ប្រធានាធិបតីឥណ្ឌូណេស៊ី ព្រមានចាត់វិធានការក្ដៅលើបាតុករតវ៉ាលទ្ធផលបោះឆ្នោត

អន្តរជាតិ

ប្រធានាធិបតីឥណ្ឌូណេស៊ី ព្រមានចាត់វិធានការក្ដៅលើបាតុករតវ៉ាលទ្ធផលបោះឆ្នោត

23, May 2019 , 10:03 am

រូបភាព

រូបភាព AFP

ដោយ: តន ចាន់រិទ្ធារ៉ា

ផ្លូវថ្នល់ក្នុងរដ្ឋធានីហ្សាការតា បានក្លាយជាសមរភូមិរវាងក្រុមបាតុករប្រឆាំងលទ្ធផលបោះឆ្នោតប្រធានាធិបតី និងកម្លាំងសន្តិសុខដែលព្យាយាមទប់ស្កាត់ស្ថានការណ៍កុំឲ្យរាលដាល។ ប៉ូលិសឥណ្ឌូណេស៊ី ជឿថា ការតវ៉ា ត្រូវបានគ្រោងទុកជាស្រេច ខណៈបាតុករបានប្រើប្រាស់ដំបង ផាវ និងដុំថ្មដើម្បីតដៃជាមួយប៉ូលិស។ ប្រធានាធិបតី ចូកូ វីដូដូ បានព្រមានចាត់វិធានការគ្រប់យ៉ាងដើម្បីការពារសន្តិសុខជាតិ ខណៈលោក ប្រាបូវ៉ូ សូប៊ីយ៉ាន់តូ បានប្រាប់ឲ្យអ្នកគាំទ្រលោកទៅផ្ទះវិញ។

បាតុកម្មហិង្សានៅឥណ្ឌូណេស៊ី បានឈានចូលយប់ទីពីរនៅរាត្រីថ្ងៃទី២២ ខែឧសភា ដោយក្រុមបាតុករដែលមិនពេញចិត្តលទ្ធផលបោះឆ្នោតប្រធានាធិបតី បានប៉ះទង្គិចជាមួយកម្លាំងសន្តិសុខ។ ផ្លូវថ្នល់ក្នុងទីក្រុងហ្សាការតា ពិសេសតំបន់ជុំវិញទីស្នាក់ការគណៈកម្មការរៀបចំការបោះឆ្នោតឥណ្ឌូណេស៊ី ពោរពេញដោយដុំថ្ម គ្រាប់កាំភ្លើងជ័រ និងផាវផងដែរ។ សា្លកសញ្ញាតាមដងផ្លូវ តូបអាហារជាច្រើនត្រូវបានដុតដោយបាតុករតវ៉ា។

មិនទាន់មានរបាយការណ៍ពីចំនួនអ្នកស្លាប់ ឬរងបួសក្នុងការប៉ះទង្គិចថ្ងៃទី២២ ខែឧសភាឡើយ។ ក្រុមគ្រូពេទ្យ បានជួយសង្គ្រោះបាតុករជាច្រើនដែលរងគ្រោះដោយឧស្ម័នរបស់ប៉ូលិស ហើយអ្នកខ្លះបានសន្លប់ទៅទៀត។ កាលពីរាត្រីថ្ងៃទី២១ ខែឧសភា ជាថ្ងៃប្រកាសលទ្ធផលការបោះឆ្នោតនោះ មនុស្ស៦នាក់បានស្លាប់ និងជាងពីររយនាក់ទៀតរបួសក្នុងការប៉ះទង្គិចរវាងប៉ូលិស និងក្រុមបាតុករដែលព្យាយាហែករនាំងរលួស។

នៅពេលស្ថានការណ៍កំពុងក្ដៅខ្លាំង លោកប្រធានាធិបតី ចូកូ វីដូដូ ក៏ចេញមកព្រមានក្រុមបាតុករដែលបន្តប្រមូលផ្ដុំនៅឡើយ។ ឈរអមដោយមន្ត្រីសន្តិសុខជាន់ខ្ពស់ក្នុងសន្និសីទសារព័ត៌មានថ្ងៃទី២២ ខែឧសភា លោក វីដូដូ ដែលជាបេក្ខជនឈ្នះឆ្នោត និយាយថា លោកនឹងមិនអត់ឱនឲ្យនរណាដែលធ្វើឲ្យរអាក់រអួលសន្តិសុខជាតិ ដំណើរការប្រជាធិបតេយ្យ និងការឯកភាពជាតិនៅឥណ្ឌូណេស៊ីឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។

«វាគ្មានជម្រើសអ្វីផ្សេងឡើយ។ ប៉ូលិស និងយោធា នឹងចាត់វិធានការម៉ឺងម៉ាត់ដែលកំណត់ដោយច្បាប់។» នេះជាការបញ្ជាក់របស់លោក វីដូដូ ដែលអះអាងថា រាល់បញ្ហាទាំងអស់ទាក់ទងការបោះឆ្នោត ត្រូវដោះស្រាយនៅតុលាការ។ លោកក៏អរគុណគូប្រជែងដែលចាញ់ឆ្នោត ប្រាបូវ៉ូ សូប៊ីយ៉ាន់តូ ដែលយកការមិនសុខចិត្តរបស់ខ្លួនទៅតវ៉ានៅតុលាការ ហើយលោកជឿថា ចៅក្រមនឹងកាត់ក្ដីដោយផ្អែកលើការពិត។

ចំណែកលោក សូប៊ីយ៉ាន់តូ ក៏បានអំពាវនាវឲ្យអ្នកគាំទ្ររបស់លោកត្រឡប់ទៅផ្ទះវិញសិន។ អ្នករៀបចំបាតុកម្មម្នាក់និយាយថា ខ្លួនបានទទួលសារពីថ្នាក់លើរបស់ខ្លួនដែលបានទទួលបញ្ជាពីលោក សូប៊ីយ៉ាន់តូ ដែលប្រាប់ឲ្យបាតុករបំបែកគ្នា។

ក្នុងសន្និសីទសារព័ត៌មានថ្ងៃទី២២ ខែឧសភា លោក Muhamad Iqbal អ្នកនាំពាក្យប៉ូលិសជាតិឥណ្ឌូណេស៊ី និយាយថា បាតុករជាច្រើនមិនមែនរស់នៅក្នុងទីក្រុងហ្សាការតាឡើយ ហើយប៉ូលិសបានរកឃើញស្រោមសំបុត្រមានលុយក្នុងពេលឆែកឆេរទៀតផង។ លោកចាត់ទុកហេតុការណ៍នេះ ជាការរៀបចំមួយ ហើយបាតុករហិង្សាត្រូវបានជួលដើម្បីបង្កបញ្ហា៕