អន្តរជាតិ
ថៃស្រូបភ្ញៀវទេសចរឥណ្ឌាកាន់តែច្រើន ក្រោយលើកលែងទិដ្ឋាការ
×
ដោយ៖ យ៉ន សុខន
កំណើនអ្នកទេសចរឥណ្ឌាមកកាន់ប្រទេសថៃកើនឡើងរហូតដល់ ២៥ ភាគរយរាប់ចាប់ពីរដ្ឋអាស៊ីអាគ្នេយ៍មួយនេះលុបចោលថ្លៃទិដ្ឋាការកាលពីចុងឆ្នាំ ២០១៨ កន្លងទៅ។
ក្នុងគោលដៅទាក់ទាញអ្នកទេសចរ រដ្ឋាភិបាលថៃបានលើកលែងថ្លៃទិដ្ឋាការសម្រាប់ភ្ញៀវទេសចរមកពីប្រទេសចំនួន ២១ ក្នុងនោះក៏មានប្រទេសឥណ្ឌាផងដែរ។ ការលើកលែងទិដ្ឋាការនេះធ្វើឡើងចាប់តាំង ពីថ្ងៃ ទី១៥ ខែវិច្ឆិកា ឆ្នាំ២០១៨ ហើយវានឹងបន្តសុពលភាពរហូតដល់ខែតុលាឆ្នាំ២០១៩ ខាងមុខនេះ។
យោងតាមសារព័ត៌មានថៃ Bangkok Post ការលើកលែងទិដ្ឋាការដែលមានតម្លៃ២,០០០បាត ក្នុងភ្ញៀវបរទេសម្នាក់ បានជំរុញឲ្យមានកំណើនយ៉ាងខ្លាំងនូវភ្ញៀវទេសចរឥណ្ឌា។ ការមកដល់នៃភ្ញៀវទេសចរឥណ្ឌានៅត្រីមាសទីមួយឆ្នាំ ២០១៩ នេះ មានការកើនឡើង២៥% ពោលគឺមានចំនួនភ្ញៀវទេសចរឥណ្ឌាសរុប ៤៥០,០០០នាក់ ។
យ៉ាងណាមិញ ការលុបចោលថ្លៃទិដ្ឋាការចំពោះភ្ញៀវទេសចរបរទេសនេះ ទទួលបានការចាប់អារម្មណ៍តិចតួចប៉ុណ្ណោះពីសំណាក់ភ្ញៀវទេសចរចិន ហើយគេសង្កេតឃើញថា អ្នកទេសចរពីប្រទេសមួយនេះនៅតែបន្តធ្លាក់ចុះ។
ការមកដល់នៃភ្ញៀវទេសចរចិននៅក្នុងត្រីមាសដំបូងនៃ ឆ្នាំ២០១៩ មានចំនួន៣,១លាននាក់ ដែលតួលេខនេះមានការធ្លាក់ចុះ២.១% បើធៀបទៅនឹងត្រីមាសដូចគ្នាកាលពីឆ្នាំមុន។
គួរបញ្ជាក់ផងដែរថា កាលពីឆ្នាំមុនប្រទេសថៃបានទទួលភ្ញៀវទេសចរឥណ្ឌាសរុបចំនួន ១,៥៩៦,៧៧២នាក់ និងបានទទួលចំណូលតាមរយៈទិដ្ឋាការចំនួន៦៦ពាន់លានបាត ដែលតួលេខនេះមានការកើនឡើន១៦% បើធៀបនឹងឆ្នាំ២០១៧៕
© រក្សាសិទ្ធិដោយ thmeythmey.com