ជាតិ
នយោបាយជាតិ
ខួប៧០ឆ្នាំនៃការបាត់អធិបតេយ្យកម្ពុជាក្រោម នឹងប្រារព្ធនៅទីលានប្រជាធិបតេយ្យ លោក ថាច់ សេដ្ឋា ប្រធានសហគមន៍ខ្មែរកម្ពុជា ថ្លែងសារកាលពីទី៤ ខែមិថុនា ឆ្នាំ២០១៥ ក្នុងពិធីរម្លឹកខួប៦៦ឆ្នាំ ដែលបារាំងប្រគល់កម្ពុជាទៅឲ្យវៀតណាម
× អង្គការ-សមាគមខ្មែរកម្ពុជាក្រោម និង សម្ព័ន្ធយុវជនខ្មែរដើម្បីប្រជាធិបតេយ្យ នឹងប្រារព្ធពិធីរម្លឹកខួប៧០ឆ្នាំ ដែលបារាំងប្រគល់ទឹកដីកម្ពុជាក្រោម ទៅឲ្យវៀតណាមគ្រប់គ្រង។ ពិធីនេះ នឹងរៀបចំឡើងនៅទីលានប្រជាធិបតេយ្យថ្មី ក្នុងសង្កាត់ឫស្សីកែវ នាថ្ងៃទី៤ ខែមិថុនា។
សេចក្តីអំពាវនាវរបស់សហគមន៍ខ្មែរកម្ពុជាក្រោម ចុះថ្ងៃទី៦ ខែឧសភា បានឲ្យដឹងថា ពិធីនេះ មានការរាប់បាត្រព្រះសង្ឃជិត២ពាន់អង្គ។ សេចក្តីអំពាវនាវ ដែលចេញដោយលោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម បានអំពាវនាវឲ្យសាធារណជន ជួយឧបត្ថម្ភថវិកានិងសម្ភារផ្សេងៗ។
«កម្មវិធីនេះ ត្រូវបានផ្តួចផ្តើមឡើងដោយស្មារតីកូនខ្មែរស្នេហាជាតិសុទ្ធសាធ ដើម្បីសម្តែងគារវកិច្ច និងដឹងគុណចំពោះវិញ្ញាណក្ខន្ធរបស់អ្នកស្នេហាជាតិទាំងអស់ ដែលបានពលីជីវិតក្នុងបុព្វហេតុជាតិ និងសាសនា ព្រមទាំងកូនខ្មែរគ្រប់រូបចងចាំទិវាប្រវត្តិសាស្ត្រដ៏សែនឈឺចាប់នេះក្នុងន័យកុំឲ្យដានប្រវត្តិសាស្ត្រអតីតកាលនៃការបាត់បង់ទឹកដីនិងសោកនាដកម្មដ៏សែនខ្លោចផ្សា វិលមករកកូនខ្មែរជាថ្មីទៀត»។ នេះជាខ្លឹមសារនៅក្នុងសេចក្តីអំពាវនាវ។
អ្នកស្រី ឈឹម សាវ៉ាត សមាជិកាម្នាក់នៃគណៈកម្មការរៀបចំពិធីនេះ ប្រាប់សារព័ត៌មានថ្មីៗថា ពិធីរម្លឹកខួប៧០ឆ្នាំនេះ នឹងមានព្រះរាជតំណាងរបស់ព្រះមហាក្សត្រ យាងធ្វើជាអធិបតី ដូចឆ្នាំមុនៗដែរ។
សូមរម្លឹកថា នៅថ្ងៃទី៤ ខែមិថុនា ឆ្នាំ១៩៤៩ បារាំង បានសម្រេចដាក់ទឹកដីកម្ពុជាក្រោម ឲ្យស្ថិតក្រោមការគ្រប់គ្រងរបស់វៀតណាម។ កាលនោះ កម្ពុជា ស្ថិតក្រោមអាណានិគមបារាំង៕
Tag:
កម្ពុជាក្រោម
ខួប៧០ឆ្នាំ
© រក្សាសិទ្ធិដោយ thmeythmey.com