទេស និងសហប្រតិបត្តិការអន្តរជាតិ ។
ក្រសួងការបរទេសកម្ពុជា បានបញ្ជាក់ថា ដំណើរទស្សនកិច្ចរបស់នាយករដ្ឋមន្ត្រីនេប៉ាល់នេះ គឺក្នុងគោលបំណងពង្រឹង និងលើកតម្កើងលើកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ទេសចរណ៍ និងវប្បធមឥរវាងប្រទេសទាំងពីរ។ ជាមួយគ្នានេះលោកនាយករដ្ឋមន្ត្រីនេប៉ាល់ K.P. Sharma Oli ក៏នឹងថ្លែងសន្ទរកថាគន្លឹះនៅក្នុងវេទិកាធុរកិច្ចកម្ពុជា-នេប៉ាល់ រួមទាំងជំនួបដោយឡែកជាមួយមេដឹកនាំសំខាន់របស់កម្ពុជាទៀតផង។
ក្រោយបញ្ចប់ទស្សនកិច្ចនៅកម្ពុជា នាយករដ្ឋមន្ត្រីនេប៉ាល់ លោក K.P. Sharma Oli នឹងបន្តដំណើរទៅប្រទេសវៀតណាមផងដែរ។ នេះបើតាម The Himalayan Times ដែលបានស្រង់សម្តីរដ្ឋមន្ត្រីការបរទេសនេប៉ាល់លោក Pradeep Kumar Gyawali ។
សម្ដេចនាយករដ្ឋមន្ត្រី ហ៊ុន សែន គឺជាមេដឹកនាំកម្ពុជាដំបូងគេ ដែលបានធ្វើដំណើរទស្សនកិច្ចនៅប្រទេសនេប៉ាល់ នៅពេលដែលសម្ដេច បានចូលរួមកិច្ចប្រជុំថ្នាក់តំបន់ នៅទីក្រុងKathmandu កាលពីខែធ្នូ ឆ្នាំ២០១៨ ។ ក្នុងដំណើរទស្សនកិច្ចនោះ មេដឹកនាំកម្ពុជា និងនេប៉ាល់ ក៏បានព្រមព្រៀងពង្រឹងសហប្រតិបត្តិការរួមគ្នា លើវប្បធម៌ សេដ្ឋកិច្ច និងនយោបាយ រួមទាំងអនុស្សរណៈយោគយល់គ្នាលើការបើកស្ថានទូតកម្ពុជា នៅក្នុងប្រទេសនេប៉ាល់ទៀតផង។
គួរបញ្ជាក់ថា កម្ពុជា និងនេប៉ាល់ បានបង្កើតទំនាក់ទំនងការទូត កាលពីឆ្នាំ១៩៧៤មក ៕
© រក្សាសិទ្ធិដោយ thmeythmey.com