អន្តរជាតិ
ក្រុមហ៊ុន Amazon ឲ្យលុយបុគ្គលិក១ម៉ឺនដុល្លារ បើកជំនួញផ្នែកដឹកជញ្ជូនខ្លួនឯង
× ក្រុមហ៊ុន E-Commerce យក្សអាមេរិក Amazon បានប្រកាសថា ខ្លួននឹងផ្តល់លុយឲ្យបុគ្គលិកម្នាក់មួយម៉ឺនដុល្លារ ប្រសិនបើពួកគេឈប់ធ្វើការ និងបើកជំនួញដឹកជញ្ជូនផ្ទាល់ខ្លួន។ ការសម្រេចបែបនេះ ធ្វើឡើងខណៈក្រុមហ៊ុននេះ កំពុងព្យាយាមគ្រប់គ្រងការដឹកជញ្ជូនដោយខ្លួនឯង ក្រោយពីមានការរិះគន់ពីប្រធានាធិបតីអាមេរិកថា ខ្លួនកេងចំណេញពីសេវាកម្មប្រៃសណីយ៍អាមេរិក។
ក្នុងសេចក្តីថ្លែងការណ៍ ក្រុមហ៊ុន Amazon អាមេរិក កាលពីដើមសប្តាហ៍ បានបញ្ជាក់ឲ្យដឹងថា គំនិតផ្តួចផ្តើមផ្តល់លុយមួយម៉ឺនដុល្លារឲ្យបុគ្គលិកនេះ មានគោលដៅបន្តការតាំងចិត្តរយៈពេលវែងរបស់ក្រុមហ៊ុន Amazon ដើម្បីលើកទឹកចិត្តបុគ្គលិកទាំងអស់ឈោងចាប់អាជីពដែលពួកគេប៉ងប្រាថ្នា។
តាមការចុះផ្សាយរបស់ទីភ្នាក់ងារព័ត៌មាន AFP ក្រៅពីផ្តល់លុយមួយម៉ឺនដុល្លារ ក្រុមហ៊ុន Amazon ក៏នឹងផ្តល់ប្រាក់បៀវត្ស បីខែសម្រាប់បុគ្គលិក ដើម្បីពង្រឹងទំនុកចិត្តពួកគេ។ ការប្រកាសផ្តល់ការលើកទឹកចិត្តដល់បុគ្គលិកឲ្យបើកជំនួញដឹកជញ្ជូនផ្ទាល់ខ្លួនបែបនេះ ធ្វើឡើងខណៈ ក្រុមហ៊ុន Amazon ប្រឹងប្រែងកាត់បន្ថយការពឹងផ្អែករបស់ខ្លួនលើសេវាកម្មដឹកជញ្ជូនមួយចំនួន ដូចជា សេវាកម្មប្រៃសណីយ៍អាមេរិក និង FedEx ជាដើម។
កន្លងទៅ ប្រធានាធិបតីអាមេរិក លោក ដូណាល់ ត្រាំ ធ្លាប់ចោទប្រកាន់ក្រុមហ៊ុន E-Commerce យក្ស Amazon ថា បានកេងចំណេញពីសេវាកម្មប្រៃសណីយ៍អាមេរិក ដោយប្រើប្រាស់សេវាកម្មជាកញ្ចប់ធំនៃការវេចខ្ចាប់ នៅពេលដឹកជញ្ជូនទំនិញម្តងៗ។ យ៉ាងណាមិញ អ្នកជំនាញជាច្រើន យល់ឃើញថា មូលហេតុពិតប្រាកដ គឺដោយសារតែរដ្ឋាភិបាលសហព័ទ្ធអាមេរិក ពិបាកនឹងទាញផលចំណេញពីចំណូលដែលក្រុមហ៊ុន Amazon រកបាន។
គួររម្លឹកផងដែរថា ក្នុងឆ្នាំ២០១៨ ក្រុមហ៊ុន Amazon អាមេរិក ធ្លាប់បានដាក់ដំណើរការកម្មវិធីមួយឈ្មោះថា «ដៃគូសេវាកម្មដឹកជញ្ជូន» ដែលតម្រូវឲ្យបុគ្គលិកខ្លួន ចាប់ផ្តើមវិនិយោគលើជំនួញដឹកជញ្ជូនផ្ទាល់ខ្លួនរបស់ពួកគេ។ មកទល់នឹងពេលនេះ មនុស្សជាង ២០០នាក់ហើយ បានចាប់ផ្តើមជំនួញ Start-up ផ្នែកដឹកជញ្ជូនរបស់ក្រុមហ៊ុន Amazon នេះ ។
ក្រុមហ៊ុន រំពឹងថា មនុស្សរាប់រយនាក់ផ្សេងទៀត នឹងចាប់អារម្មណ៍លើគំនិតផ្តួតផ្តើមនេះ ដែលបើកឲ្យចូលរួមក្នុងសហរដ្ឋអាមេរិក ចក្រភពអង់គ្លេស និងអេស្បាញ់៕
Tag:
Amazon
ជំនួញដឹកជញ្ជូន
© រក្សាសិទ្ធិដោយ thmeythmey.com