លោក សម រង្ស៊ី បង្ហើបថា «តិចទៀត លោកចូលមកតាមថៃ...»
ជាតិ
​​​ន​យោ​បាយ​ជាតិ​
លោក សម រង្ស៊ី បង្ហើបថា «តិចទៀត លោកចូលមកតាមថៃ...»
13, May 2019 , 5:23 pm        
រូបភាព
លោក សម រង្ស៊ី ថ្លែងទៅកាន់ក្រុមបាតុករក្នុងរាជធានីភ្នំពេញ កាលពីអំឡុងខែកញ្ញា ឆ្នាំ២០១៣ (រូបពី AFP)
លោក សម រង្ស៊ី ថ្លែងទៅកាន់ក្រុមបាតុករក្នុងរាជធានីភ្នំពេញ កាលពីអំឡុងខែកញ្ញា ឆ្នាំ២០១៣ (រូបពី AFP)
ដោយ: ថ្មីៗ
លោក សម រង្ស៊ី មេដឹកនាំក្រុមប្រឆាំង ទំនងជាឆ្លងកាត់ប្រទេសថៃ មុននឹងឈានជើងចូលមកទឹកដីកម្ពុជា។ ក្នុងកិច្ចប្រជុំរបស់អតីតគណបក្សសង្គ្រោះជាតិ នៅរដ្ឋកាលីហ្វ័រញ៉ា សហរដ្ឋអាមេរិក នាថ្ងៃទី១២ ខែឧសភា ឆ្នាំ២០១៩ លោក សម រង្ស៊ី ថ្លែងបែបនេះថា៖«ខ្ញុំ គ្រាន់តែបង្ហើបថា តិចទៀតខ្ញុំចូលតាមថៃ។ ខ្ញុំ នាំប្រជាពលរដ្ឋខ្មែរ រាប់ម៉ឺន រាប់សែននាក់...»។



មេដឹកនាំក្រុមប្រឆាំងដែលកំពុងនិរទេសរូបនេះ ពុំបាននិយាយអ្វីច្រើនទេពីផែនការនៃការវិលត្រឡប់របស់លោក ហើយលោក នៅតែលាក់ពេលវេលានៃការវិលត្រឡប់។ ប៉ុន្តែ លោក បង្ហាញការជឿជាក់ថា ប្រជាពលរដ្ឋខ្មែរ ជាពិសេសយុវជននៅតាមបណ្តាប្រទេសនានា ដូចជា នៅកូរ៉េ នៅថៃ និង នៅម៉ាឡេស៊ី ជាដើម នឹងធ្វើដំណើរមកកម្ពុជាជាមួយលោក ដើម្បីរួមគ្នាផ្តាស់ប្តូរឲ្យបាន នៅឆ្នាំ២០១៩។  

ការបង្ហើបរបស់លោក សម រង្ស៊ី ដែលថាចង់មកកម្ពុជាដោយឆ្លងកាត់តាមប្រទេសថៃនេះ ហាក់ផ្គើននឹងការព្រមានរបស់សម្តេចនាយករដ្ឋមន្រ្តី ហ៊ុន សែន។ កាលពីអំឡុងខែមីនា ឆ្នាំ២០១៩ ​ក្នុង​ពិធី​ចែក​សញ្ញាបត្រ​ដល់​និស្សិត​នៃ​សាកលវិទ្យាល័យ​ភ្នំពេញ​អន្តរជាតិ ប្រមុខរដ្ឋាភិបាល ព្រមានទុកជាមុនបែបនេះថា៖«បើមកតាមទល់ដែន [ថៃ] គឺល្អមើលតើ ខ្ញុំអត់ដឹងទេ។ អ្នកឯងត្រូវដឹង តាមទល់ដែន គេដាក់ត្រង់សេ ហើយគេមានកាំភ្លើងយន្តនៅនុ៎ង។ មកតាមទល់ដែន គឺរឿងធំហើយ»។

លើសពីនេះ ប៉ុន្មានថ្ងៃមុន គេ ទើបនឹងបានឃើញលិខិតបែកធ្លាយពីរប្រភេទរបស់សម្តេច ហ៊ុន សែន ដោយលិខិតមួយចេញក្នុងនាមនាយករដ្ឋមន្រ្តី ផ្ញើជូនទៅគ្រប់ប្រធានក្រុមការងារថ្នាក់ជាតិចុះមូលដ្ឋានរាជធានី-ខេត្ត ដែលស្ថិតក្នុងក្របខ័ណ្ឌរដ្ឋាភិបាល និងលិខិតមួយទៀត ចេញក្នុងនាមប្រធានគណបក្ស គឺផ្ញើជូនគ្រប់ប្រធានក្រុមការងារគណៈកម្មាធិការកណ្តាលចុះជួយរាជធានី-ខេត្ត ដែលស្ថិតក្នុងក្របខ័ណ្ឌគណបក្ស ដើម្បីបញ្ជាពួកគេ ឲ្យចុះទៅពន្យល់ប្រជាពលរដ្ឋនៅគ្រប់មូលដ្ឋាន អំពីផលវិបាកនៃការផ្តួលរំលំរដ្ឋាភិបាលតាមរយៈការធ្វើបដិវត្តពណ៌ និងផែនការនៃការវិលត្រឡប់របស់លោក សម រង្ស៊ី។

លោក សម រង្ស៊ី ចំអកថា សម្តេច ហ៊ុន សែន កំពុងតែភ័យចំពោះគម្រោងនៃការវិលត្រឡប់របស់លោក៕

Tag:
 សម រង្ស៊ី
  មាតុភូមិនិវត្ត
© រក្សាសិទ្ធិដោយ thmeythmey.com