អន្តរជាតិ
វៀតណាម-ម៉ាឡេស៊ី ឯកភាពបង្កើតលក្ខខណ្ឌអនុគ្រោះវិនិយោគជំរុញពាណិជ្ជកម្មទ្វេភាគីឲ្យបាន ១៥ពាន់លានដុល្លារ
រូបភាព៖ ការិយាល័យរដ្ឋមន្ត្រីការបរទេសម៉ាឡេស៊ី
×![]()
រដ្ឋាភិបាលក្រុងហាណូយ និងរដ្ឋាភិបាលក្រុងកូឡាឡាំពួរ បានព្រមព្រៀងគ្នាក្នុងការពង្រឹង និងពង្រីកទំហំពាណិជ្ជកម្មទ្វេភាគីឲ្យបាន ១៥ ពាន់លានដុល្លារ នៅត្រឹមឆ្នាំក្រោយ។ ដើម្បីសម្រេចបានគោលដៅនេះ រដ្ឋាភិបាលទាំងពីរ បានសន្យាបង្កើតលក្ខខណ្ឌអនុគ្រោះ និងបរិយាសវិនិយោគល្អសម្រាប់គ្នាទៅវិញទៅមក។
លោករដ្ឋមន្ត្រីការបរទេសម៉ាឡេស៊ី Saifuddin Abdullah នៅថ្ងៃ១៦ ឧសភា បានបំពេញទស្សនកិច្ចផ្លូវការទៅកាន់វៀតណាមជាលើកដំបូង ដើម្បីពង្រឹងកិច្ចសហប្រតិបត្តិទ្វេភាគី ជាពិសេសលើទំនាក់ទំនងពាណិជ្ជកម្ម ខណៈដែលម៉ាឡេស៊ី ទើបតែផ្លាស់ប្តូរក្បាលម៉ាស៊ីនដឹកនាំប្រទេសថ្មីនោះ។ នេះបើយោងតាមការចុះផ្សាយរបស់ភ្នាក់ងារព័ត៌មានវៀតណាម Vietnam News។
តាមប្រភពព័ត៌មានដដែល តាមរយៈដំណើរទស្សនកិច្ចនេះ លោករដ្ឋមន្ត្រី Saifuddin Abdullah បានជួបពិភាក្សាជាមួយនឹងសមភាគីវៀតណាម លោករដ្ឋមន្ត្រី Phạm Bình Minh ហើយភាគីទាំងពីរ បានឯកភាពគ្នាក្នុងការដកចេញរបាំងពាណិជ្ជកម្ម និងបង្កើតលក្ខខណ្ឌអនុគ្រោះសម្រាប់ការធ្វើសហប្រតិបត្តិការពាណិជ្ជកម្មលើវិស័យអភិវឌ្ឍទីក្រុង,ថាមពលកកើតឡើងវិញ, ផលិតផលអេឡិចត្រូនិក និងជលផល និងនេសាទ។
ប្រមុខការទូតទាំងពីរ ក៏បានប្តេជ្ញាចិត្តក្នុងការលើកកម្ពស់យន្តការនានា និងចុះហត្ថលេខាលើកិច្ចសហប្រតិបត្តិការផ្នែកសន្តិសុខ និងការពារជាមួយគ្នាផងដែរ។ ការបង្កើនការផ្លាស់ប្តូរប្រតិភូជាន់ខ្ពស់ដើម្បីពង្រឹងភាពជាដៃគូយុទ្ធសាស្ត្រ ក៏ស្ថិតនៅក្នុងគោលការណ៍ឯកភាពរបស់ប្រមុខការទូតទាំងពីរផងដែរ។
តាម Vietnam News ក្នុងអំឡុងទស្សនកិច្ចនេះ រដ្ឋមន្ត្រីការបរទេសម៉ាឡេស៊ី ក៏បានចូលជួបពិភាក្សាជាមួយនឹងលោកនាយករដ្ឋមន្ត្រីវៀតណាម Nguyễn Xuân Phúc ផងដែរ ដែលជំនួបនេះហើយលោករដ្ឋមន្ត្រី Saifuddin Abdullah បានស្នើវៀតណាមក្នុងការធ្វើកិច្ចសហប្រតិបត្តិការអភិវឌ្ឍទំនាក់ទំនងប្រពៃណីឲ្យស្របទៅតាមបដិវត្តន៍ឧស្សាហកម្ម ៤.០ និងរ៉ូបូត។
ភាគីទាំងពីរ ក៏បានឆ្លៀតពន្លិចបញ្ហាសមុទ្រចិនខាងត្បូង ដែលជាវិវាទអធិបតេយ្យរួមជាមួយនឹងចិន ដោយភាគីទាំងពីរ ឯកភាពគ្នាគាំទ្រឲ្យពន្លឿនភាពឯកច្ឆន្ទនៅក្នុងអាស៊ានដើម្បីជំរុញដល់ការធ្វើក្រមប្រតិបត្តិសមុទ្រចិនខាងត្បូងកាន់តែឆាប់៕
Tag:
វៀតណាម
ម៉ាឡេស៊ី
អាស៊ាន
© រក្សាសិទ្ធិដោយ thmeythmey.com
