ការប្រកួតបាល់ទាត់ក្របខណ្ឌមិត្តហ្វូនខេមបូឌានលីគ នៅថ្ងៃសៅរ៍ ទី១៨ ខែឧសភា ឆ្នាំ២០១៩នេះ មានការប្រកួតចំនួន៣គូ ក្នុងនោះណាហ្គាវើលបើកទ្វារកីឡដ្ឋានស្តាតចាស់ទទួលក្រុមអង្គរថាយហ្គឺរ ខណៈវិសាខា ប៉ះយុវជនអាយុក្រោម១៨ឆ្នាំបាទីលើទឹកដីខ្លួន ក្រោយសូលទីឡូអង្គរស្វាគមន៍ភ្នំពេញក្រោន។
ណាហ្គាវើល ប៉ះ អង្គរថាយហ្គឺរ វេលាម៉ោង៦ល្ងាចនៅកីឡដ្ឋានស្តាតចាស់
ក្រោយបរាជ័យ ៤-២ ក្រោមថ្វីជើងក្រសួងការពារជាតិនាជំនួបសប្តាហ៍ទី២ ណាហ្គាវើលបានស្តារមុខមាត់ឡើងវិញតាមរយៈការយកឈ្នះ៥ប្រកួតជាប់គ្នាជាបន្តបន្ទាប់។ ក្រោយលត់អគ្គស្នងការដ្ឋាននគរបាលជាតិ ៦-០ នៅកីឡដ្ឋានស្តាតចាស់ ណាហ្គាវើលបន្តយកឈ្នះសូលទីឡូអង្គរ ១-0 លើទឹកដីសៀមរាប។ បន្ទាប់មកក្រុមនេះទៅស៊ីគីរីវង់សុខសែនជ័យដល់ផ្ទះក្នុងលទ្ធផល ៣-១ មុនឈ្នះភ្នំពេញក្រោន និងអគ្គិសនីកម្ពុជាក្នុងលទ្ធផល ៣-0 ដូចគ្នាជាបន្តបន្ទាប់។ ណាហ្គាវើលដែលកំពុងឈរលេខ២មាន១៨ពិន្ទុ រំពឹងយកឈ្នះអង្គរថាយហ្គឺរនៅថ្ងៃនេះ ដើម្បីឈរកំពូលតារាងបណ្តោះអាសន្ន។
លោក មាស ចាន់ណា គ្រូបង្វឹកណាហ្គា(អាវលឿង) និងលោក Oriol Mohedano គ្រូបង្វឹកអង្គរថាយហ្គឺរ, រូបភាពពី CNCC
ប៉ុន្តែវាមិនមែនជារឿងងាយស្រួលសម្រាប់ណាហ្គាវើលក្នុងការយកឈ្នះនោះទេ ព្រោះអង្គរថាយហ្គឺរជាក្រុមកំពុងឡើងជើងដែលមិនទាន់ស្គាល់ចាញ់សម្រាប់៧ប្រកួតកន្លងមកនេះ។ ក្រោយឈ្នះវិសាខា ២-១ លើទឹកដីខ្លួនក្រោមក្រសែភ្នែកអ្នកទស្សនាជាង៣ពាន់នាក់ អង្គរថាយហ្គឺរបានបញ្ចប់ក្នុងលទ្ធផលស្មើ ១-១ ជាមួយក្រុមកំពូលតារាងព្រះខ័នរាជស្វាយរៀងនៅលើទឹកដីខេត្តស្វាយរៀង។ នាជំនួបសប្តាហ៍ទី៧ ក្រុមមានមូលដ្ឋាននៅខេត្តសៀមរាបមួយនេះ បានលត់អាស៊ីអឺរ៉ុបក្នុងលទ្ធផល ៦-១។ បច្ចុប្បន្នអង្គរថាយហ្គឺរស្ថិតនៅលេខរៀងទី៤ មាន១៥ពិន្ទុក្រោយឈ្នះ៤ ស្មើ៣។
វិសាខា ជួប យុវជនអាយុក្រោម១៨ឆ្នាំបាទី វេលាម៉ោង៦ល្ងាចនៅកីឡដ្ឋានវិសាខា
