អន្តរជាតិ
ការស្ទង់មតិ៖ ៦៣ភាគរយនៃប្រជាជនសិង្ហបុរី មិនហ៊ានបញ្ចេញមតិនយោបាយលើអនឡាញ
× ប្រមាណ ៦៣ភាគរយ នៃប្រជាជនសិង្ហបុរី ព្រួយបារម្ភថា ការបញ្ចេញមតិនយោបាយជាសាធារណៈលើបណ្តាញអនឡាញ អាចធ្វើឲ្យពួកគេមានបញ្ហាជាមួយអាជ្ញាធរ។ តួលេខនេះ ត្រូវបានចុះផ្សាយដោយ មូលនិធិ Thomson Reuters ក្នុងរបាយការណ៍ស្តីពីព័ត៌មានឌីចីថលឆ្នាំ២០១៨។
របាយការណ៍ឆ្នាំ២០១៨ នេះ គឺជារបាយការណ៍ប្រចាំឆ្នាំលើកទី៧របស់ Reuters ដែលមានគោលដៅឈ្វេងយល់ពីការផ្លាស់ប្តូរនៃបរិយាកាសផ្នែកព័ត៌មាននៅជុំវិញពិភពលោក។ របាយការណ៍នេះ ផ្អែកលើការស្ទង់មតិ មនុស្សច្រើនជាង ៧៤០០០ នាក់ ក្នុងប្រទេសចំនួន៣៧។
ប្រជាជនក្នុងប្រទេសទាំង៣៧នោះ ត្រូវបានស្នើសុំឲ្យវាយតម្លៃលើការលើកឡើងបែបនេះ៖ «ខ្ញុំមានទំនោរគិតដោយប្រយ័ត្នប្រយែងជុំវិញ ការបញ្ចេញមតិនយោបាយរបស់ខ្ញុំជាសាធារណៈលើបណ្តាញ អ៊ីនធឺណិត ព្រោះការធ្វើបែបនេះ អាចធ្វើឲ្យខ្ញុំមានបញ្ហាជាមួយអាជ្ញាធរ»។
ទាក់ទិននឹងការផ្តល់ចម្លើយលើការលើកឡើងខាងលើ ប្រជាជនសិង្ហបុរី បានជ្រើសរើសចម្លើយថា «យល់ព្រម» ឬ «ការយល់ព្រមខ្លាំងបំផុត»។ ក្នុងចំណោមប្រទេសដែលត្រូវបានស្ទង់មតិទាំង៣៧ប្រទេស សិង្ហបុរី ជាប់ចំណាត់ថ្នាក់លេខ ២ តាមពីក្រោយ តួកគី នៅពេលនិយាយពី កង្វល់ទាក់ទិននឹងការបញ្ចេញមតិនយោបាយជាសាធារណៈ ព្រោះខ្លាចការវាយបកពីរដ្ឋាភិបាល។
តាមរយៈរបាយការណ៍ដដែល ប្រជាជនអាមេរិក ន័រវែស និងស្វ៊ីស ពុំសូវព្រួយបារម្ភចំពោះការបញ្ចេញមតិនយោបាយលើបណ្តាញអនឡាញ។ ហេតុផលនោះ គឺប្រទេសទាំងនេះ ប្រកាន់ខ្ជាប់លទ្ធិប្រជាធិបតេយ្យយ៉ាងរឹងមាំ ជាមួយសិទ្ធិសេរីភាពនៃការបញ្ចេញមតិខ្ពស់ និងមានរដ្ឋធម្មនុញ្ញជួយការពារ។
ផ្ទុយមកវិញ ប្រទេសមួយចំនួន ដូចជា សិង្ហបុរី និងតួកគី នាប៉ុន្មានឆ្នាំចុងក្រោយនេះ បានព្យាយាមបង្កើតច្បាប់ដើម្បីបិទសិទ្ធិសេរីភាពនៃបញ្ចេញមតិ និងការចូលរួមរបស់ប្រជាជនក្នុងផ្នែកនយោបាយ។ តួយ៉ាង សភាសិង្ហបុរី កាលពីថ្មីៗនេះ បានអនុម័តច្បាប់ប្រឆាំងនឹង Fake News ដែលរដ្ឋាភិបាលជាអ្នកកំណត់ថា ព័ត៌មានណាពិតឬមិនពិត។ ក្រុមសិទ្ធិមនុស្ស បានរិះគន់ថា ច្បាប់ប្រឆាំង Fake News នេះ អាចត្រូវបានរដ្ឋាភិបាលសិង្ហបុរីប្រើប្រាស់ដើម្បីផលប្រយោជន៍នយោបាយ។
ចំណែក ក្នុងប្រទេសតួកគី របបរបស់ប្រធានាធិបតី Recep Tayyip Erdogan ត្រូវបានសមាគមន៍អន្តរជាតិថ្កោលទោសយ៉ាងខ្លាំង ក្រោយរបបនេះ បានចាប់ក្រុមសិទ្ធិមនុស្ស និងអ្នកកាសែតរាប់រយនាក់ ដាក់ពន្ធនាគារ ដោយចោទប្រកាន់ថា «ពាក់ព័ន្ធនឹងអំពើភេរវកម្ម» ឬ «ប្រមាថប្រធានាធិបតី» ជាដើម៕
© រក្សាសិទ្ធិដោយ thmeythmey.com