កីឡាជាតិ
ជាតិ
Honda នឹងមកដឹកនាំជម្រើសជាតិកម្ពុជា ពេលប៉ះប៉ាគីស្ថានក្នុងវគ្គជម្រុះ World Cup លោក Keisuke Honda នាពេលដឹកនាំជម្រើសជាតិកម្ពុជាកន្លងមក។ រូបថត AFP
× កីឡាករ Keisuke Honda ដែលត្រូវចែកផ្លូវជាមួយក្លិបក្របខណ្ឌកំពូលអូស្ត្រាលី Melbourne Victory បន្ទាប់ពីជំនួបចុងក្រោយជាមួយ Sanfrecce Hiroshima នៅថ្ងៃទី២២ ខែឧសភានេះ នឹងមកកម្ពុជាក្នុងអំឡុងពេល FIFA Day។ អ្នកចាត់ការក្រុមជម្រើសជាតិកម្ពុជារូបនេះ នឹងដឹកនាំក្រុមទល់ជាមួយប៉ាគីស្ថាន នាវគ្គជម្រុះ World Cup ជុំទី១ នៅខែមិថុនាខាងមុខនេះ។
លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាបានបញ្ជាក់ថា កីឡាករ Keisuke Honda នឹងមកដឹកនាំក្រុមជម្រើសជាតិកម្ពុជាពេលប៉ះជាមួយក្រុមប៉ាគីស្ថាន សម្រាប់វគ្គជម្រុះ FIFA World Cup Qatar 2022 ជុំទី១ ដែលធ្វើឡើងនៅពហុកីឡដ្ឋានជាតិ នាថ្ងៃទី៦ ខែមិថុនា ឆ្នាំ២០១៩។ ក្រុមទាំងពីរនឹងប្រកួតជើងទី២នៅថ្ងៃទី១១ ខែមិថុនា ឆ្នាំ២០១៩។
អ្នកចាត់ការក្រុមជម្រើសជាតិកម្ពុជារូបនេះ នឹងមកកម្ពុជាក្នុងអំឡុងថ្ងៃប្រកួតផ្លូវការ និងមិត្តភាពអន្តរជាតិដែលរៀបចំដោយសហព័ន្ធកីឡាបាល់ទាត់អន្តរជាតិ ឬហៅថា FIFA Day ចន្លោះពីថ្ងៃទី៣-១១ ខែមិថុនា ឆ្នាំ២០១៩។ ទោះបីយ៉ាងនេះក្តីគេមិនទាន់ដឹងពីពេលវេលាជាក់លាក់ថា លោក Honda មកកម្ពុជានៅថ្ងៃណានៅឡើយទេ។
ទោះបីលោក Keisuke Honda មិនទាន់មានវត្តមាននៅកម្ពុជាក៏ដោយ ជំនួយការរបស់លោក គឺលោក Felix Dalmas នឹងមកកម្ពុជានៅថ្ងៃទី២៤ ខែឧសភា ឆ្នាំ២០១៩ ដើម្បីជ្រើសរើសកីឡាករប្រមូលផ្តុំហ្វឹកហាត់ សម្រាប់ត្រៀមការប្រកួតដ៏សខាន់ខាងលើ។ សម្រាប់ការជ្រើសរើសកីឡាករជម្រើសជាតិ លោក Honda នឹងធ្វើការជាមួយលោក Felix តាមរយៈវីដេអូ Reference ទោះបីមិនបានមកផ្ទាល់ក៏ដោយ។ នេះបើតាមការបញ្ជាក់របស់លោក កែវ សារ៉េត។
ខ្សែបម្រើឆ្នើមជនជាតិជប៉ុនខាងលើ នឹងចែកផ្លូវជាមួយក្លិបក្របខណ្ឌកំពូលអូស្ត្រាលី Melbourne Victory ក្រោយជំនួបចុងក្រោយរបស់គេជាមួយក្រុម Sanfrecce Hiroshima នៅរសៀលថ្ងៃទី២២ ឧសភា ឆ្នាំ២០១៩នេះ។ ប៉ុន្តែមកទល់ពេលនេះ គេមិនទាន់លេចលឺថា កីឡាកររូបនេះ ទៅប្រកបអាជីពជាមួយក្លិបណានៅឡើយទេ។ ហើយក៏មិនមានដំណឹងថា រូបគេនឹងមកជួយពង្រឹងសមត្ថភាពក្រុមជម្រើសជាតិកម្ពុជា ដោយចំណាយពេលច្រើនជាងមុនផងដែរ៕
Tag:
បាល់ទាត់
Keisuke Honda
កែវ សារ៉េត
© រក្សាសិទ្ធិដោយ thmeythmey.com