ជាតិ
នយោបាយជាតិ
លោក សុខ ឥសាន (ស្តាំ) ធុញទ្រាន់នឹងការលើកឡើងរបស់ លោក សម រង្ស៊ី ទាក់ទងនឹងមូលដ្ឋានទ័ពចិននៅកម្ពុជា
×![]()
ដោយ: ថ្មីៗ
ទោះរដ្ឋាភិបាល បំភ្លឺរួចហើយថា គ្មានការសាងសង់មូលដ្ឋានកងទ័ពចិន នៅលើទឹកដីកម្ពុជា លោក សម រង្ស៊ី មេដឹកនាំក្រុមប្រឆាំង នៅតែអះអាងថាមាន។ លោក ស្នើឲ្យអង្គការសហប្រជាជាតិ (UN) រៀបចំគណៈកម្មការអន្តរជាតិមួយ ដើម្បីស៊ើបអង្កេតរឿងនេះ។ 
តាមរយៈសារទំព័រហ្វេសប៊ុក នៅថ្ងៃទី១៤ ខែឧសភា ឆ្នាំ២០១៩ មេដឹកនាំក្រុមប្រឆាំងដែលកំពុងនិរទេសរូបនេះ បានសរសេរយ៉ាងដូច្នេះថា «ការសាងសង់មូលដ្ឋានសឹករបស់ប្រទេសក្រៅណាមួយ លើទឹកដីប្រទេសកម្ពុជា គឺជាការរំលោភកិច្ចព្រមព្រៀងទីក្រុងប៉ារីសឆ្នាំ១៩៩១ ហើយជាការគំរាមដល់សន្តិភាព និងសន្តិសុខ ក្នុងតំបន់អាស៊ីភាគអាគ្នេយ៍ទាំងមូល»។
លោក សុខ ឥសាន ធុញទ្រាន់នឹងសម្តីរបស់លោក សម រង្ស៊ី ដោយលោក មិនចង់ឆ្លើយតបឡើយ។ លោក និយាយជាមួយសារព័ត៌មានថ្មីៗ បែបនេះថា «យើង មិនចាំបាច់ចាប់អារម្មណ៍នឹងគាត់ទេ។ គេបដិសេធគាត់ចោលហើយ»។
យ៉ាងណា អ្នកនាំពាក្យគណបក្សកាន់អំណាចរូបនេះ នៅតែបកស្រាយថា រដ្ឋធម្មនុញ្ញកម្ពុជា ពុំអនុញ្ញាតឲ្យបរទេសណា មកសាងសង់មូលដ្ឋានទ័ពនៅកម្ពុជាឡើយ។ លោក បន្តថា ការចោទប្រកាន់របស់ជនណាម្នាក់ ឬបរទេសណាមួយ មិនមែនជារឿងសំខាន់ទេ សំខាន់រដ្ឋាភិបាលកម្ពុជា គោរពត្រឹមត្រូវតាមរដ្ឋធម្មនុញ្ញ។
កម្ពុជា បានរងការចោទប្រកាន់ជាថ្មីថា អនុញ្ញាតឲ្យចិន បង្កើតមូលដ្ឋានទ័ពនៅខេត្តកោះកុង។ សារព័ត៌មានបរទេសមួយឈ្មោះ War On The Rocks បានចុះផ្សាយពីរឿងនេះ។
លោក ឈុំ សុជាត អ្នកនាំពាក្យក្រសួងការពារជាតិ បានហៅការផ្សាយព័ត៌មាននេះថា ជាចេតនាចង់មួលបង្កាច់មកលើរដ្ឋាភិបាលកម្ពុជា។ លោក សរសេរលើទំព័រហ្វេសប៊ុក យ៉ាងដូច្នេះថា «ការផ្សព្វផ្សាយលាបពណ៌យ៉ាងគឃ្លើនរបស់គេហទំព័រនោះ គឺជាចេតនានយោបាយទុច្ចរិតធ្វើឲ្យពិភពលោកមានការភាន់ច្រឡំចំពោះប្រទេសកម្ពុជា ព្រមទាំងប៉ុនប៉ងរំខានដល់ការអភិវឌ្ឍរបស់ប្រទេស ក្នុងកិច្ចសហការពីវិនិយោគិនបរទេស និងធ្វើឲ្យប៉ះពាល់ដល់ភ្ញៀវទេសចរ ដែលនឹងមកកាន់ប្រទេសកម្ពុជាកាន់តែច្រើននាពេលខាងមុខ»។
កាលពីប៉ុន្មានខែមុន រដ្ឋាភិបាលកម្ពុជា បានរងការចោទប្រកាន់ម្តងរួចមកហើយ ថាបើកដៃឲ្យចិន បង្កើតមូលដ្ឋានទ័ពនៅខេត្តព្រះសីហនុ។ កាលនោះ រដ្ឋាភិបាលកម្ពុជា បានច្រានចោលដូចគ្នា៕
Tag:
សម រង្ស៊ី
មូលដ្ឋានទ័ពចិន
© រក្សាសិទ្ធិដោយ thmeythmey.com