វិសាខា រំពឹងយកឈ្នះក្រុមយុវជនអាយុក្រោម១៨ឆ្នាំបាទី ដើម្បីពង្រឹងទីតាំង ក៏ដូចជាប្រជែងដណ្តើមចំណាត់ថ្នាក់លេខ២ជាមួយណាហ្គាវើល ពិសេសរក្សាគម្លាតជាមួយក្រុមកំពូលតារាងព្រះខ័នរាជស្វាយរៀង។ បច្ចុប្បន្នក្រុមនេះ ស្ថិតនៅលេខរៀងទី៣មាន១៦ពិន្ទុ ក្រោយឈ្នះ៥ ស្មើ១ និងចាញ់១។ ក្រោយចាញ់អង្គរថាយហ្គឺរ ២-១ នាជំនួបសប្តាហ៍ទី៥នៅកីឡដ្ឋានខេត្តសៀមរាបក្រុមមានមូលដ្ឋាននៅរាជធានីភ្នំពេញមួយនេះបានលត់កំពង់ចាម ១៤-០ ដោយកាលណោះខ្សែប្រយុទ្ធ កែវ សុខផេង រកបាន៧គ្រាប់ម្នាក់ឯង និងយកឈ្នះជើងខ្លាំងបឹងកេតក្នុងលទ្ធផល ៣-២ នៅលើទឹកដីខ្លួន។
ចំណែកក្រុមយុវជនអាយុក្រោម១៨ឆ្នាំបាទី ទើបតែស្គាល់ជ័យជម្នះមួយលើកប៉ុណ្ណោះក្នុងចំណោមការប្រកួត៧លើក ដោយយកឈ្នះកំពង់ចាមក្នុងលទ្ធផល ៣-០។ បច្ចុប្បន្នក្រុមដែលសហព័ន្ធដាក់ឲ្យប្រកួតដើម្បីបានបទពិសោធមួយនេះ ស្ថិតនៅលេខរៀងទី១៣ មាន៣ពិន្ទុ ជាមួយជ័យជម្នះ១លើក ចាញ់៦លើក។
សូលទីឡូអង្គរ ប៉ះ ភ្នំពេញក្រោនវេលាម៉ោង៣:៣០នាទីរសៀល នៅកីឡដ្ឋានខេត្តសៀមរាប
ក្រោយបញ្ចប់ដោយគ្មានការស៊ុតបញ្ចូលទីជាមួយវិសាខាក្នុងជំនួបបើកឆាក ក្រុមសូលទីឡូអង្គរ រងបរាជ័យ៣ប្រកួតជាបន្តបន្ទាប់ក្នុងនោះចាញ់ព្រះខ័នរាជស្វាយរៀង ១-0 អាស៊ីអឺរ៉ុប ២-១ និងណាហ្គាវើល ១-0។ បន្ទាប់មក ពួកគេបានបញ្ចប់ក្នុងលទ្ធផលស្មើ ២-២ ជាមួយអគ្គស្នងការដ្ឋាននគរបាលជាតិ និងស្មើ ១-១ ជាមួយក្រសួងការពារជាតិ។ សម្រាប់ជំនួបសប្តាហ៍ទី៧ ក្រុមនេះបានយកឈ្នះក្រុមគីរីវង់សុខសែនជ័យក្នុងលទ្ធផល ១-0។ អ្វីដែលគួរឲ្យកត់សម្គាល់ក្នុងចំណោមបរាជ័យទាំង៣ប្រកួត សូលទីឡូអង្គរចាញ់តែ១គ្រាប់ប៉ុណ្ណោះ។
ចំណែកក្រុមភ្នំពេញក្រោន ដែលទើបតែងតាំងលោក ស៊ុំ វណ្ណា ជាគ្រូបង្វឹកជំនួសលោក Leonardo Vitorino ស្ថិតនៅលេខរៀងទី៧មាន៩ពិន្ទុ ក្រោយ៧ប្រកួតឈ្នះ៣និងចាញ់៤។ សម្រាប់៣ប្រកួតចុងក្រោយរបស់ពួកគេ គឺយកឈ្នះអាស៊ីអឺរ៉ុប ២-១ ចាញ់ណាហ្គាវើល ៣-០ និងឈ្នះអគ្គស្នងការដ្ឋាននគរបាលជាតិ ៣-០៕